ސީރިއާ އަށް ހަމަލާ ދިނުމުގެ ބާރަކަށްވީ ޓްރަމްޕުގެ އަންހެން ދަރިކަނބަލުން

ލަންޑަން (އެޕްރީލް 12) - ސީރިއާގެ ވައިގެ މަރުކަޒަކަށް އެމެރިކާ އިން މިސައިލް ހަމަލާ ދިނުމުގެ ބާރަކަށްވީ ރައީސް ޑޮނަލްޑް ޓްރަމްޕުގެ ދަރިކަނބަލުން އިވާން ކަމަށް ޓްރަމްޕުގެ ދަރިކަލުން އެރިކް ޓްރަމްޕް ވިދާޅުވެއްޖެ އެވެ.

ސީރިއާ އަށް ދިން ކެމިކަލް ހަމަލާގައި ކުޑަ ކުދިންނަށް ލިބިފައިވާ ގެއްލުންތައް ފެނިވަޑައިގެން ޓްރަމްޕަށް ވަރަށް ބޮޑަށް އަސަރު ކުރި ކަމަށް އެރިކްއާ ހަވާލާދީ ޓެލެގްރާފްގައި ބުނެފައިވެ އެވެ.

ސްކޮޑްލެންޑުގެ ޓްރަމްޕް ގޮލްފް ރިސޯޓުގައި ވާހަކަ ދައްކަވަމުން އެރިކް ވިދާޅުވީ ސީރިއާގައި ދިން ކެމިކަލް ހަމަލާއާ ގުޅިގެން ރައީސް ބައްޝާރުލް އަސަދަށް އަދަބު ދިނުމަށް ބޮން އެޅުމުގައި އިވާންގެ ނުފޫޒް ވެސް ބޮޑު ކަމަށެވެ. ސީރިއާގައި ދިން ކެމިކަލް ހަމަލާއާ ގުޅިގެން އިވާންކާ އަށް ވަރަށް ބޮޑަށް އަސަރުކުރި ކަމަށް އެރިކް ވިދާޅުވި އެވެ.

ސީރިއާ އަށް ހަމަލާ ދިނުމަކީ ޓްރަމްޕް ނުވިސްނަވާ އެޅުއްވި ފިޔަވަޅެއް ކަމަށް ދެކެވޭ ވާހަކަތަކާ ގުޅިގެން އެރިކް ވިދާޅުވީ އެއީ ރަނގަޅު ވާހަކައެއް ނޫން ކަމަށާއި ޓްރަމްޕަކީ ވަރަށް ދުރަށް ވިސްނެވުމަށް ފަހު ފިޔަވަޅު އަޅުއްވާ ބޭފުޅެއް ކަމަށެވެ.

"ގައުމެއްގެ ވެރިއަކު އެ ގައުމުގެ ކުޑަ ކުދިންނާއި އަންހެނުންނާ ދެކޮޅަށް ގޭސް ބޭނުންކޮށް މީހުން މެރި އިރު ސްޕަ ޕަވަރެއްގެ ގޮތުގައި އެމެރިކާ ކުރިއަށް ނުކުމެ ފިޔަވަޅު އަޅަން ޖެހޭ،" އެރިކް ވިދާޅުވި އެވެ.