ސްޓިކާ ޖެހުން މަދުކޮށް، ޕާކިން ޒޯނުތަކަށް ބަދަލު ގެންނަނީ

ގަވާއިދާ ހިލާފަށް ޕާކު ކުރާ އުޅަނދުތަކުގައި ސްޓިކާ ޖެހުން މަދުކޮށް، ޕާކު ކުރުމުގައި ލުޔެއް ހޯދައި ދިނުމަށް މަސައްކަތް ކުރަމުން އަންނަ ކަމަށް ފުލުހުން މިއަދު ބުނެފި އެވެ.

ފުލުހުންގެ ޓްރެފިކް މެނޭޖްމެންޓް ޑިޕާޓްމެންޓްގެ ހެޑް، ފަތުހުﷲ ވަހީދު ވިދާޅުވީ މާލޭގައި ޓްރެފިކްގެ މައްސަލަ ބޮޑުވުމުގެ ސަބަބުން ވެހިކަލްތަކަށް ޕާކު ކުރުމުގައި ދަތިތަކެއް ހުރި ކަމަށެވެ. އެހެންވެ، މަގަށް އުނދަގޫ ނުވާ ގޮތަށް ޕާކުކޮށްފައި ހުންނަ އުޅަނދުތަކުގައި ނުވަތަ ނަމާދަށް މިސްކިތަށް އަރާއިރު ޕާކުކޮށްފައި ހުންނަ އުޅަނދުތަކުގައި މިހާރު ސްޓިކާ ނުޖަހާ ކަމަށް އޭނާ ވިދާޅުވި އެވެ.

"މީގެ މާނައަކީ އަޅުގަނޑުމެން އެއްގޮތަކަށް ވެސް ސްޓިކާ ނުޖަހާނެއެކޭ ނޫން. އެކަމަކު މިހާރު ސްޓިކާ ޖަހަނީ ވަރަށް ބަލައިގެން،" ފަތުހުﷲ ވިދާޅުވި އެވެ.

އޭނާ ވިދާޅުވީ ރޯދަ މަހު ރައްޔިތުންނަށް ދިން މި ލުއި ދެމެހެއްޓުމަށް އުޅަނދުތައް ޕާކު ކުރާނެ ގޮތްތަކެއް މިހާރު ހޯދަމުން އަންނަ ކަމަށެވެ. އެގޮތުން މިހާރު ހުރި ޕާކިން ޒޯންތަކަށް ބަދަލު ގެނެސް، އާ ޒޯންތަކެއް ކަނޑައަޅާނެ ކަމަށް ވިދާޅުވި އެވެ.

އެކަމަކު މި މަސައްކަތް މުޅިން އަދި ނުނިމޭތީ އޭގެ ތަފްސީލެއް ފަތުހުﷲ ނުދެއްވަ އެވެ.

މާލޭގައި ޕާކު ކުރާނެ އާ ސަރަހައްދުތަކެއް ކަނޑަައަޅާނެ ކަމަށާއި އެކަން ކުރާނީ ދައުލަތަށް ލިބިފައިވާ ހުސް ބިންތަކުގައި ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވެސް ވަނީ ވިދާޅުވެފަ އެވެ.

މާލޭގައި ދުއްވާ އުޅަނދުތައް އިންތިހާ އަށް އިތުރުވެފައިވާތީ އެ އުޅަނދުތައް ޕާކު ކުރާނެ ތަނެއް ނުލިބެ އެވެ. އަދި ގަވައިދާ ހިލާފަށް ސްޓިކާ ޖަހައިގެން ކޮންމެ ފަހަަރަކު ވެސް ބޮޑެތި އަދަދުތަކުން ޖޫރިމަނާ ކުރެ އެވެ.