ކާރިސާގެ ހާލަތުގައި ބޭނުންކުރާ ސާމާނުތަކެއް އެމްއެންޑީއެފާ ހަވާލުކޮށްފި

ކާރިސާގެ ހާލަތްތަކުގައި ބޭނުންކުރާ ގިނަ އަދަދެއްގެ ސާމާނު މޯލްޑިވްސް ނެޝަނަލް ޑިޒާސްޓާ މެނޭޖްމަންޓް ސެންޓަރު (އެމްއެންޑީއެމްސީ) އިން އެމްއެންޑީއެފާ މިއަދު ހަވާލުކޮށްފި އެވެ.

ކަޅުތުއްކަލާކޮށީގައި ބޭއްވި ޚާއްސަ ރަސްމިއްޔާތެއްގައި އެ ތަކެތި އެމްއެންޑީއެފާ ހަވާލުކޮށްދެއްވީ، ޑިޒާސްޓަ މެނޭޖްމަންޓް ސެންޓަރު ހިންގުމާ ހަވާލުވެ ހުންނެވި، ޑިފެންސް މިނިސްޓްރީގެ ޑެޕިއުޓީ މިނިސްޓަރު ފާތިމަތު ތަސްނީމް އެވެ. އެމްއެންޑީއެފްގެ އިން އެ ތަކެއްޗާ ހަވާލުވެވަޑައިގަތީ ފަޔާ އެންޑް ރެސްކިއު ސަވިސްގެ ކޮމާންޑިން އޮފިސަރު އަބްދުﷲ ޒުހުރީ އެވެ.

ނެޝަނަލް ޑިޒާސްޓަ ސެންޓަރުން އެމްއެންޑީއެފާ ހަވާލުކުރީ އަލިފާން ނިއްވާ 70 ޕަންޕް ސެޓާއި ހަތަރު ފޯކްލިފްޓް ކަމަށް އެމްއެންޑީއެފުން ބުންޏެވެ.

އެމްއެންޑީއެފުން ބުނިގޮތުގައި އެއީ ރާއްޖެ އަށް ދިމާވެދާނެ ކާރިސާތަކުން ރައްކާތެރިވުމަށްޓަކައި، ކާރިސާތަކަށް އިޖާބަ ދިނުމުގެ ގާބިލިއްޔަތުކަން އިތުރުކޮށްދިނުމުގެ ގޮތުން ޖަޕާން ސަރުކާރުގެ ނޮން ޕްރޮޖެކްޓް ގްރާންޓް އެއިޑްގެ ދަށުން ރާއްޖެ އަށް ހަދިޔާ ކުރި ސާމާނުތަކެކެވެ.

ދެ ފިޔަވައްސަކަށް ބަހާލައިގެން ކުރިއަށް ގެންދާ މި ޕްރޮޖެކްޓްގެ ދަށުން މިއަދު އެމްއެންޑީއެފާ ހަވާލުކުރީ ފުރަތަމަ ފިޔަވަހީގެ ފުރަތަަމަ ޝިޕްމަންޓާއި ދެވަނަ ޝިޕްމަންޓުގެ ދަށުން ލިބިފައިވާ ތަކެތި ކަމަށް އެމްއެންޑީއެފުން ބުނެ އެވެ. މި ޕްރޮޖެކްޓްގެ ޖުމުލަ އަގު ގާތްގަނޑަކަށް 9.9 މިލިއަން ޑޮލަރަށް އަރަ އެވެ.

މިއަދުގެ ރަސްމިއްޔާތުގައި ޑިފެންސް މިނިސްޓަރު އާދަމް ޝަރީފާއި ރާއްޖެ އަށް ޖަޕާނުން ކަނޑައަޅާފައި ހުންނަވާ ސަފީރު ކަޒުމީ އެންޑޯ އާއި ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަހުމަދު ޝާހިދު ބައިވެރިވެވަޑައިގަތެވެ.