ރާއްޖެއިން ވަޒީފާ ހޯދައިދޭނެ ކަމަށް ބުނެ އޮޅުވާލި ދެ މީހަކު އިންޑިއާގައި ހައްޔަރުކޮށްފި

އިންޑިއާ މީހަކަށް ރާއްޖެ އިން ވަޒީފާ ހޯދައިދޭނެ ކަމަށް ބުނެ އޮޅުވާލިކަމުގެ ތުހުމަތުގައި ދެ މީހަކު އިންޑިއާއިން ހައްޔަރުކޮށްފި އެވެ.

އިންޑިއާގެ ނޫސްތަކުން ބުނާ ގޮތުގައި ހައްޔަރުކުރީ އުމުރުން 37 އަހަރުގެ މުހައްމަދު ޒީޝާން އަލީ އާއި 27 އަހަރުގެ ޝާރިގް އަހުމަދެވެ. އެކަމަކު އެއީ ކޮން ގައުމެއްގެ ބައެއް ކަމެއް ބުނެފައެއްނުވެ އެވެ.

ދިވެހިން ބޭނުންކުރާ ނަންތަކާ އެއްގޮތް ކަމެއް ހުއްޓަސް ފުލުހުންގެ ތަރުޖަމާން އަހުމަދު ޝިފާން ވިދާޅުވީ އިންޑިއާގައި އެކަހަލަ ތުހުމަތެއްގައި ދިވެހިންގެ ބަޔަކު ހައްޔަރުކުރިކަން އެނގިވަޑައިގެންފައި ނުވާ ކަމަށެވެ.

ދެ މީހުން ހައްޔަރުކުރީ ޓެމިލްނާޑޫގެ ރައްޔިތެއް ކަމަށްވާ ޕަޝީރު މުހައްމަދު އަލީ އަށް ރާއްޖެއިން ވަޒީފާ ދޭނެ ކަމަށް ބުނެ އޮޅުވާލައިގެން އޭނާ އަތުން ފައިސާ ވެސް އަތުލާފައިވާ ކަމަށް ތުހުމަތުކޮށްފަ އެވެ.

ފުލުހުންނާ ހަވާލާދީ މީޑިއާތަކުން ބުނާ ގޮތުގައި ޒީޝާނަކީ ކުންފުންޏެއްގެ މަސްއޫލުވެރިއެއް ކަމަށް ބުނެ 400،000 ރުޕީސް (ގާތްގަނޑަކަށް 100،000ރ) ވަނީ ނަގާފަ އެވެ.

ވަގު ވޯކް ޕާމިޓާއި ވިސާ ފަދަ ތަކެތި އެ މީހުން އުފައްދާފައިވާ ކަމަށް ވެސް އިންޑިއާ ފުލުހުން ބުނެ އެވެ.

ޓޫރިޒަމް ދާއިރާ އިން ތަމްރީން ހޯދުމުގެ ނަމުގައި އިންޑިއާގެ ދަރިވަރުންތަކެއް ރާއްޖެ ގެނެސް ހާލުގައި ޖެހުނު މައްސަލައެއް ވެސް މި ފަހުން ކުރިމަތިވެ، އިންޑިއާގެ މީޑިއާގައި އެ ވާހަކަ ލިއުނެވެ.