ވެމްކޯއިން ވިލިމާލޭގައި ކުނި އުކައިދިނުމުގެ ޚިދުމަތް ފަށަނީ

ވިލިމާލޭގައި ކުނިއުކައި ދިނުމުގެ މަސައްކަތް ފެށުމަށް ތައްޔާރުވަމުން އަންނަ ކަމަށް ވެމްކޯ އިން މިއަދު ބުނެފި އެވެ.

ވެމްކޯގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ ބިޒްނަސް ޑިވެލޮޕްމަންޓް މެނޭޖަރު މުހައްމަދު އިގުބާލް ވިދާޅުވީ، ވިލިމާލޭގައި ކުނި އުކައިދިނުމުގެ މަސައްކަތް ފެށުމަށްޓަކައި އެކަމަށް ޚާއްސަ ސާވޭއެއް އެ ރަށުގައި ފަށާފައިވާ ކަމަށެވެ.

އިގްބާލް ފާހަގަކުރެއްވި ގޮތުގައި މީގެ ކުރިން ބޭރުގެ ފަރާތްތަކުން އަންނައިރު ވެސް ކުންޏާ ގުޅޭ ތަފާސްހިސާބު ހޯދާލެވޭނެ ގޮތެއް ރާއްޖޭގައި ނެތެވެ. އެހެންވެ ވެމްކޯއިން ކުނިއުކައި ދިނުމުގެ މަސައްކަތް ފަށާ ކޮންމެ ތަނެއްގައި ވެސް ޚިދުމަތް ފެށުމުގެ ކުރިން، އެތަނެއްގެ ކުނި މެނޭޖު ކުރަމުންދާ ގޮތާ ގުޅޭ ހުރިހާ މައުލޫމާތެއް އެއްކުރާނެ ކަމަށް އޭނާ ވިދާޅުވި އެވެ.

ވެމްކޯއިން މިހާރު ވަނީ ވިލިމާލެ އިން ކުނި އުކައިދޭނެ މީހުން ހޯދަން އިއުލާން ކޮށްފަ އެވެ. އެ ވަޒީފާތަކަށް މީހުން ހޯދުމަށް "އޯޕަންޑޭ" އެއް ވެސް މާދަމާ ބާއްވަން ވަނީ ނިންމައިފަ އެވެ. މާދަމާ ހަވީރު 4:00 އިން 6:00 އަށް އަދި ރޭގަނޑު 8:00 އިން 10:00 އަށް ވިލިމާލޭގެ ޔޫތު ސެންޓަރުގައި އެ ހަރަކާތް އޮންނާނެ އެވެ.

އެ ކުންފުނިން ބުނިގޮތުގައި ވިލިމާލެއިން ކުނި ނެގުމަށް ހަތް މަގާމަކަށް 50 އަށް ވުރެ ގިނަ ވަޒީފާގެ ފުރުސަތު ހުޅުވާލާނެ އެވެ. އަދި އެ ވަޒީފާތަކަށް ޚާއްސަ އިސްކަމެއް ދޭނީ ވިލިމާލޭގައި ދިރިއުޅޭ މީހުންނަށް ކަމަށް ވެމްކޯ އިން ބުންޏެވެ.

މާލޭގައި އެކަނި ވެސް ކުނި ނެގުމުގައި 150 އަށް ވުރެ ގިނަ މީހުން މިހާރު ވެސް އަންނަނީ މަސައްކަތް ކުރަމުންނެވެ.