އަޒްލިފް މަރުވިކަން އަދިވެސް ކަށަވަރެއް ނުކުރެވޭ: ޑިފެންސް މިނިސްޓަރު

ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު ޑރ. އަފްރާޝީމް އަލީ އަވަހާރިކޮށްލި މައްސަލާގައި ހިމެނޭ އަޒްލިފް ރައޫފް ސީރިއާގެ ހަނގުރާމައިގައި މަރުވެފައިވާ ކަން އަދިވެސް ކަށަވަރު ނުކުރެވޭ ކަމަށް ޑިފެންސް މިނިސްޓަރު އާދަމް ޝަރީފް މިއަދު ވިދާޅުވެއްޖެ އެވެ.

ސީރިއާގައި ހަނގުރާމަކުރަން އުޅެނިކޮށް ހަމަލާތަކެއްގައި އަޒްލިފް މަރުވެފައިވާ ކަމަށް ބުނެ މިދިޔަ އަހަރުގެ މެދު ތެރޭގައި ސޯޝަލް މީޑިއާގައި ފޮޓޯތަކެއް އާއްމުކޮށްފައިވެ އެވެ. އަދި އޭނާ މަރުވެފައިވާ ކަމަށް އާއިލާ އިން ވެސް ވަނީ ބުނެފަ އެވެ.

ނެޝަނަލް ކައުންޓަ ޓެރަރިޒަމް ސެންޓަރުން މިއަދު ބޭއްވި ނިއުސް ކޮންފަރެންސްގައި މިނިސްޓަރު ވިދާޅުވީ އަޒްލިފް މަރުވެފައިވާ ކަމަށް ބުނާ މައްސަލަ ސަރުކާރުން އަންނަނީ ވަރަށް ގާތުން ބަލަމުން ކަމަށެވެ.

"އަޅުގަނޑުމެންނަށް އަދި ކަށަވަރެއް ނުކުރެވޭ އޭނާ [އަޒްލިފް] މަރުވެފައިވާ ކަމަކަށް. އެކި ރިޕޯޓްތައް އެކި ގޮތަށް ލިބިފައި އެބަހުރި މިހާ ހިސާބަށް އައިރު ވެސް،" މިނިސްޓަރު ވިދާޅުވި އެވެ.

އަފްރާޝީމް އަވަހާރަކޮށްލި މައްސަލާގައި އަޒްލިފްގެ މައްޗަށް ދައުވާކޮށްދޭން އެދި ޕްރޮސިކިއުޓަ ޖެނެރަލްގެ އޮފީހަށް ފުލުހުން ފޮނުވި އެވެ. އެކަމަކު އެ މައްސަލާގައި މިހާތަނަށް އޭނާގެ މައްޗަށް ދައުވާއެއް ނުކުރެ އެވެ. އޭނާގެ މައްޗަށް ކުރިން އުފުލީ، ޓެރަރިޒަމްގެ ދައުވާ އެވެ. ރާއްޖެ އިން އަޒްލިފް ފުރައިގެން ދިޔައީ، އެ ދައުވާ އުފުލާފައި ވަނިކޮށެވެ.

އަފްރާޝީމް އަވަހާރަކޮށްލި މައްސަލައިގެ އިތުރުން ނޫސްވެރިޔާ އަހްމަދު ރިލްވާން ގެއްލުވާލި މައްސަލާގައި ވެސް އޭނާގެ މައްޗަށް ތުހުމަތުތަކެއް ކުރެ އެވެ.