މިސްކިތަށް ދިން ހަމަލާގެ ބަދަލު ވަރަށް ހިތިވާނެ: ސީސީ

ގާހިރާ (ނޮވެމްބަރު 25) - މިސްރުގެ އުތުރުގެ ސައިނާއީގެ މިސްކިތަކަށް ހަމަލާދީ 300 އަށް ވުރެ ގިނަ މީހުން މަރާލި ހާދިސާގެ ބަދަލު ވަރަށް ހިތިކޮށް ދޭނެ ކަމުގެ އިންޒާރު ރައީސް އަބްދުލް ފައްތާހު ސީސީ ދެއްވައިފި އެވެ.

ބީރް އަލް އާބިދު ޓައުނުގެ އަލް ރައުދާ މިސްކިތަށް ހުކުރަށް މީހުން ޖަމާވެފައި ވަނިކޮށް މިސްކިތުގައި އިއްޔެ ބޮން ގޮއްވާ އަދި ފަހުން ވަނީ ބަޑިން ވެސް ހަމަލާދީފަ އެވެ. މިސްކިތުގައި ބޮން ގޮއްވުމުން، އެ ހަމަލާ އިން ސަލާމަތްވާ ބޭރަށް ނުކުތް މީހުން ގަޔަށް ވަނީ މިސްކިތުގެ ބޭރުގައި ހަތިޔާރު ހިފައިގެން ތިބި މީހުން ބަޑި ޖަހައިފަ އެވެ. މިސްރު ސިފައިން ބުނެފައި ވަނީ މި ހަމަލާގެ ރައްދެއްގެ ގޮތުން ޓެރަރިސްޓުން ތިބި ތަންތަނަށް ވައިގެ ހަމަލާދީފައިވާ ކަމަށެވެ.

މިސްރުގެ ފަހުގެ ތާރީޚުގައި ދިން އެންމެ ނުރައްކާ މި ހަމަލާގެ ޒިންމާ އެއްވެސް ބަޔަކު އަދި އުފުލައިފައެއް ނުވެ އެވެ. މި ހަމަލާގައި ވަނީ 30 ކުޑަ ކުއްޖަކު ވެސް މަރުވެފަ އެވެ. އަދި 100 އަށް ވުރެ ގިނަ މީހުން ޒަޚމްވެފައިވެ އެވެ.

"މިއީ ޓެރަރިޒަމާ ދެކޮޅަށް މިސްރުން ކުރަމުންދާ މަސައްކަތް ހުއްޓާލަން ދޭ ހަމަލާތައް. އެކަމަކު މި ހަމަލާ ދިން މީހުންގެ ކިބައިން މިސްރު ސިފައިން ބަދަލު ހިފާނެ،" ސީސީ ވިދާޅުވި އެވެ.

ސައިނާއީ ޕެނިންސުލާގައި އާއްމުކޮށް ހަމަލާ ދެނީ އިސްލާމިކް ސްޓޭޓް (އައިއެސް) އާ ގުޅިފައިވާ ޖަމާއަތްތަކުންނެވެ. ހަމަލާ ދިން މިސްކިތް އާއްމުކޮށް ބޭނުން ކުރަނީ ސޫފީންނެވެ.