ތޮއްޔިބު ދޫކޮށްލަން ހައި ކޯޓުން އަމުރުކޮށްފި

ރައްޔިތުންގެ ތެރޭގައި ބިރުވެރިކަން އުފެދޭ ގޮތަށް ދޮގު މައުލޫމާތު ފަތުރަމުންދާ ކަމުގެ ތުހުމަތުގައި ހައްޔަރުކޮށްފައިވާ ތޮއްޔިބު ޝަހީމް ދޫކޮށްލުމަށް ހައި ކޯޓުން ދެންމެ އަމުރުކޮށްފި އެވެ. މި އަމުރާ އެކު ތޮއްޔިބު ވަނީ މިނިވަން ވެފަ އެވެ.

ތޮއްޔިބުގެ ވަކީލު ނާޒިމް އަބްދުއްސައްތާރު ވިދާޅުވީ ތޮއްޔިބު ދޫކޮށްލީ ތިން ޝަރުތަކާ އެކު ކަމަށެވެ. އެއީ ދިވެހި ދައުލަތް ބަދުނާމް ނުކުރުމާއި ފުލުހުންނަށް އެއްބާރުލުން ދިނުން އަދި ރަށުން ބޭރަށް ނުދިއުމެވެ.

"ހައި ކޯޓުގެ ހުކުމުގައި އޮތީ ތޮއްޔިބު މިއަދު ދޫކޮށްލުމަށް،" މިދިޔަ މަހުގެ 17 ގައި ހައްޔަރުކުރި ތޮއްޔިބުގެ ވަކީލު ވިދާޅުވި އެވެ.

ތޮއްޔިބު ދޫކޮށްލުމުގެ އަމުރު އައީ އޭނާގެ ބަންދުގެ މުއްދަތު މިހާތަނަށް ތިން ފަހަރެއްގެ މަތިން ކްރިމިނަލް ކޯޓުން އިތުރުކޮށްފައިވާއިރު، އޭގެ ތެރެއިން ދެވަނަ އަމުރު ހައި ކޯޓުގައި އިސްތިއުނާފު ކުރުމުންނެވެ.

އިދިކޮޅު އެމްޑީޕީގެ ސޯޝަލް މީޑިއާ އެކްޓިވިސްޓް ތޮއްޔިބަކީ ސަރުކާރަށް ފާޑުކިޔައި އެކިއެކި ވާހަކަ ފަތުރަމުން އައި މީހެކެވެ.

ތޮއްޔިބު ހައްޔަރުކުރުމަކީ ސިޔާސީ ކަމެއް ކަމަށް ބުނެ އޭނާ ވަގުތުން މިނިވަން ކުރުމަށް އިންސާނީ ހައްގުތަކަށް ވަކާލާތުކުރާ އެމްނެސްޓީ އިންޓަނޭޝަނަލް އިން ކުރިން ގޮވާލާފައި ވެ އެވެ.