ޕާކިން ޒޯނަކުން ސައިކަލެއް ޓޯކުރި މައްސަލައެއް، ފުލުހުން ބުނީ ބެހެއްޓޭނީ ހަތް ދުވަހަށް ކަމަށް

ޕާކިން ޒޯނެއްގައި ހުރި ސައިކަލެއް ފުލުހުން ޓޯކުރި މައްސަލައެއް ބޮޑުވެފައިވަނިކޮށް، ޕާކިން ޒޯނުތަކުގައި ވެސް ހަތް ދުވަހަށް ވުރެ ދިގު މުއްދަތަކަށް ސައިކަލު ބަހައްޓައިފި ނަމަ ޓޯކުރެވޭނެ ކަމަށް ފުލުހުން ބުނެފި އެވެ.

ފުލުހުން ޓޯކުރީ ޕާކިން ޒޯނެއްގައި ބަހައްޓާފައި ރާއްޖެ އިން ބޭރަށް ދިޔަ މީހެއްގެ ސައިކަލެވެ.

އޭނާ "މިހާރު" އަށް ބުނީ ސައިކަލް ޓޯކުރި ކަން އެނގުނީ ގެއްލިގެން ހޯދަމުން ދަނިކޮށް ކަމަށެވެ. ޒޯނުގައި ޕާކުކުރި ސައިކަލަށް ވީ ގޮތް އޮޅުންފިލުވަމުން ދަނިކޮށް، ފުލުހުން ގެންދިޔަކަން އެނގުނީ އެ ސަރަހައްދުގައި ދިރިއުޅޭ މީހުންގެ ފަރާތުން ކަމަށް އޭނާ ބުންޏެވެ.

މި މައްސަލާގައި އޭނާގެ ކަންބޮޑުވުމަކީ ސައިކަލު ޓޯކޮށްގެން ގެންދިޔައިރު ވެސް ފުލުހުން އެކަން ނޭންގުމެވެ.

އޭނާ ބުނި ގޮތުގައި އެކަމާ ގުޅިގެން ޓޯޔާޑަށް ދިއުމުން، ސައިކަލު ޕާކިން ޒޯނެއްގައި ބެހެއްޓިޔަސް، އެއް ތަނެއްގައި ހަތް ދުވަހަށް ވުރެ ގިނަ ދުވަސް ވަންދެން ވެހިކަލް ބަހައްޓައިފި ނަމަ ޓޯކުރުމުގެ ބާރު ލިބޭ ކަމަށް އެ ތަނުން ވަނީ ބުނެފަ އެވެ.

"އަހަރެންގެ މުދަލެއް ގެންދާއިރު އަހަންނަށް އެނގެން ޖެހޭނެ. ޓޯޔާޑުގައި ތިބި މީހުން ކައިރީ ބުނީމަ ބުނީ ގަވާއިދުގައި ލިޔެފައި ނެތޭ ވެރި ފަރާތަށް އަންގަން ޖެހޭ ވާހަކަ. ގެޒެޓް ކުރީމާ ޕޮލިހުންގެ ޒިންމާ ނިމުނީއޭ. އެ މީހެއްގެ ކަމެކޭ ގެޒެޓް ބެލުމަކީ،" އޭނާ ބުންޏެވެ.

ޓޯޔާޑުން އެ މީހާގެ ސައިކަލްގެ ނެގީ ގެންދިޔަތާ 55 ދުވަސް ފަހުންނެވެ.

އޭނާ ބުނާ ގޮތުގައި ސައިކަލު ނެގިއިރު ހުރީ ވަރަށް ބޮޑަށް ހަލާކުވެފަ އެވެ. ސައިކަލްގެ ލޯގަނޑު ނެތް އިރު، ދަބަރު ޖަހައި، އެކި ތަންތަނުން ހުރީ ކުލަ ގޮސްފައި ކަމަށް ބުންޏެވެ.

އުޅަނދެއް ޓޯޔާޑަށް ގެންދާތާ 60 ދުވަސް ވުމުން އެ އުޅަނދެއް ނައްތާލެވޭނެ ކަމަށް ފުލުހުންގެ ގަވައިދުގައިވެ އެވެ.

މި މައްސަލާގައި، ފުލުހުންގެ ތަރުޖަމާން އަހުމަދު ޝިފާން "މިހާރު" އަށް ވިދާޅުވީ ގަވާއިދުގައި އޮންނަ ގޮތުން ހަތް ދުވަސް ވަންދެން ވެހިކަލެއް ތަނެއްގައި ބަހައްޓައިފި ނަމަ، ޓޯކުރުމުގެ ބާރު ފުލުހުންނަށް ލިބޭ ކަމަށެވެ. އެއީ، ޕާކިން ޒޯނެއްގައި ބަހައްޓާފައި ހުރި ސައިކަލަކަށް ވިޔަަސް އެގޮތަށް އަމަލުކުރާނެ ކަމަށް ޝިފާން ވިދާޅުވި އެވެ.

ގިނަ ދުވަސްތަކެއް ވަންދެން މަގުތަކުގައި ޕާކުކޮށްފައި ހުންނަ އުޅަނދުތަކާ މެދު އަމަލުކުރެވޭނެ ކަމަށް ބަޔާން ކޮށްފައިވާ މާއްދާގެ ދަށުން އެ ވެހިކަލެއް ނަގައި ފުލުހުން ކަނޑައަޅައި ތަނަކަށް ގެންދިއުމުގެ ބާރު ލިބެ އެވެ.

އެކަމަކު، އެ ވެހިކަލަކީ ޕާކިން ޒޯނުގައި ގިނަ ދުވަސްތަކެއް ބަހައްޓާފައި ހުރި އުޅަނދެއްކަން ފުލުހުން ދެނެގަންނަ ގޮތެއް ސާފެއް ނޫނެވެ.

މާލޭގެ މަގުތައް ތަރުތީބުކޮށް، އަމާންކުރަން ކުރާ މަސައްކަތުގެ ދަށުން ފުލުހުން ވަނީ މި މަހުގެ 12 ގައި ވެސް 22 ސައިކަލު ނައްތަލައިފަ އެވެ. ނައްތާލި ސައިކަލުތަކުގެ ލިސްޓު މީގެ ދެ ދުވަހެއް ކުރިން ވަނީ ގެޒެޓްކޮށްފަ އެވެ.

ފުލުހުންނާއި ސިޓީ ކައުންސިލް ގުޅިގެން މިދިޔަ ހަފުތާ ބަންދުގައި ވެސް ވަނީ މާލޭގެ މަގުތަކުގައި ހުރި ގިނަ ދުވަސްވަންދެން ބޭނުންނުކޮށް ހުރި ބާ އުޅަނދުތައް ނަގައިފަ އެވެ.