އިޒްރޭލުގެ ވެރިރަށް ގުދުސަށް ބަދަލު ކުރުމަކީ ސުލްހައަށް އެޅޭ ހުރަހެއް: ރާއްޖެ

އިޒްރޭލުގެ ވެރިރަށަކީ ގުދުސް ކަމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވުމަކީ މެދުއިރުމަތީގެ ސުލްހައަށް އެޅޭ ހުރަހެއް ކަމަށް ވާތީ، އެމެރިކާގެ އެ ނިންމުމަށް ދިވެހި ސަރުކާރުން މިރޭ ދެކޮޅު ހަދައިފި އެވެ.

އެމެރިކާގެ ނިންމުމަށް ދުނިޔޭގެ ގިނަ ގައުމުތަކުން ފާޑު ކިޔަމުން އަންނައިރު، ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި ބުނީ ގުދުސަކީ އިޒްރޭލްގެ ވެރިރަށް ކަމަށް އެމެރިކާ އިން ބަލައިގަތުމާއި ޓެލް އަވީވްގައި ހުންނަ އެމެރިކާގެ އެމްބަސީ ގުދުސަށް ބަދަލު ކުރަން ނިންމުމަކީ ބައިނަލްއަގުވާމީ ގާނޫނުތަކަށް ކުރެވޭ ބޭއިހްތިޔާރެއް ކަމަށެވެ.

ދިވެހި ސަރުކާރުން ބުނި ގޮތުގައި މި ނިންމުމުގެ ސަބަބުން މެދު އިރުމަތީގެ ސުލްހައަށް ކުރާ މަސައްކަތްތަކާއި ބައިނަލްއަގުވާމީ ސުލްހަ އާއި ހަމަޖެހުމަށް ކުރާ ކަންކަމަށް ނޭދެވޭ އަސަރެއް ކުރާނެ އެވެ. މެދުއިރުމައްޗަށް ދާއިމީ ގޮތެއްގައި ސުލްހަ ގެނެސް، އެ ސަރަހައްދުގައި ލޭއޮހޮރުވުމާއި އަނިޔާވެރިކަން ހުއްޓުވޭނީ ފަލަސްތީނާއި އިޒްރޭލްގެ ވަކި ދައުލަތެއް ގާއިމް ކުރާނެ ފުރުސަތު ފަހިކޮށްދީގެން ކަމަށް ވެސް ދިވެހި ސަރުކާރުން ބުންޏެވެ.

"ރާއްޖެ އިން ދެކެނީ އިރުމަތީ ގުދުސަކީ އިސްތިއުމާރު ކޮށްފައިވާ ފަލަސްތީނުގެ ސަރަހައްދެއްގެ ގޮތުގައި. އެމެރިކާ އިން މި މައްސަލައާ ގުޅުން ހުރި އދ. ގެ ސަލާމަތީ މަޖިލީހުގެ ގަރާރުތަކަށާއި ސުލްހަ ގާއިމް ކުރުމަށް ބައިނަލްއަގްވާމީ ފެންވަރުގައި ކުރާ މަސައްކަތްތަކަށް އިހްތިރާމް ކުރަން ގޮވާލަން،" ބަޔާނުގައި ވެ އެވެ.

ދިވެހި ސަރުކާރުން ބުނީ މި މައްސަލާގައި އޮތް ހައްލަކީ ފަލަސްތީނުގައި މިނިވަން މުސްތަގިއްލު ދައުލަތެއް ގާއިމުކޮށް، އެ ދައުލަތުގެ ވެރިރަށަކީ އިރުމަތީ ގުދުސް ކަމުގައި ކަނޑައެޅުމެވެ. އަދި 1967 ވަނަ އަހަރުގެ ކުރިން ސަރަހައްދީ ރޮނގު ކަނޑައަޅާފައި އޮތް ގޮތުގެ މައްޗަށް އެ ދައުލަތުގެ ސަރަހައްދީ އިން ކަނޑައަޅައި، ފަލަސްތީނާއި އިޒްރޭލުން އަވައްޓެރިންގެ ގޮތުގައި ދިރިއުޅުން ކަމަކީ މައްސަލަ އަށް އޮތް ހައްލު ކަމަށް ދިވެހި ސަރުކާރުން ބުނެ އެވެ.

ފަލަސްތީނަށް މިނިވަންކަން ހޯދައި ދިނުމަށް ބައިނަލްއަގްވާމީ ދުނިޔޭގައި މަސައްކަތް ކުރާނެ ކަމަށް ވެސް ރާއްޖެ އިން ބުންޏެވެ.

އިރުމަތީ ގުދުސް އާއި ހުޅަނގު އައްސޭރި އިޒްރޭލުން ހިފާފައި ވަނީ 1967 ވަނަ އަހަރު ކުރި ހަ ދުވަހުގެ ހަނގުރާމައިގަ އެވެ. އިރުމަތީ ގުދުސް އަކީ އިޒްރޭލުގެ ބައެއްގެ ގޮތުގައި ފަހުން އެ ގައުމުން ކަނޑައެޅި ނަމަވެސް ބައިނަލްއަގުވާމީ ގޮތުން އެކަން ބަލައިގެންފައެއް ނުވެ އެވެ.