ވިލާއިން މީރާއާ ދެކޮޅަށް ދައުވާ ކުރި ތިން މައްސަލައެއް އަނބުރާ ގެންގޮސްފި

ވިލާ ޝިޕިން އެންޑް ޓްރޭޑިން ކޮމްޕެނީން މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އާ ދެކޮޅަށް ސިވިލް ކޯޓުގައި ދައުވާކުރި ތިން މައްސަލައެއް ކުރިޔަށްގެންދަން ބޭނުންނުވާ ކަމަށް ބުނެ އަނބުރާ ގެންގޮސްފި އެވެ.

ވިލާ އިން ދައުވާކުރި ތިން މައްސަލައަކީ ރ. މާނެންފުއްޓާއި ތ. އެލާ އަދި ގދ. ގަޒީރާއާ ގުޅިގެން ޓޫރިޒަމް މިނިސްޓްރީއާ އެކު އެ ކުންފުނިން ސޮއިކުރި އެމެންޑެޑް އެންޑް ރީސްޓޭޓެޑް އެގްރިމަންޓް މިިދިޔަ އަހަރުގެ ފެބްރުއަރީ ފަސްވަނަ ދުވަހު ބާތިލުކޮށްފައިވާ ކަމަށް ބުނެ، އެ ރަށުގެ އިނީޝަލް ލީސް އެގްރިމަންޓްގެ ދަށުން ހިނގާ ކުއްޔާއި ޖޫރިމަނާ އަދި އިންޓަރެސްޓަށްވާ ފައިސާ ދެއްކުމަށް މީރާ އިން 30 ދުވަހުގެ މުއްދަތެއްދީ ފޮނުވި ސިޓީއަކީ ބާތިލް ސިޓީއެއް ކަމަށް ކަނޑައަޅައިދިނުމަށް ކުރި ދައުވާ އެވެ.

ސިވިލް ކޯޓުން މިދިޔަ އަންގާރަ ދުވަހުކުރި ހުކުމްގައި ބުނެފައި ވަނީ އެ މައްސަލަ ކުރިޔަށް ގެންދަން ބޭނުންނުވާ ކަމަށް ބުނެ ވިލާ ޝިޕިން އިން މިދިޔަ މަހުގެ 22 ވަނަ ދުވަހު އެ ކޯޓަށް ސިޓީ ފޮނުވާފައިވާ ކަމަށެވެ. އެހެންވެ އެ މައްސަލަ ކުރިޔަށްގެންދާނެ ތަނެއް ނެތް ކަމަށް ކޯޓުން ނިންމީ އެވެ.

މަޝްހޫރު ވިޔަފާރިވެރިޔާ އަދި މާމިގިލީ ދާއިރާގެ މެމްބަރު ގާސިމް އިބްރާހިމްގެ ވިލާ ޝިޕިންއަށް ދޫކޮށްފައިވާ ރަށްތަކުގެ އެގްރިމަންޓްތައް މިދިޔަ އަހަރު ބާތިލުކުރީ ސަރުކާރާ ދެމެދު އޮތް ގުޅުން ގޯސްވެ އިދިކޮޅު އެމްޑީޕީއާ ގުޅިގެން ހަރަކާތްތައް ހިންގަން ފެށުމާ އެކުގަ އެވެ. އެ އެގްރިމަންޓްތައް ބާތިލުކުރުމަށްފަހު 30 ދުވަހުގެ ތެރޭގައި 100 މިލިއަނެއްހާ ޑޮލަރު ދެއްކުމަށް ގާސިމްގެ ވިލާ ޝިޕިންއަށް އަންގާފައިވެ އެވެ. އަދި އެ ފައިސާ ނުދެއްކުމުން އެ ކުންފުނީގެ އެކައުންޓްތައް ފްރީޒް ވެސް ކުރި އެވެ.

ވިލާއިން މީރާއާ ދެކޮޅަށް ހުށަހެޅި ދައުވާތައް އަނބުރާ ގެނައިއިރު އެ ކުންފުނިން ދައްކަން ޖެހޭ ފައިސާ މީރާއަށް ދެއްކި ކަމެއް މިހާތަނަށް އެނގިފައެއްނުވެ އެވެ. އަދި އެ މައްސަލަ ކޯޓުން ނެގިއިރު ގާސިމާއި ސަރުކާރާ ދެމެދު ވަނީ ގުޅުން ބަދަހިވެފަ އެވެ. އަދި ޓޫރިޒަމް މިނިސްޓަރު މޫސާ ޒަމީރާއި ފޮނަދޫ ދާއިރާގެ މެމްބަރު އަބްދުއްރަހީމް ވަނީ ގާސިމްއާ ރޭ ބައްދަލުކޮށްފަ އެވެ.