މުމްބާއީގެ ރޭލް ސްޓޭޝަނެއްގައި ފިތިގެން 22 މީހުން މަރުވެއްޖެ

މުމްބާއީ (ސެޕްޓެމްބަރު 29) - އިންޑިއާގެ މުމްބާއީގެ ރޭލް ސްޓޭޝަނެއްގައި ބޯ ވާރޭ އިން ނިވާވާން ގިނަ ބަޔަކު އެއް ފަހަރާ އުޅުމުގެ ތެރޭގައި ފިތިގެން 22 މީހުން މިއަދު މަރުވެއްޖެ އެވެ.

ހެނދުނު އެންމެ ކާރޫބާރޫ ބޮޑު ވަގުތުގައި މި ހާދިސާ ހިނގީ އެލްފިންސްޓޯން ސްޓޭޝަނުގަ އެވެ. އެ ވަގުތު ސްޓޭޝަން އޮތީ މީހުން ފުރި ތޮއްޖެހިފަ އެވެ. ޒަޚަމްވި މީހުން މިހާރު ވަނީ ފަރުވާ ދިނުމަށް ކައިރީގައިވާ ހޮސްޕިޓަލްތަކަށް ގެންގޮސްފަ އެވެ.

ފިތިގެން މީހުން މަރުވި ހާދިސާގެ ތަހުގީގު މިހާރު ވަނީ ފަށައިފަ އެވެ. އިންޑިއާގެ ރޭލްވޭ މިނިސްޓަރު ޕިޔޫޝް ގޯޔާލް ވެސް މިހާރު ވަނީ މުމްބާއީ އަށް ވަޑައިގެންފަ އެވެ. ވެރިރަށުގެ ގޮތުގައި މުމްބާއީ ހިމެނޭ މަހާރާޝްތުރާ ސްޓޭޓުގެ ޗީފް މިނިސްޓަރު ވަނީ މަރުވި މީހުންގެ އާއިލާތަކަށް ބަދަލު ދޭނެ ކަމަށް ވިދާޅުވެފަ އެވެ. އަދި ޒަޚަމްވި މީހުންގެ ހޮސްޕިޓަލް ބިލްތަކަށް ފައިސާ ދަައްކަވާނެ ކަމަށް ވަނީ ވިދާޅުވެފަ އެވެ. މީގެ އިތުރުން މި ހާދިސާގައި ޒިންމާ އުފުލަން ޖެހޭ ފަރާތްތަކާ ދެކޮޅަށް ހަރުކަށި ފިޔަވަޅު އަޅުއްވާނެ ކަމަށް ވެސް ޗީފް މިނިސްޓަރު ވިދާޅުވި އެވެ.