މިސްކިތަށް ދިން ހަމަލާ: އެކަކު ސަލާމަތްވީ މަރުވެފައިވާ މީހުންގެ ދަށަށް ވަނުމުން

ގާހިރާ (ނޮވެމްބަރު 27) - މިސްރުގެ ސައިނާއީގެ މިސްކިތެއްގައި ބޮން ގޮއްވާ، އަދި ފަހުން ބަޑި ޖަހާ 305 މީހުން މަރާލި ހާދިސާ އިން ބައެއް މީހުން ވަނީ އާދަޔާޚިލާފު ގޮތް ގޮތަށް ސަލާމަތްވެފަ އެވެ.

ސޫފީން ނަމާދަށް އަރާ އަލް ރައުދާ މިސްކިތަށް ދިން ހަމަލާ އިން ސަލާމަތްވި އެކަކު ބުނި ގޮތުގައި އޭނާ ސަލާމަތްވީ މަރުވެފައިވާ މީހުންގެ ހަށިތަކުގެ ދަށަށް ވަދެ އޮތުމުން ކަމަށެވެ. އޭނާ ބުނި ގޮތުގައި މިސްކިތުގައި ހަމަލާ ދިނުމަށް ފަހު، ހަމަލާ ދިން މީހުން ވަނީ އެކަކު ވެސް ދިރިއޮތްތޯ ޗެކްކޮށްފަ އެވެ. އެ ވަގުތު އޭނާ ވެސް އޮތީ މަރުވެފައި އޮތް ކަމަށް ހެދި ކަމަށް ބުންޏެވެ. ހަމަލާގައި އޭނާގެ ބޭބެ އަކާއި ތިމާގެ އެހެން މީހަކު ވަނީ މަރުވެފަ އެވެ. އަދި 14 އަހަރުގެ ދަރިފުޅުގެ ފައި ވަނީ ބިނދިފަ އެވެ.

ހަމަލާ އިން ސަލާމަތްވި އެހެން މީހަކު ބުނި ގޮތުގައި ބަޑީގެ ހަމަލާގައި އޭނާގެ އާއިލާ އިން ނުވަ މެންބަރުން މަރުވި އެވެ. މަރުވި މީހުންގެ ތެރޭގައި އޭނާގެ ބައްޕަ ވެސް ހިމެނެ އެވެ.

އިސްމާއިލިއާ ޖެނެރަލް ހޮސްޕިޓަލުގައި މިހާރު ފަރުވާ ހޯދަމުން އަންނަ އެ މީހާ ބުނި ގޮތުގައި ބަޑީގެ ހަމަލާ އިން ސަލާމަތްވީ މަދު މީހެއް ކަމަށެވެ.

މިސްކިތުގައި ބަޑި ޖެހި މީހުން ތިބީ މޫނު ނިވާކޮށްގެންނެވެ. އޭގެ ތެރޭން އެކަކު ހުރީ އިސްލާމިކް ސްޓޭޓް (އައިއެސް) ގެ ދިދައެއް ހިފައިގެން ކަމަށް ސްޓޭޓް ޕްރޮސެކިއުޓަރު ނެރުނު ބަޔާނެއްގައި ބުނެފައިވެ އެވެ.

ހަމަލާ އިން ސަލާމަތްވެގެން ހޮސްޕިޓަލުގައި ފަރުވާ ހޯދަން ތިބި މީހުން ބުނެފައި ވަނީ އެއީ ކޮން ބައެއްކަން އެނގެން ބޭނުން ނުވާ ކަމަށެވެ. ސަބަބަކީ އައިއެސް އިން އެ މީހުންނާއި އެ މީހުންގެ އާއިލާތަކަށް އަނެއްކާ ވެސް ހަމަލާދީފާނެތީ އެވެ.

ރައުދާ މިސްކިތަށް ދިން ހަމަލާ ވަނީ އަޒުހަރުގެ އިމާމް އަހުމަދު އަލް ތައްޔިބު ކުށްވެރި ކުރައްވައިފަ އެވެ. އަދި ޓެރަރިޒަމާ ދެކޮޅަށް މިސްރު އެކަތި ގަނޑަކަށްވުމަށް އޭނާ ގޮވާލެއްވި އެވެ. މިސްރުގެ ރިލިޖަސް މިނިސްޓްރީގެ ސީނިއާ މެންބަރަކު ވަނީ ޓެރަރިޒަމާ ދެކޮޅަށް ކުރެވެން އޮތް މަސައްކަތަކީ ޓެރަރިސްޓުން ނައްތާލުން ކަމަށް ވިދާޅުވެފަ އެވެ.