އީދަށް ޑިމާންޑް ބޮޑުވެ، ފްލައިޓްތައް އިތުރު ކުރަން މޯލްޑިވިއަން އިން ވިސްނަނީ

އަންނަ ފިތުރު އީދާ ދިމާކޮށް އެތެރޭގެ އުދުހުންތަކުގެ ޑިމާންޑް ބޮޑުު ކަމަށާއި މަތިންދާބޯޓު އިތުރު ކުރަން ޖެހިއްޖެ ނަމަ، އެކަން ކުރާނެ ކަމަށް މޯލްޑިވިއަން އިން މިއަދު ބުނެފި އެވެ.

ގައުމީ އެއާލައިން "މޯލްޑިވިއަން" ހިންގާ އައިލެންޑް އޭވިއޭޝަނުގެ ހެޑް އޮފް އެޑްމިނިސްޓްރޭޝަން އަލީ ނަޝާތު "މިހާރު" އަށް ވިދާޅުވި ގޮތުގައި އީދު ކައިރިވާ ވަރަކަށް އެތެރޭގެ އުދުހުންތަކުގެ ޑިމާޑަށް ބަލާފައި މަތިންދާބޯޓު އިތުރު ކުރުމަށް އަންނަނީ ވިސްނަމުންނެވެ.

"އެންމެ ޑިމާންޑު ބޮޑީ އާބާދީ ގިނަ ރަށްތަކަށް. އައްޑޫ، ގދ. އަދި ގއ. ފަދަ ރަށްތަކަށް ދަތުރުކުރާ ފްލައިޓްތައް ގާތްގަނޑަކަށް ފުލް ވެފައި ހުރީ،" ނަޝާތު ވިދާޅުވި އެވެ.

އޭނާ ވިދާޅުވީ ފުވައްމުލައް ފަދަ މީހުން މަދުން ދަތުރު ކުރާ ސަރަހައްދުތަކުގެ ފްލައިޓްތަކަށް ވެސް ވަރަށް ބާރު ބޮޑުކަމަށެވެ. ނަމަވެސް، އެކި މަންޒިލްތަކަށް އަދި ވެސް ޖާގަ އެބައޮތް ކަމަށް ނަޝާތު ވިދާޅުވި އެވެ.

އޭނާ ވިދާޅުވި ގޮތުގައި އީދު ބަންދާ ދިމާކޮށް ހާއްސަ ފެއާ އަގުތަކެއް ކަނޑައެއް ނާޅަ އެވެ. އެގޮތުން، ޓިކެޓުގެ އަގު ހުންނާނީ މިއަހަރު ފެށުނު އިރު އެ އެއާލައިނުން ކަނޑައާޅާފައި ވާ އަގުތަކުގައި ކަމަށް ނަޝާތު ވިދާޅުވި އެވެ.