ހުޅުމާލޭގައި 8.9 މެގަވޮޓްގެ ހަ ޖަނަރޭޓަރު ބަހައްޓާނެ: ސްޓެލްކޯ

ހުޅުމާލޭގައި ހަދާ 50 މެގަވޮޓްގެ ކަރަންޓް އުފައްދާ ޕަވާޕްލާންޓްގެ މަސައްކަތް ތާވަލާ އެއްގޮތަށް ކުރިއަށްދާ ކަމަށާއި އެތަނުގައި 8.9 މެގަވޮޓްގެ ހަ ޖަނަރޭޓަރު ބަހައްޓާނެ ކަމަށް ސްޓެލްކޯ އިން ބުނެފި އެވެ.

ކަރަންޓުގެ ހިދުމަތްދޭ ސަރުކާރުގެ މައި ކުންފުނިން ބުނީ އެ ކުންފުނިން ކަރަންޓުގެ ހިދުމަތް ދިނުމަށް ހިންގާ އެންމެ ބޮޑު މި މަޝްރޫއުގައި ގެންނަ ޖަނަރޭޓަރުތައް އަންނަ އަހަރު ކުރީކޮޅު ބަހައްޓައި ނިމޭނެ ކަމަށެވެ. އަދި މި މަޝްރޫއުގެ މަސައްކަތް އެއް އަހަރާ ދެ މަސް ދުވަހުގެ ތެރޭގައި ނިންމާނެ ކަމަށް ވެސް ސްޓެލްކޯ އިން ބުންޏެވެ.

އެ ކުންފުނިން ބުނީ ޗައިނާގެ ޑޮންފެން އިލެކްޓްރިކް އިންޓަނޭޝަނަލް ކޯޕަރޭޝަނާ ހަވާލުކޮށްފައިވާ 1.2 ބިލިއަން ރުފިޔާގެ، ފަސްވަނަ ޕަވާ ޕްރޮޖެކްޓް ކުރިޔަށް ގެންދަނީ ތިން ބަޔަކަށް ބަހާލައިގެން ކަމަށެވެ. އެގޮތުން ޖެނެރޭޝަން ފެސިލިޓީ އާއި ފިއުލް ފާމްގެ އިތުރުން ވޯޓާ ޑީސެލިނޭޝަން ފެސިލިޓީއެއް ގާއިމުކުރަން ނިންމާފައިވާ ކަމަށް ވެސް ސްޓެލްކޯ އިން ބުންޏެވެ.

އެ ކުންފުނިން ބުނީ އެ މަޝްރޫއުގެ ދަށުން ބަހައްޓާ ހުރިހާ ޖެނެރޭޓަރެއްގެ ފައުންޑޭޝަން އެޅުމުގެ މަސައްކަތް ނިމިފައިވާ ކަމަށެވެ. އަދި ޕަވަ ހައުސް އާއި ކޮންޓްރޯލް ފެސިލިޓީގެ އިމާރާތަށް ބޭނުންވާ ދަގަނޑު އެ ސައިޓަށް ގެނެސްފައިވާ ކަމަށް ވެސް ސްޓެލްކޯ އިން ބުންޏެވެ.

ތެޔޮ އަޅަން ބޭނުންކުރާ ޕަންޕުތައް ބަހައްޓާ އިމާރާތާއި ލޮނު ފެން ނަގަން ބޭނުންކުރާ ޕަމްޕު ބަހައްޓާ ތަނާއި މެއިންޓަނަންސް ވޯކުޝޮޕް ހެދުމުގެ މަސައްކަތްކުރަމުން އަންނަ ކަމަށް ވެސް އެ ކުންފުނިން ބުންޏެވެ.

ސްޓެލްކޯ އިން ބުނީ އެ މަޝްރޫއުގެ ދަށުން ދެވަނަ ތެޔޮ ތާނގީ ބަހައްޓާ ތަނުގެ ކޮންކްރީޓް މަސައްކަތް ނިމިފައިވާ ކަމަށެވެ. އަދި މުޅި މަޝްރޫއުގެ މަސައްކަތް ވެސް ކުރިޔަށް ދަނީ ކަނޑައެޅިފައިވާ ތާވަލާ އެއްގޮތަށް ކަމަށް ވެސް އެ ކުންފުނިން ބުންޏެވެ.