ހުޅުމާލޭ ދުވާ ޓްރެކްގެ މަސައްކަތް ހަވާލުކުރީ މާލިއްޔަތު ގަވާއިދާ ޚިލާފަށް: އޮޑިޓް ރިޕޯޓް

ހުޅުމާލޭގައި އަޅާފައިވާ ސިންތެޓިކް ދުވާ ޓްރެކްގެ މަސައްކަތް ބޭރު ކުންފުންޏަކާ ހަވާލުކުރީ މާލިއްޔަތު ގަވާއިދާ ޚިލާފަށް ކަމަށް ޔޫތު މިނިސްޓްރީގެ އޮޑިޓް ރިޕޯޓުގައި ބުނެފި އެވެ.

އޮޑިޓާ ޖެނެރަލް ހަސަން ޒިޔަތު ނެރުއްވާފައިވާ ޔޫތު މިނިސްޓްރީގެ މިދިޔަ އަހަރުގެ އަހަރީ ރިޕޯޓްގައިވާ ގޮތުން މޯލްޑިވްސް އެއާޕޯޓްސް ކޮޮމްޕެނީ( އެމްއޭސީއެލް) މެދުވެރިކޮށް 14 މިލިއަން ރުފިޔާ އަށް އެ ޓްރެކްގެ މަސައްކަތް ޗައިނާގެ ކުންފުންޏަކާ ހަވާލުކުރީ ޓެންޑާ ބޯޑަށް ހުށަހެޅުމެއް ނެތި އަދި ކެބިނެޓްގެ އިގްތިސާދީ ކޮމެޓީ އަށް ވެސް ހުށަހެޅުމެއް ނެތި އެވެ.

އެ ޓްރެކްގެ މަސައްކަތް ހަވާލު ކުރިއިރު މާލިއްޔަތު ގަވާއިދު އޮތްގޮތުން ޓެންޑާ ބޯޑަށް ހުށަހެޅުމެއް ނެތި މަޝްރޫއުތައް ހަވާލު ކުރެވޭނީ ކެބިނެޓްގެ އިގްތިސާދީ ކޮމެޓީ އަށް ހުށަހަޅައި، އެ ކޮމެޓީގެ ހުއްދަ ލިބިގެންނެވެ. އެކަމަކު މިހާރު އޮންނަނީ ކެބިނެޓްގެ ލަފާގެ މަތިން ރައީސުލް ޖުމްހޫރިއްޔާ ކަނޑައަޅާ ފަރާތްތަކަށް ބޮޑެތި މަޝްރޫއުތައް ހަވާލު ކުރެވޭ ގޮތަށް ގަވާއިދު ބަދަލުކޮށްފަ އެވެ.

އެ ރިޕޯޓުގައިވާ ގޮތުން އެމްއޭސީއެލް އަކީ އެ މަޝްރޫއުގައި މެދުވެރިއެއްގެ ރޯލު އަދާކޮށްފައިވާ ފަރާތަކަށް ވާއިރު އެމްއޭސީއެލް އާއި ސަރުކާރާ ދެމެދު އެމްއޯޔޫއެއްގައި ސޮއިކޮށްފައި އޮތަސް މާލިއްޔަތު ގަވާއިދުގައިވާ ގޮތަށް ދެ ފަރާތުގެ ދެމެދުގައި އެއްބަސްވުމެއް ނެތް ކަމަށެވެ. އެހެންވެ، އެމްއޭސީއެލްގެ ހައްގުތަކާއި މަސްއޫލިއްޔަތުތަކަކީ ކޮބައިކަމާއި ފަހުން ލިބިދާނެ ގެއްލުމެއް ކުޑަ ކުރެވޭނެ ގޮތްތައް ބަޔާން ކުރެވިފައި ނެތް ކަމަށް އެ ރިޕޯޓުގައިވެ އެވެ.

ދެ ފަރާތުގެ ދެމެދުގައި އޮތް އެމްއޫޔޯގައި މަސައްކަތް ނިންމިކަމުގެ ލިޔުން ކަމަށާއި 120 ދުވަސް ތެރޭގައި މަސައްކަތް ނިންމަންޖެހޭނެ ކަމަށް ބަޔާންކޮށްފައި އޮތަސް މަސައްކަތް ނިންމި ދުވަސް އެނގެން ނެތުމުން، މުއްދަތުގެ ތެރޭގައި މަސައްކަތް ނިންމިކަން ކަށަވަރު ވެފައި ނުވާ ކަމަށް ރިޕޯޓުގައި ބުނެފައިވެ އެވެ.

މީގެ އިތުރުން ޔޫތު މިނިސްޓްރީގެ އެހެން ބައެއް މައްސަލަތައް ވެސް އެ ރިޕޯޓުގައި ފާހަގަކޮށްފައިވެ އެވެ. އެގޮތުން ސްވިމިން އެސޯސިއޭޝަން މެދުވެރިކޮށް ގދ. ތިނަދޫގައި ސްވިމިން ޕްލެޓް ފޯމެއް އެޅުމަށް 2.2 މިލިއަން ރުފިޔާ އެ އެސޯސިއޭޝަނަށް ދިނަސް އެ މަސައްކަތް ހަވާލު ކޮށްފައިވަނީ މާލިއްޔަތު ގަވާއިދާ ޚިލާފަށް ކަމަށް ރިޕޯޓުގައިވެ އެވެ. ސަބަބަކީ އެ މަޝްރޫއު ޓެންޑާ ބޯޑަށް ހުށަހަޅާފައި ނެތުމާއި ކެބިނެޓްގެ އިގްތިސާދީ ކޮމެޓީގެ ހުއްދަ ނެތި އެ މަޝްރޫއުގެ މަސައްކަތް ބަޔަކާ ހަވާލުކޮށްފައި އޮތުމެވެ.

ޔޫތު އެކްސްޗޭން ޕްރޮގްރާމަށް އިންޑިއާ އިން ރާއްޖެ އައި 50 މެމްބަރުންގެ ޓީމުގެ ހުރުމާއި ކެއުމުގެ އިންތިޒާމް 750،000ރ. އަށް އަމިއްލަ ބަޔަކަށް ދިނީ އާންމުކޮށް، އިއުލާނެއް ކުރުމެއް ނެތި ކަމަށް އެ ރިޕޯޓުގައިވެ އެވެ. އަދި އެ ފަރާތުން އެ ޓީމަށް ހަމަޖެއްސި ކެއުމާއި ހުރުމުގެ އިންތިޒާމާ މެދު އެ ޓީމުން ޝަކުވާ ކުރުމުން އެހެން ފަރާތެއް މެދުވެރިކޮށް އެ ޚިދުމަތްތައް ހޯދަން ޖެހި 840،000ރ. އަށް ވުރެ ގިނަ ރުފިޔާ އިތުރަށް ޚަރަދު ކުރަން ޖެހުނު ކަމަށް އެ ރިޕޯޓުގައިވެ އެވެ.

ޔޫތު މިނިސްޓްރީގެ ދަށުން ހިންގާ ނޭޝަނަލް ސެންޓަ ފޯ ދި އާޓްސް (އެންސީއޭ) އިން މާލިއްޔަތު ގަވާއިދާ ޚިލާފަށް ފައިސާ ޚަރަދު ކޮށްފައި އޮތުމާއި މިނިސްޓްރީގެ ހަރު މުދަލުގެ ރެކޯޑް ރަނގަޅަށް ބަލަހައްޓާފައި ނެތުމުން އެތަނުގެ ހަރު މުދަލުގެ ގޮތުގައި ހުރި ކަމަށް ބަޔާންކުރާ 321 މިލިއަން ރުފިޔާގެ ތަކެތީގެ ސައްހަކަން ކަށަވަރު ނުކުރެވޭ މައްސަލަ ވެސް އެ ރިޕޯޓުގައި ފާހަގަކޮށްފައި ވެއެވެ.