ދިއެފްއެމް އަހަރެމެންނަށް އަލްވަދާއު ކިޔައިފި

ބްރޯޑްކާސްޓްކުރުމުގެ ލައިސަންސް ރަސްމީކޮށް ލިބިގެން ރާއްޖޭގައި ޚިދުމަތް ދޭން ފެށި އަމިއްލަ ފުރަތަމަ ރޭޑިއޯ ސްޓޭޝަން، ދިއެފްއެމްގެ ރަޖިސްޓްރީ، އެތަނުން އެދިގެން ބާތިލްކޮށް، ދިވެހިންނަށް އަލްވަދާއު ކިޔައިފި އެވެ.

ރާއްޖެ މިނިވަން ޑިމޮކްރަސީއަކަށް ހުޅުވިގެން ދިޔަ ދުވަސްވަރު، މޯލްޑިވްސް މީޑިއާ ކޮމްޕެނީގެ ދަށުން 2007 ގައި ހިންގަން ފެށި ދިއެފްއެމް ހުއްޓާލީ މިދިއަ އަހަރެވެ. އޭގެ ފަހުން ކުންފުނީގެ ޗީފް އެގްޒެކްޓިވް އޮފިސަރު މަސްއޫދު ހިލްމީ ވަނީ ފްރިކުއެންސީ ރަޖިސްޓްރީ ބާތިލްކޮށްދޭން އެދިވަޑައިގެން ކޮމިޔުނިކޭޝަން އޮތޯރިޓީ އަށް ސިޓީ ފޮނުއްވައިފަ އެވެ.

އެ ރަޖިސްޓްރީ ބާތިލްކޮށް، އެކަން މޯލްޑިވްސް މީޑިއާ ކޮމްޕެނީ އަށް އެންގީ މި މަހު 10 ގަ އެވެ. އެހެންކަމުން 95.2 ފްރިކްއެންސީ މެދުވެރިކޮށް ޓްރާންސްމިޓް ކުރުމަކީ މަނާ ކަމެއް ކަމަށް ކޮމިއުނިކޭޝަން އޮތޯރިޓީން ވަނީ ހަމަޖައްސައިފަ އެވެ.

ދިއެފްއެމް އަކީ ދިޓީވީއާ އެކު ހިންގަމުން އައި ރޭޑިއޯއެކެވެ. ރާއްޖޭގެ މަހުޖަނެއް ކަމަށްވާ ޗަމްޕާ މުހައްމަދު މޫސާ (އުއްޗު)ގެ މެޖޯރިޓީ ޝެއާ އޮންނަ ދެ ކުންފުނިން ހިންގަމުން އައި ޗެނަލްތައް ހުއްޓާލީ މިދިއަ އަހަރުގެ އޮގަސްޓް 10 ގަ އެވެ. އޭގެ ސަބަބެއް ކަމަށް ބުނީ ތަނުގެ ވަސީލަތްތަކުގެ ހާލަތު ދަށްވުމެވެ.