ކާބޯތަކެއްޗާ ބެހޭ ގާނޫނެއް ހަދަނީ

ކާބޯތަކެއްޗާ ބެހޭ ގާނޫނެއް ހަދަން ތައްޔާރުވަމުން އަންނަ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ކާބޯތަކެތީގެ ރައްކާތެރިކަމާ ބެހޭ ފުރަަތަމަ ސިޔާސަތު ލޯންޗުކޮށްދެއްވުމަށް ފަހު ވާހަކަދައްކަވަމުން ނާޒިމް ވިދާޅުވީ އެ ބިލް ޑްރާފްޓުކުރުމުގެ ގިނަ މަސައްކަތްތަކެއް ނިމިފައިވާ ކަމަށެވެ.

އޭނާ ވިދާޅުވި ގޮތުގައި ކާބޯތަކެއްޗާ ބެހޭ ބިލަށް ގާނޫނީ ލަފާ ވެސް ހޯދަމުން އަންނަ ކަމަށެވެ. އަދި އެ ބިލް ގާނޫނަކަށް ވުމުން ކާބޯތަކެތި ރައްކާތެރިކުރުމުގެ މަސައްކަތްތައް ހަރުދަނާ ގޮތެއްގައި ކުރެވޭނެ ކަމަށް ވެސް ވިދާޅުވި އެވެ.

ބިލް ޑްރާފްޓްކުރުމުގައި ކަމާ ބެހޭ މިނިސްޓްރީތަކާއި ޖަމިއްޔާތަކުގެ އިތުރުން އެ ދާއިރާއާ ގުޅުން ހުރި އެކި ފަރާތްތަކުގެ އެއްބާރުލުން ލިބޭކަން މިނިސްޓަރު ފާހަގަކުރެއްވި އެވެ.

"ކާބޯތަކެއްޗާ ބެހޭ ބިލެއް ތައްޔާރުކުރެވިގެން ދާނީ އެންމެންގެ ވެސް މަޝްވަރާއާ އެކު. އެ ބިލް އެކުލަވާލެވި މިހާރު ފަހު މަރުހަލާގައި މި އުޅެނީ،" ނާޒިމް ވިދާޅުވި އެވެ.

"ގާނޫނީ ގޮތުން ލިބެން ޖެހޭ ލަފާތައް ލިބުމާ އެކު ވަރަށް އަވަހަށް މަޖިލީހަށް ފޮނުވާނަން."