ފުރަތަމަ ކުއާޓާގައި ބީއެމްއެލްއަށް 260 މިލިއަން ރުފިޔާގެ ބޮޑު ފައިދާއެެއް ލިބިއްޖެ

ބޭންކް އޮފް މޯލްޑިވްސް (ބީއެމްއެލް) އަށް މިއަހަރުގެ ފުރަތަމަ ކުއާޓަރުގައި 260 މިލިއަން ރުފިޔާގެ ބޮޑު ފައިދާއެއް ލިބިއްޖެ އެވެ.

ރާއްޖޭގެ އެންމެ ބޮޑު ބޭންކުން މިއަދު ނެރުނު މާލީ ހިސާބުތައް ދައްކާ ގޮތުން މިއަހަރުގެ ފުރަތަމަ ކުއާޓާގައި ލިބުނު މިންވަރު ވަނީ އޭގެ ކުރީ އަހަރުގެ އެ މުއްދަތާ އަޅާބަލާއިރު 23 ޕަސެންޓް އިތުރުވެފަ އެވެ.

އެ ބޭންކުގެ ހިސާބުތައް ދައްކާ ގޮތުން ފުރަތަމަ ކުއާޓާގައި ޖުމްލަ އާމްދަނީގެ ގޮތުގައި 540.9 މިލިއަން ރުފިޔާ ލިބިފައިވެ އެވެ. އޭގެ ތެރެއިން އިންޓަރެސްޓުން ފައިދާގެ ގޮތުގައި ޖުމްލަ 306.6 މިލިއަން ރުފިޔާ ލިބިފައިވެ އެވެ. އަދި ފީ އާއި ކޮމިޝަނުން އާމްދަނީގެ ގޮތުގައި 118.2 މިލިއަން ރުފިޔާ ލިބިފައިވާ ކަމަށް އެ ހިސާބުތަކުން ދައްކަ އެވެ.

ބީއެމްއެލްގެ ހިސާބުތައް ދައްކާ ގޮތުން އަނބުރާ ނުލިބޭނެ ނުވަތަ އުފެއްދުންތެރި ނޫން ލޯނުތަކުގެ މިންވަރު ވަނީ 2.5 މިލިއަން ރުފިޔާއަށް ކުޑަވެފަ އެވެ. އަދި ބޭންކް ފައިދާއިން ޓެކްސްގެ ގޮތުގައި 86.6 މިލިއަން ރުފިޔާ ދައުލަތަށް ދައްކާފައިވާ ކަމަށް އެ ރިޕޯޓުގައި ބުނެފައިވެ އެވެ.

މިދިޔަ ކުއާޓާގައި ހިއްސާގެ ފައިދާއަކަށް 193ރ. ޖެހިފައިވެ އެވެ.

ހަރުދަނާ މާލީ ނަތީޖާއަކާ އެކު ގިނަ ރަށްތަކެއްގައި އިންވެސްޓްކޮށްފައިވާ ކަމަށާއި އަހަރުގެ ފެށުން ވަރުގަދަކަން ބޭނުންކުރުން ފާހަގަކުރި އެވެ.

"‎މިމަހުގެ ތެރޭގައި ބޭންކުން ހާމަކުރި 2016 ވަނަ އަހަރުގެ ހިސާބުތަކަށް ބަލާލާއިރު ބީއެމްއެލްއަށް ޓެކްސްއަށް ކެނޑުމަށްފަހު 1.02 ބިލިއަން ރުފިޔާގެ ރެކޯޑް ފައިދާއެއް ވަނީ ވެފައި. މިކާމިޔާބު ދަމަހައްޓަމުންދާކަން މިއަދު ބޭންކުން ހާމަކުރި ހިސާބުތަކުން ދައްކާ،" އެ ބޭންކުން ބުންޏެވެ.

ބީއެމްއެލް އިން ބުނީ މިއަހަރުގެ ކުއާޓަރުގައި ބޭންކުގެ ވިޔަފާރީގެ މައިގަނޑު ހުރިހާ ދާއިރާއަކުން ވެސް ރަނގަޅު ފައިދާތަކެއް ހޯދާފައިވާއިރު، ލޯނު ދޫކުރެވުނު ނިސްބަތް ފާހަގަކޮށްލެވޭ މިންވަރަކަށް އިތުރުވެފައިވާ ކަމަށެވެ. އަދި ބޭންކުގެ ރައުސުލްމާލާއި ލިކުއިޑިޓީ ރޭޝިއޯ ވަނީ ގާނޫނުން ލާޒިމްކުރާ ވަރަށް ވުރެ ރަނގަޅު މިންވަރެއްގައި ހިފަހެއްޓިފައި ކަމަށް ވެސް އެ ބޭންކުން ބުންޏެވެ.

‎އިންވެސްޓްމަންޓް ޕްރޮގްރާމްގެ ދަށުން ތިން ބްރާންޗާއި ހަތް ސެލްފް ސާވިސް ބޭންކިން ސެންޓަރު އަލަށް ހުޅުވައި ތަފާތު 8 ޖަމިއްޔާއަކަށް ފައިސާގެ އެހީތެރިކަން ފޯރުކޮށްދީ މުޖުތަމައަށް ފައިދާހުރި ހަރަކާތްތައް ފުރަތަމަ ކުއާޓާގައި ބީއެމްއެލްއިން ވަނީ ވަނީ ހިންގައިފަ އެވެ. ބޭންކުން ބުނި ގޮތުގައި މި އަހަރު ކުރިއަށްގެންދާ 300 މިލިއަން ރުފިޔާގެ އިންވެސްޓްމަންޓް ޕްރޮގްރާމްގެ ދަށުން 22 ރަށަކަށް އޭގެ ފައިދާ ލިބި މިމަރުހަލާގެ ތެރޭގައި 150 ވަޒީފާ އުފެދޭނެ އެވެ.

މި ކާމިޔާބާ ބެހޭ ގޮތުން ބޭންކުގެ ސީއީއޯ އެންޑްރޫ ހީލީއާ ހަވާލާދީ ބޭންކުން ބުނީ ކާމިޔާބުކަމާއެކު މިއަހަރު ފެށުނީތީ ވަރަށް ހިތްހަމަޖެހިވަޑަގެންފައިވާ ކަމަށެވެ. އަދި މިއީ ގިނަ މަސައްކަތްތަކެއް ކުރެވުނު ކުއާޓާއެއް ކަމަށާއި މުވަައްޒަފުން އަންނަނީ ފާހަގަކޮށްލެވޭ ފަދަ ހީވާގި މަސައްކަތްތައްކުރަމުން ކަމަށް ވެސް އޭނާ ވިދާޅުވެފައިވެ އެވެ.

"‎ހާއްސަކޮށް، އަޅުގަނޑުމެން ހިދުމަތްދޭ މުޖުތަމައުތަކާ އޮތް ގާތްކަން އިތުރުކޮށް މުޖުތަމައުގެ މުހިންމު ބައިވެރިއެއްގެ ގޮތުގައި މަސައްކަތްތަކެއް ކުރުމަށް ފެބްރުއަރީ މަހުގެ 28 ދުވަހު ހިންގުނު 'އަހަރެންގެ ބޭންކް'ގެ 28 ހަރަކާތް ފާހަގަކޮށްލެވޭ. މިއަހަރުގެ ބާކީ އޮތް ދުވަސްތަކުގައި ވެސް މި ބާރު މިނުގައި މަސައްކަތްތައް ކުރިޔަށް ގެންދިޔުމަށް އަޅުގަނޑުމެން ހާއްސަ ސަމާލުކަމެއް ދޭނަން،" އެންޑްރޫ ވިދާޅުވެފައިވެ އެވެ.

‎މުޅި ރާއްޖެ ހިމެނޭ ބޭންކިން ވިއުގަޔަކާ އެކު 20 އަތޮޅުގައި 34 ބްރާންޗް، 85 އޭޓީއެމް، 4000 ޕީއޯއެސް މާޗަންޓުން، 200 ކޭޝް އޭޖެންޓުން، 27 ސެލްފްސާވިސް ބޭންކިން ސެންޓަރު އަދި ފަސް ދޯނި ބޭންކިން ޔުނިޓުގެ އިތުރުން އެންމެ ޒަމާނީ އޮންލައިން ބޭންކިން ހިދުމަތް އެ ބޭންކުން އަންނަނީ ފޯރުކޮށްދެމުންނެވެ.