މަރުވާ މީހުންނަށް ހާއްސަ ހޮޓަލަށް ޖަޕާނުގައި ޑިމާންޑް ބޮޑު

ޖަނާޒާގެ ކަންތައްތައް ނިމެންދެން ގަބުރުތައް ބަހައްޓައިދޭ ހޮޓާތަކުގެ ޑިމާންޑް ޖަޕާންގައި ވަރަށް ބޮޑަށް އިތުރު ވެއްޖެ އެވެ.

އުމުރުން ދުވަސްވީ މީހުން ޖަޕާނުގައި އިތުރުވަރުން އަންނައިރު މަރުވާ މީހުންގެ އަދަދުވެސް ވަނީ ވަރަށް ބޮޑަށް އިތުރުވެފަ އެވެ. އެހެންކަމުން ޖަޕާންގެ ސިޓީތަކުގައި މިހާރު މިކަހަލަ ހޮޓާތަކަށް ލިބޭ ތަރުހީބު ވަރަށް ބޮޑެވެ.

އަލްޖަޒީރާ ރިޕޯޓެއް ބުނާ ގޮތުން ޖަޕާނުގައި މަރުވާ މީހުންގެ ތެރެއިން 99 ޕަސެންޓް މީހުންގެ ހަށިގަނޑު އަނދާލަނީ އެވެ. ވަޅުލަނީ އެންމެ އެއް ޕަސެންޓް މީހުންނެވެ. އަދި މަރުވާ މީހުން އެންމެ ގިނައިން އަންދާ ގައުމަކީ ވެސް ޖަޕާނެވެ. އެހެންކަމުން ގަބުރު އަންދާލަން ތައްޔާރުކޮށްފައިވާ ތަންތަނަށް އޮންނަ ޑިމާންޑް ބޮޑުވެ އެފަދަ ތަނެއްގެ އިންތިޒާރުގައި މަރުވާ މީހުންގެ އާއިލާތައް ގިނަ ދުވަސްތަކަކު ތިބެން ޖެހެ އެވެ.

މިފަދަ އެއް ތަނަކީ އޮސާކާގައި ހުންނަ ހޮޓެލް ރިލޭޝަން އެވެ. މި ހޮޓަލުގެ ކޮޓަރިތައް ތައްޔާރުކޮށްފައި ހުންނަނީ ގަބުރުތައް ކުނި ނުވާނެހެން ބެހެއްޓޭ ފަދަ ގޮތަކަށެވެ. ސަންދޯއް ބަހައްޓާފައި ހުންނަ ކޮޓަރިއާ ޖެހިގެން ހުންނަނީ މަރުވެފައިވާ މީހާގެ އާއިލާގެ މީހުން ތިބޭ ކޮޓަރި އެވެ. ޓްވިން ބެޑްގެ ދެ އެނދު ހުންނަ މި ކޮޓަރީގައި ހަތަރު މީހަކަށް ނިދޭ ގޮތަށް ތައްޔާރުކޮށްފައިވެ އެވެ. އަދި ޓީވީއެއް ވެސް ހުރެ އެވެ.

މަރުވާ މީހާ އަންދާލެވޭނެ ގޮތް ހަމަޖެހެންދެން ތިމާގެ މީހުން ސަންދޯކާ އެކު މި ހޮޓަލުގައި ހޭދަ ކުރެ އެވެ. ބައެއް ފަހަރަށް ދެތިން ދުވަހު ވެސް އެގޮތަށް ތިބެން ޖެހެ އެވެ.

"ގަބުރު އަންދާތަންތަން އިމާރާތްކުރަން ޖެހޭ. ނަމަވެސް އެފަދަ ތަންތަން ހަދާނެ އެކަށީގެންވާ ޖާގައެއް ނެތް. އެކަމުގެ ސަބަބުން މިހާރު މީހުން ވަޅުލަން އަންނަ މީހުން ވެސް ރެފިއުޖީންނަށް ވާން މެދުވެރިވޭ،" 2014 ގައި ފުރަތަމަ ފަހަރަށް ގަބުރު ހޮޓަލެއް ތައްޔާރުކޮށް ހުޅުވި ހިސާއޯ ޓަކެގީޝީ ދަ ޓެލެގްރާފަށް ބުނެފައި ވެ އެވެ.

މި ރިޕޯޓުގައިވާ ގޮތުން މިފަދަ ގަބުރު ހޮޓާތަކުގެ ޑިމާންޑް ކުރިޔަށް އޮތް ތަނުގައި ވެސް ވަރަށް ބޮޑަށް އިތުރުވެގެން ދާނެ އެވެ. ސަބަބަކީ މިދިޔަ އަހަރު އެކަނިވެސް ޖަޕާނުގައި 1.3 މިލިއަން މީހުން މަރުވެފައިވާތީ އެވެ. މިއީ މީގެ 15 ވަރަކަށް އަހަރު ކުރިޔަށް ވުރެ 35 ޕަސެންޓް މަތީ އަދަދެކެވެ. އަދި 2040 އާ ހަމައަށް ދާއިރު، އަހަރަކު މަރުވާ މީހުންގެ އަދަދު 1.4 މިލިއަނަށް އަރާނެ ކަމަށް ލަފާ ކުރެވެ އެވެ.

ވިޔަފާރީގެ ގޮތުން ބަލާއިރުވެސް ގަބުރު ހޮޓާތަކަކީ ވަރަށް ފައިދާހުރި އަދި މީހުން ހިތްހަމަޖެހޭ ތަންތަނަށް ވެ އެވެ. ޖަޕާންގެ ކޮންސިއުމާ އެސޯސިއޭޝަނުން ބުނާ ގޮތުގައި ޖަޕާނުގައި އެވްރެޖްކޮށް މީހެއްގެ ޖަނާޒާގެ ހުރިހާ ކަމަކަށް 1.95 މިލިއަން ޔެން (17،690 ޑޮލަރު) ޚަރަދުވެ އެވެ. އަދި ހޮޓެލް ރިލޭޝަަން ކަހަލަ އެންމެ އަގުހެޔޮ ހޮޓަލަކަށް ވެސް 185،000 ޖަޕާން ޔެން (1،768 ޑޮލަރު) ޚަރަދުވެ އެވެ.