ޑެސްޓިނޭޝަން ގައިޑް މޯލްޑިވްސް އިންސައިޑާގެ އާ އެޑިޝަނެއް ޑަބްލިއުޓީއެމްގައި ނެރެފި

ރާއްޖޭގެ ފަތުރުވެރިކަމާ ބެހޭ މައުލޫމާތު ހިމަނައިގެން ނެރޭ "ޑެސްޓިނޭޝަން ގައިޑް މޯލްޑިވްސް އިންސައިޑާ"ގެ އާ އެޑިޝަނެއް ނެރެފި އެވެ.

ލަންޑަނުގައި މިހާރު ކުރިއަށްދާ ވޯލްޑް ޓްރެވަލް މާކެޓް (ޑަބްލިއުޓީއެމް) ގައި، މޯލްޑިވްސް އިންސައިޑާގެ އާ އެޑިޝަން ނެރެދެއްވީ އެމްއެމްޕީއާރުސީގެ އެކްޓިން މެނޭޖިން ޑައިރެކްޓާ ހާރިސް މުހައްމަދެވެ. ޑަބްލިއުޓީއެމްގައި ބައިވެރިވާ، ފަތުރުވެރިކަމުގެ ދާއިރާގެ އިސް ބޭފުޅުންނަށް ވަނީ އޭގެ ކޮޕީތައް ހަދިޔާކޮށްފަ އެވެ.

މޯލްޑިވްސް އިންސައިޑާ އަކީ 2016 ވަނަ އަހަރު، ޑެސްޓިނޭޝަން މާކެޓިން އެޖެންސީއެއް ކަމަށްވާ މޯލްޑިވްސް ޕްރޮމޯޝަަން ހައުސް އިން ނެރެމުން އަންނަ މަޖައްލާ އެކެވެ. މިފަހަރު ނެރުނީ އެ މެގަޒިންގެ 2017-2018 އެޑިޝަނެވެ.

އާ އެޑިޝަނެއް ނެރުނީ، ފުރަތަމަ އެޑިޝަނުގެ ކާމިޔާބީ އަށް ބެލުމަށް ފަހުގައި ކަމަށް މޯލްޑިވްސް އިންސައިޑާ އިން ނެރެފައިވާ ބަޔާނެއްގައި ބުންޏެވެ. އަދި ފުރަތަމަ އެޑިޝަނުން އެނގުނު ކަންކަމުގެ މައްޗަށް ބިނާކޮށް، އާ އެޑިޝަނަށް ބޮޑެތި ބަދަލުތަކެއް ގެނެސްފައިވާނެ ކަމަށް ވެސް އޭގައިވެ އެވެ.

އެގޮތުން ފޮޓޯ ލިސްޓިން އަށް ބަދަލު ގެނެސް، ޕާޓްނަރުންނަށް އިތުރަށް އެކްސްޕޯޝާ ލިބޭނެ ގޮތަށް ފަހުގެ ޑިޒައިނަށް ބަދަލު ގެނެސްފައިވާކަން ފާހަގަކޮށްފައިވެ އެވެ. އަދި ރާއްޖޭގެ ތާރީހާއި ސަގާފަތާއި ފަތުރުވެރިކަމުގެ މުހިންމު ގިނަ މައުލޫމާތުތައް، ވަރަށް ތަފްސީލުކޮށް ގެނެސްދީފައިވާނެ ކަމަށް ވެސް ބުންޏެވެ.

"މި ބަދަލުތަކާ އެކު މޯލްޑިވްސް އިންސައިޑާ މި ވަނީ ފުލީ ފްލެޖް ޑެސްޓިނޭޝަން ގައިޑަކަށް ވެގެން ގޮސްފައި. އެއީ އަޅުގަނޑުމެން ފުރަތަމަ ދުވަހުން ވެސް ދެކެމުން ދިޔަ ހުވަފެން. އަޅުގަނޑުމެން ވަރަށް އެކްސައިޓްވެފައި މި ތިބީ. ޑަބްލިއުޓީއެމް އާއި އެކު މި ފެށުނީ އަޅުގަނޑުމެންގެ ގްލޯބަލް ޖާނީ،" މޯލްޑިވްސް އިންސައިޑާގެ ޑިރެކްޓާ އޮފް ސްޓޯރީޓެލިން އަލީ ނާފިޒް ވިދާޅުވި އެވެ.

މޯލްޑިވްސް އިންސައިޑާއިން ބުނީ ކުރީގެ އެޑިޝަނެކޭ އެއްގޮތަށް، އާ އެޑިޝަން ވެސް ދުނިޔޭގެ އެންމެ ވަރުގަދަ ފަސް ޓްރެވަލް ޓްރޭޑް ފެއާތަކުގައި ބަހާނެ ކަމަށެވެ. އޭގެ ތެރޭގައި ހިމެނޭ ފެއާތަކަކީ މިހާރު ކުރިއަށްދާ ޑަބްލިއުޓީއެމް، އައިޓީބީ ބާލިން، އޭޓީއެމް ދުބާއީ، އެމްއައިޓީޓީ ރަޝިޔާ އަދި ސީއައިޓީއެމް ޗައިނާ އެވެ.