ހިއްސާއަކަށް 20ރ. ބަހަން ބީއެމްއެލް އިން ފާސްކޮށްފި

ބޭންކް އޮފް މޯލްޑިވްސް (ބީއެމްއެލް) ގެ މިދިޔަ އަހަރުގެ ފައިދާ އިން ހިއްސާއަކަށް 20 ރުފިޔާ ބަހަން އެ ބޭންކުގެ އަހަރީ އާންމު ޖަލްސާގައި މިރޭ ފާސްކޮށްފި އެވެ،

ހޮޓެލް ޖެން ބޭއްވި ބީއެމްއެލްގެ އަހަރީ އާންމު ޖަލްސާގައި، ހިއްސާދާރުންނަށް ހިއްސާގެ ފައިދާގެ ގޮތުގައި 107.6 މިލިއަން ރުފިޔާ (ހިއްސާއަކަށް 20ރ.) ބަހަން ފާސްކުރުމަކީ އެ ބޭންކްގެ ރެކޯޑެކެވެ.

މިއީ ބީއެމްއެލް އަށް ދިމާވި މާލީ މައްސަލަތަކަށް ފަހު ހިއްސާދާރުންނަށް ފައިދާ ބަހާ ހަތަރު ވަނަ އަހަރެވެ.

ރާއްޖޭގެ އެންމެ ބޮޑު ބޭންކުން މި ފަހަރު ހިއްސާގެ ފައިދާ ބަހަން ނިންމި އަދަދަކީ އޭގެ ކުރީ އަހަރާ އަޅާބަލާއިރު 18 ޕަސެންޓް އިތުރު އަދަދެއް ކަމަށް ވެސް ބީއެމްއެލް އިން ބުންޏެވެ.

ބީއެމްއެލް އިން 2015 ވަނަ އަހަރު ހިއްސާއަކަށް ބަހާފައި ވަނީ 17ރ. އެވެ.

ޗެއާޕާސަން ފަރީހާ ޝަރީފް ރިޔާސަތު ބެލެހެއްޓެވި މިރޭގެ އާންމު ޖަލްސާގައި 41 ހިއްސާދާރަކު ބައިވެރިވި އެވެ. އަދި ޕްރޮކްސީއާ އެެކު އަށް ހިއްސާދާރުން ބައިވެރިވި އެވެ.

މިއީ ބީއެމްއެލްގެ އަހަރީ އާންމު ޖަލްސާގައި ފަރީހާ ބައިވެރިވެވަޑައިގަންނަވާ އެންމެ ފަހު ފަހަރު ކަމަށް ވަނީ ވެފަ އެވެ. އޭނާގެ އިތުރުން މިރޭގެ ޖަލްސާއަށް ފަހު ބޯޑުގެ ދެ މެމްބަރަކު ވަކިވެވަޑައިގަންނަވަ އެވެ.

މިރޭގެ ޖަލްސާގައި ބީއެމްއެލްގެ ބޯޑަށް އާއްމު ހިއްސާދާރުންގެ ފަރާތުން ތިން ޑިރެކްޓަރަކު ވަނީ ހޮވައިފަ އެވެ.

ބީއެމްއެލްއިން އާއްމުކުރި މިދިޔަ އަހަރުގެ މާލީ ރިޕޯޓްގައިވާ ގޮތުން ޓެކްސް އަށް ކެނޑުމަށް ފަހު 1.02 ބިލިއަން ރުފިޔާ ސާފު ފައިދާގެ ގޮތުގައި ލިބިފައިވެ އެވެ. އެ ބޭންކަށް މިދިޔަ އަހަރު ޖުމްލަ އާމްދަނީގެ ގޮތުގައި 2.1 ބިލިއަން ރުފިޔާ ލިބުނެވެ.

ބީއެމްއެލްގެ ފައިދާ އިން ޓެކްސް އާއި ހިއްސާގެ ފައިދާގެ ގޮތުގައި 340.4 މިލިއަން ރުފިޔާ ދައުލަތަށް މިދިޔަ އަހަރު ދައްކާފައިވެ އެވެ.

ބީއެމްއެލް މިދިޔަ އަހަރުގެ އޮޑިޓް ކޮށްފައިވާ މާލީ ބަޔާނާއި އަހަރީ ރިޕޯޓް އާއްމުކުރުމަށް ފަހު ނެރުނު ނޫސްބަޔާނެއްގައި ހާމަކުރި ހިސާބުތައް ދައްކާ ގޮތުން، މެދުނުކެނޑި ފާއިތުވި އަހަރުތަކުގައި ބޭންކުން ހޯދަމުން އަންނަ މާލީ ކުރިއެރުމަށް މިދިޔަ އަހަރު އިތުރު ހަލުވި ކަމެއް ވަނީ އައިސްފަ އެވެ. އެގޮތުން ޓެކްސް އަށް ކެނޑުމަށް ފަހު 61 ޕަސެންޓްގެ ކުރިއެރުމަކާއެކު 1.02 ބިލިއަން ރުފިޔާގެ ފައިދާއެއް ލިބި، ވިޔަފާރީގެ މައިގަނޑު ހުރިހާ ދާއިރާއަކުން ވެސް ހަރުދަނާ ކުރިއެރުންތަކެއް ހޯދާފައިވާކަން ފާހަގަކޮށްފައިވެ އެވެ.