އަގު ބޮޑު، އެކަމަކު ރެސްޓޯރަންޓުތައް ފުރި ބާރު ވެފައި

ރޯދަމަސް ކައިރިވާ ވަރަކަށް އެންމެ ގިނަ މީހުން ކުރާ އެއް ކަމަކީ ރޯދަ ވީއްލަން ދާނެ ތަނެއް ހޯދުމެވެ. ގޭގައި ރޯދަ ވީއްލުމުގެ ބަދަލުގައި މާހައުލު ބަދަލުކޮށް ލެވޭނެ ގޮތެއް ހޯދާށެވެ. ރެސްޓޯރަންޓުތަކުގެ ރޯދަ މެނޫ ހޯދައި، ދާނެ އެންމެ ރަނގަޅު ތަނެއް ކަނޑައަޅަ އެވެ. އެކި މީހުންނަށް ކަމުދަނީ އެކި ތަނެވެ.

އެކަމަކު، އެންމެން ވެސް ބަލާ އެއް ކަމެއް އޮވެ އެވެ؛ މެނޫގެ އަގެވެ. ރޯދަ މެނޫތަކުގެ އަގު އަހަރުން އަހަރަށް މި ދަނީ މަތިވަމުންނެވެ. މިދިޔަ ދެތިން އަހަރެއްގެ ތެރޭގައި އާދަޔާ ހިލާފަށް އަގުތައް އަރައިގެން ގޮސް މިހާރު އުޅެނީ 200ރ. އިން މަތީގަ އެވެ. އެއީ ވެސް މަދު ތަނެއްގަ އެވެ. ގިނަ ރެސްޓޯރަންޓުތަކުގެ އަގުތައް މި ފަހަރު ހުރީ އެވްރެޖުކޮށް 250ރ. ގަ އެވެ. މިހެންވެ، ރެސްޓޯރަންޓުތަކުގެ ވިޔަފާރި މި ފަހަރު ދަށަށް ހިނގައިދާނެ ކަމަށް އޮތީ ބެލެވިފަ އެވެ.

ގިނަ ޒުވާނުންގެ މެދުގައި މަގުބޫލް ސީހައުސް އަށް ލިބޭ ތަރުހީބު ވެސް ވަރަށް ބޮޑެވެ. މާލޭގައި ހުރި ސީހައުސްގެ ދެ ރެސްޓޯރަންޓާއި އައްޑޫގައި ހުންނަ ތަނަށް ވެސް މީހުން އޮންނަނީ ފުރި ބާރުވެފަ އެވެ. ހުކުރު ދުވަހެއް ނަމަ ތަރުހީބު މާ ރަނގަޅެވެ.

"މިދިޔަ އަހަރުތަކާ އަޅައިބަލާއިރު އެއްވެސް ވަރަކަށް ދަށެއް ނޫން. ފެށުނީއްސުރެ މިހާތަނަށް އައިރު ވެސް ތަރުހީބު ވަރަށް ރަނގަޅު،" ސީހައުސްގެ ސީއީއޯ އިސްމާއިލް ފަސީހް ވިދާޅުވި އެވެ.

"ވަރަށް ގިނަ ބަޔަކަށް ކަމުދޭ އިންޑިއަން ފުޑްސް. އެއީ އެންމެ ބޮޑަށް ފާހަގަ ކުރެވޭ ކަމަކީ."

ޔޫރޯ ފުޓްބޯޅަ މުބާރާތުގެ މެޗުތަކެއް ރޯދަ ވީއްލާ ގަޑީގައި އޮތަސް އެ ކަމުގެ އަސަރު ނުކުރާ ކަމަށް ފަސީހް ވިދާޅުވި އެވެ. އެ ގަޑީގަ އާއި އެ ނޫން ވެސް ހުރިހާ މެޗެއް ސީހައުސް ކެފޭގައި ދައްކާތީ އާއްމުންގެ ފަރާތުން ލިބޭ ތަރުހީބު ކުރިއަށް ވުރެ ވެސް ބޮޑަށް އިތުރުވެފައިވާކަން އޭނާ ފާހަގަކުރެއްވި އެވެ.

މާލޭގައި މިހާރު ހުރި އެންމެ ބޮޑު ރެސްޓޯރަންޓް ކަމަށްވާ ސިޓްރޮން ކޮންމެ ދުވަހަކުން އޮންނަނީ ފުރިފަ އެވެ. ރޯދަ މަސް ފެށިގެން ދެތިން ދުވަހު ކޮންމެވެސް ވަރަކަށް ޖާގަ ލިބުނަސް ކުރިން ބުކިން ނުހަދާ މިހާރު ޖާގައެއް ނުލިބެ އެވެ. ގާތްގަނޑަކަށް 450 މީހުންގެ ޖާގައިގެ މި ރެސްޓޯރަންޓަށް ލިބޭ ތަރުހީބު ވަރަށް ބޮޑެވެ.

"މިދިޔަ އަހަރާ އަޅައިބަލާއިރު ހަމަ ވަރަށް ރަނގަޅު،" ސިޓްރޮން އިން ހިންގާ ލެމަންގްރާސްގެ މާކެޓިން މެނޭޖަރު އަހުމަދު ޝިރުހާން ވިދާޅުވި އެވެ.

ސިޓްރޮންގެ އިތުރުން ލެމަންގްރާސް އިން މާލޭގައި އިތުރު ދެ ރެސްޓޯރަންޓް ހިންގަ އެވެ. އެ ދެ ތަނަށް ލިބޭ ތަރުހީބު ވެސް ވަކި ކުޑައެއް ނޫނެވެ. ގިނަ ދުވަސް ދުވަހު އެ ތަންތަން ވެސް ފުރެ އެވެ.

"މަހުގެ މެދު ތެރެއާ ރޯދަ މަސް ފެށުމާ މި ދިމާވީ. އެހެންވެ، މުސާރަ ލިބުމާ އެކީ ރޯދަ މަހުގެ ފަހުކޮޅު މިހާރަށް ވުރެ ވެސް ރަނގަޅު ވާނެ،" އޭނާ ވިދާޅުވި އެވެ.

ދިވެހިންގެ މެދުގައި އެންމެ މަގުބޫލު އެއް ރެސްޓޯރަންޓަކީ ޝެލްބީންސް ކަމާ މެދު ދެބަސް ވާނެ މީހަކު މަދުވާނެ އެވެ. ރޯދަ ވިއްލާ ގަޑީގައި އެ ރެސްޓޯރަންޓު އޮންނަނީ ކޮންމެ ދުވަހަކު ވެސް ފުރިފަ އެވެ.

ޝެލްބީންސްގެ މާކެޓިން މެނޭޖަރު ހަމީދު ފަރީދު ވިދާޅުވީ މާލޭގައި ހުންނަ ޝެލްބީންސްގެ ގެ ދެ ރެސްޓޯރަންޓަކީ ޖާގަ އެހާ ބޮޑު ތަނަކަށް ނުވުމުގެ ސަބަބުން ކޭޓާ ކުރަން ބޭނުންވާ ވަރަށް ނުކުރެވޭ ކަމަށެވެ. ނަމަވެސް އެ ރެސްޓޯރަންޓުން މި ރޯދަ އަށް ހާއްސަކޮށްގެން ފެށި ޑެލިވަރީ ބޮކްސް ހިދުމަތުގެ ސަބަބުން އެތަނުގެ ވިޔަފާރި ރަނގަޅެވެ.

"ރޯދަ މަސް ވީމަ ދުވާލު ގަޑީގައި ރެސްޓޯރަންޓު ހުޅުވާފައި ނުހުންނާތީ ވިޔަފާރި ދަށް. އެކަމަކު، މިދިޔަ އަހަރުގެ ރޯދައާ އަޅައި ބަލާއިރު މި އަހަރު ވިޔަފާރި ރަނގަޅު" ހަމީދު ވިދާޅުވި އެވެ.

ހަމީދު ވިދާޅުވީ ރޯދަ ވިއްލާ ގަޑިއާ ޔޫރޯ ކަޕުގެ މެޗުތައް ދައްކާ ގަޑިއާ ދިމާވާތީ، ރެސްޓޯރަންޓުގައި މެޗު އަޅުވާފައި ހުންނާނެ ކަމަށެވެ.

އަގުތައް ކިތަންމެ މަތީގައި ހުއްޓަސް ރޯދަ ވީއްލަން ބޭރަށް ދާ މީހުންގެ އަދަދު ވަކި މަދު ވާ ހެންނެއް ހިއެއް ނުވެ އެވެ. ރޯދަ މަސް ދެ ބައިވެފައި ވާއިރު، ރެސްޓޯރަންޓުތަކުގެ ވެރިން ތިބީ އުފަލުންނެވެ. މި ރޯދަ މަހު ވެސް ވިޔަފާރި ހަމަ އެހާ ރަނގަޅީ އެެވެ.