އައިއެސްގެ ބާރުގެ ދަށުގައިވާ އަވަށަކަށް ކްލަސްޓާ ބޮން އަޅައިފި

ދިމިޝްގު (ޖޫން 28) - ސީރިއާގެ އިރުމަތީގައި އިސްލާމިކް ސްޓޭޓް (އައިއެސް) ގެ ބާރުގެ ދަށުގައިވާ އަވަށަކަށް ކްލަސްޓާ ބޮން އެޅުމުގެ ސަބަބުން އާއްމުންގެ 15 މީހުން މަރުވެފައިވާ ކަމަށް އެކްޓިވިސްޓުން ބުނެފި އެވެ.

މަޔާދިން ޓައުނުގެ އިރު ދެކުން 13 މޭލު ދުރުގައި އޮންނަ ދަބްލާން އަވަށަށް ކްލަސްޓާ ބޮން އެޅީ ކޮން ބައެއް ކަމެއް ނޭނގެ އެވެ. ކްލަސްޓާ ބޮމުގެ ހަމަލާދީފައި މި ވަނީ މަޔާދިންއާ ކައިރީގައިވާ އަވަށެއްގައި ހުންނަ އައިއެސްގެ ޖަލަކަށް އެމެރިކާ އިން ވައިގެ ހަމަލާދީ 42 މީހުން މަރާލިތާ ދެ ދުވަސް ފަހުންނެވެ.

އެމެރިކާގެ އިންޓެލިޖެންސް އިން ބުނީ އައިއެސްގެ އިސް ލީޑަރުން ދާދި ފަހުން ވަނީ މަޔާދިން ޓައުން އަށް ބަދަލުވާން ފަށައިފަ އެވެ. އެއީ މޫސަލް ހިފުމުގެ އޮޕަރޭޝަން އިރާގު ސިފައިން ވަރުގަދަކޮށްފައިވާ އިރު ސީރިއާގެ ރައްގާ ހިފުމުގެ މަސައްކަތް އަރަބި ހަނގުރާމަވެރިން ވަރުގަދަކޮށްފައިވާތީ އެވެ.

ކޯލީޝަނުން ބުނެފައި ވަނީ 2014 ވަނަ އަހަރުން ފެށިގެން އިރާގާއި ސީރިއާ އަށް 21،035 ވައިގެ ހަމަލާދީފައިވާ ކަމަށެވެ.