ފައްލޫޖާ އިން ފިލަން ދަތުރުކުރި އައިއެސްގެ 260 ވެހިކަލް ގޮއްވާލައިފި

ބަޣުދާދު (ޖޫން 30) - އިސްލާމިކް ސްޓޭޓް (އައިއެސް) ގެ ކޮންޓްރޯލް ގެެއްލިފައިވާ ފައްލޫޖާ ސިޓީން ނުކުތުމަށް ދަތުރު ކުރަމުން ދިޔަ އެ ޖަމާއަތުގެ 260 ވެހިކަލަށް ވައިގެ ހަމަލާދީ ގޮއްވާލައިފައިވާ ކަމަށް އިރާގު ސިފައިން ބުނެފި އެވެ.

އިރާގުގެ ޑިފެންސް މިނިސްޓްރީން ބުނީ ފައްލޫޖާ އިން އައިއެސްގެ ހަނގުރާމަވެރިން ފިލަން މަސައްކަތް ކުރަނީ ސަރުކާރު ސިފައިންގެ ހަމަލާތަކުން ސަލާމަތްވުމަށް ކަމަށެވެ. ފައްލޫޖާ އިން ނުކުމެގެން އައިއެސްގެ ވެހިކަލްތައް ދަތުރު ކުރަމުން ދިޔައީ ސީރިއާގެ ސަރަހައްދީ ރޮނގާ ކައިރީގައި އައިއެސްގެ ބާރުގެ ދަށުގައިވާ ޓައުނަކަށެވެ.

ބަޣުދާދުގެ ހުޅަނގުން 30 މޭލު ދުރުގައި އޮންނަ ފައްލޫޖާގެ ފުރިހަމަ ކޮންޓްރޯލް ހޯދާފައިވާ ކަމަށް އިރާގު ސިފައިން ވަނީ އާދިއްތަ ދުވަހު ބުނެފަ އެވެ.

އިރާގު ސިފައިން ބުނީ އައިއެސްގެ ލަޝްކަރަށް ވައިގެ ހަމަލާތައް ދޭން ފެށީ ލިބުނު ޖާސާސީ މައުލޫމާތަކާ ގުޅިގެން ކަމަށެވެ. ވެހިކަލްތަައް ހަލާކުކޮށްލުމުގެ އިތުރުން ގިނަ އަދަދެއްގެ އައިއެސް ހަނގުރާމަވެރިން މަރާލާފައިވާ ކަމަށް ވެސް އިރާގު ސަރުކާރުން ބުނެ އެވެ.