ރޮހިންޖާ ފަންޑަށް ދިހަ ގަޑިއިރުން މިލިޔަނަކަށް ވުރެ ގިނަ ރުފިޔާ!

ރޮހިންޖާގެ ހާލުގައި ޖެހިފައިވާ މުސްލިމުންނަށް އެހީވުމަށް، ރާއްޖެ ޓީވީން އިސް ނަގައިގެން ހުޅުވި ފަންޑަށް، ދިހަ ގަޑިއިރުގެ ތެރޭގައި މިލިޔަނަކަށް ވުރެ ގިނަ ރުފިޔާ ލިބިއްޖެ އެވެ.

ރާއްޖެ ޓީވީގެ ސީއޯއޯ ހުސައިން ފިޔާޒު މޫސާ މިއަދު ވިދާޅުވީ އިއްޔެ މެންދުރު ފަހު 2:40 އިން ރޭ ދަންވަރު 12 ޖެހުމާ ހަމައަށް، ފަންޑަށް ހަމައެކަނި މާލޭން މިލިޔަނަކަށް ވުރެ ގިނަ ރުފިޔާ ލިބިފައިވާ ކަމަށެވެ. އޭގެ ތެރޭގައި ނަގުދު ފައިސާ އާއި އެކަމަށް ހުޅުވާފައިވާ އެކައުންޓަށް ޖަމާކުރި ފައިސާ ހިމެނެ އެވެ.

މިއީ ރާއްޖޭގެ ބައެއް ރަށްރަށުގައި ބެހެއްޓި ފަންޑު ފޮއްޓާއި، އެސްއެމްއެސް ކޮށްގެން ލިބިފައިވާ ފައިސާ ނުހިމަނައި ލިބިފައިވާ އަދަދެވެ.

ރާއްޖެ ޓީވީއާ ގުޅިގެން ހަ ރަށެއްގައި ފަންޑު ފޮށި ބަހައްޓާފައި ހުރި އިރު މިއަދު އިތުރު ރަށްރަށުގައި ފަންޑު ފޮށި ބެހެއްޓުމަށް ވަނީ ނިންމާފަ އެވެ.

ފިޔާޒު ވިދާޅުވީ ފެރީ ޓާމިނަލްތަކާއި އޮލިމްޕަސް ފަދަ މީހުން ގިނައިން އެއްވެ އުޅޭ ތަންތަނުގައި މޮބައިލް ފަންޑު ފޮށިތައް ބެހެއްޓި އިރު، އެ ސްޓޭޝަނުގައި ވެސް ފަންޑު ފޮއްޓެއް ބަހައްޓާފައިވާ ކަމަށެވެ. އަދި ރާއްޖެ ޓީވީއާ ގުޅިގެން ރެސްޓޯރަންޓް ފަދަ ތަންތަނުގައި ވެސް ފޮންޑު ފޮށި ބަހައްޓާފައިވާ ކަން އޭނާ ފާހަގަ ކުރެއްވި އެވެ.

ރޮހިންޔާ ފަންޑަށް މާލޭން މިލިޔަނަކަށް ވުރެ ގިނަ ރުފިޔާ ލިބުނު އިރު، ރަށްރަށުގައި ބަހައްޓާފައިވާ ފަންޑު ފޮށިތަކަށް ވެސް ގިނަ އަދަދެއްގެ ފައިސާ ލިބިފައިވެ އެވެ.

އެގޮތުން ލ. ގަމުގައި ބެހެއްޓި ފޮއްޓަށް އިއްޔެ ބައި ލައްކަ އަށް ވުރެ ގިނަ ރުފިޔާ ލިބިފައިވާ އިރު ބ. ކަމަދޫގައި ބަހައްޓާފައިވާ ފޮއްޓަށް ވެސް 45،000 އަށް ވުރެ ގިނަ ރުފިޔާ ލިބިފައިވާ ކަމަށް ފިޔާޒު ވިދާޅުވި އެވެ.

"މިއީ އަޅުގަނޑުމެން އެއްވެސް ވަރަކަށް އުއްމީދު ކުރި ވަރެއް ނޫން. ރާއްޖެ ޓީވީއާ ގުޅިގެން ރަށްރަށުގެ ކައުންސިލްތަކުން ފަންޑުފޮށި ބެހެއްޓި ނަމަވެސް މިއީ ހަމަ ރައްޔިތުންގެ ދީލަތިކަން،" އޭނާ ވިދާޅުވި އެވެ.

ފިޔާޒު ވިދާޅުވީ ބައެއް މީހުން ފަންޑު ފޮށިތަކަށް ލައްކަ އިން ފައިސާ ހަދިޔާ ކުރި އިރު، ޖަމިއްޔާތަކާއި ކުންފުނިތަކުން ވެސް ގިނަ އަދަދެއްގެ ފައިސާ ހަދިޔާ ކޮށްފައިވާ ކަމަށެވެ.

ގިނަ ބައެއްގެ އެދުމުގެ މަތިން، ރާއްޖެ ޓީވީން ވަނީ ފަންޑު ފޮށި ހުޅުވާފައި ބަހައްޓާ ވަގުތު މިރެއާ ހަމަ އަށް އިތުރުކޮށްފަ އެވެ. ކުރިން އޮތީ މިއަދު މެންދުރު 2:30 ގައި އެ ހަރަކާތް ނިންމާލާ ގޮތަށެވެ.

ރޮހިންޖާގެ މުސްލިމުންނަށް ދޭ މި ފައިސާ އެ މީހުންނަށް ހަވާލުކުރުމަށް ނިންމާފައިވަނީ، ދިވެހި ރައްޔިތުންގެ ނަމުގައި، އެހީ ދޭ ޖަމާއަތެއް މެދުވެރިކޮށެވެ.

ފިޔާޒު ވިދާޅުވީ ފަންޑު ފޮށިތަކަށް ލިބޭ މި ފައިސާގެ ތަފްސީލު އާއްމު ކުރާނެ ކަމަށާއި ވީހާ ވެސް ހާމަކަން ބޮޑު ގޮތެއްގައި އެކަން ކުރުމަށް އެ މަަސައްކަތް އޮޑިޓް ފާމަކާ ހަވާލު ކޮށްފައިވާ ކަމަށެވެ.

ރޮހިންޖާގެ މުސްލިމުންނަށް އެހީވުމަށް ސަރުކާރުން އިސް ނަގައިގެން ވެސް ހަރަކާތްތަކެއް ހިންގުމަށް ވަނީ ނިންމާފަ އެވެ.

މި ހަރަކާތްތައް ގެންދަން ސަރުކާރުން ހާއްސަ ކޮމެޓީއެއް އެކުލަވާލާފައިވާއިރު، މި މަހުގެ 21-23 އަށް މީޑިއާތައް ގުޅިގެން ޓެލެތޯންއެއް ވެސް ކުރިއަށް ގެންދާނެ އެވެ. މިއަންމާގައި މުސްލިމުންނާ ދެކޮޅަށް ހިންގާ ލާއިންސާނީ އަމަލުތައް އިތުރު ވެފައި ވާއިރު އެތައް ސަތޭކަ ބަޔަކު ކަތިލައި އެ މީހުންގެ ގެދޮރުގައި ދަނީ ހުޅުޖަހަމުންނެވެ. އަނިޔާވެރި އަމަލުތަކާ ހެދި އެތައް ހާސް ބަޔަކު ދަނީ ބަންގްލަދޭޝް އަށް ހިޖުރަ ވެސް ކުރަމުންނެވެ. ނަމަވެސް މި މީހުންނަށް އެހީވުމުގައި ގައުމުތަކުގެ ވެރިންނާއި ޖަމާއަތްތައް ފަސްޖެހިފައި ވާތީ ވަރަށް ބޮޑަށް ފާޑުކިޔުންތައް ވަނީ އަމާޒުވެފަ އެވެ.