ތުރުކީން 15 މަތިންދާ ބޯޓުގެ ކާނާ ގަތަރަށް ފޮނުވައިފި

އަންކާރާ (ޖޫން 12) - ގަލްފުގެ ބައެއް ގައުމުތަކުން ގަތަރާ ގުޅުން ކަނޑާލި ފަހުން 15 މަތިންދާ ބޯޓުގެ ކާބޯތަކެތި ތުރުކީން ދޯހާ އަށް ފޮނުވައިފި އެވެ.

ތުރުކީން ގަތަރަށް ފުރަތަމަ ފޮނުވި ޝިޕްމަންޓުގައި ހިމެނެނީ ކިރާއި ކިރުގެ ބާވަތްތަކެވެ. އޭގެ އިތުރުން ތަރުކާރީ އާއި މޭވާ އަދި އެއްގަމު މަހުގެ ބާވަތްތައް ވެސް ވަނީ ފޮނުވައިފަ އެވެ. ސައުދީ އަރަބިއާ، ބަހުރޭން އަދި ޔޫއޭއީ ފަދަ ގައުމުތަކުން ގަތަރާ ސިޔާސީ ގުޅުން ކަނޑާލިތާ ފުރަތަމަ ފަސް ދުވަހު ވެސް ތުރުކީން ވަނީ ފަސް މިލިއަން ޓާކިޝް ލީރާގެ ތަކެތި ގަތަރަށް ފޮނުވައިފަ އެވެ. މުދާ އުފާލާފައި ވަނީ ޓާކިޝް އެއާލައިންސްގެ އޭ330 ގެ ކާގޯ މަތިންދާ ބޯޓު ފަހަރުގަ އެވެ. ކޮންމެ ބޯޓެއްގައި 65 ޓަނުގެ ކާނާ ގަތަރަށް ގެންދާ ކަމަށްވެ އެވެ.

ގަލްފުގެ ބައެއް ގައުމުތަކުން ގަތަރާ ގުޅުން ކަނޑާލި ނަމަވެސް ތުރުކީގެ ރައީސް ރަޖަބް ތައްޔިބު އުރުދުޣާން ވަނީ ގަތަރު އެކަހެރި ނުކުރާނެ ކަމަށާއި އެ ގައުމަށް އެހީވާނެ ކަމަށް ވިދާޅުވެފަ އެވެ.

ސިޔާސީ ގުޅުން ކަނޑާލުމަށް ފަހު ސައުދީ އަރަބިއާ، ޔޫއޭއީ އަދި ބަހުރޭނުން ވަނީ އެ ގައުމުތަކުގެ ވައިގެ ސަރަހައްދު ގަތަރު އެއާވޭސްގެ ބޯޓުތަކަށް ބަންދުކޮށްފަ އެވެ. އަދި ސައުދީ އަރަބިއާގެ އެއްގަމު ބޯޑަރު ވަނީ ގަތަރަށް ބަންދުކޮށްފަ އެވެ. ގަތަރަށް އިމްޕޯޓްކުރާ ކާނާގެ 40 ޕަސެންޓް އެތެރެ ކުރަނީ އެއްގަމު މަގުން ސައުދީންނެވެ.

ތުރުކީގެ އިތުރުން އީރާނުން ވެސް ވަނީ ގަތަރަށް ފަސް މަތިންދާ ބޯޓުގެ ކާބޯތަކެތި ފޮނުވައިފަ އެވެ. ކޮންމެ ބޯޓެއްގައި 90 ޓަނުގެ މުދާ ހިމެނެ އެވެ. މީގެ އިތުރުން އީރާނުން ވަނީ ކަނޑު މަގުން ގަތަރަށް ގެންދިއުމަށް ތިން ބޯޓަކަށް 350 ޓަނުގެ މުދާ ބަރުކޮށްފަ އެވެ.