ރައުދާގެ މަރުގެ މައްސަލަ ބަލަން ދިވެހި ދެ ފުލުހަކު ބަންގްލަދޭޝް އަށް ފުރައިފި

ބަންގްލަދޭޝްގައި މިދިޔަ ހަފުތާގައި މަރުވި ދިވެހި މޮޮޑެލް، ރައުދާ އާތިފްގެ މަރުގެ މައްސަލައިގެ ތަހުގީގަށް ރާއްޖޭގެ ދެ ފުލުހަކު ބަންގްލަދޭޝަށް މިއަދު ފުރައިފި އެވެ.

ފުލުހުން ބުނީ ރާއްޖޭގެ ފޮރިން މިނިސްޓްރީ އާއި ދިވެހި ފުލުހުން ގުޅިގެން ހަމަޖެއްސި މި ދަތުރުގައި އެ ހާދިސާއާ ގުޅޭ މައުލޫމާތު އެއްކޮށް، ބަންގަލްދޭޝްގައި މިވަގުތު ތިބި ރައުދާގެ އާއިލާ އާއި އެތަނުގައި އުޅޭ ދިވެހި ދަރިވަރުންނާ ބައްދަލުކޮށް، މައުލޫމާތު ސާފުކުރާނެ ކަމަށެވެ.

ރައުދާގެ މަރުގެ މައްސަލަ ކައިރިން ބަލަމުން އަންނަ ކަމަށް ފުލުހުން ކުރިން ވަނީ ބުނެފަ އެވެ.

މިދިޔަ ބުދަދުވަހު ރައުދާ އޭނާގެ ކޮޓަރީގައި ދަންޖެހިފައި ހުއްޓާ ފެނުމާ ގުޅިގެން އޭނާގެ އޮޓޮޕްސީ ހެދުމުން އޮޓޮޕްސީ ރިޕޯޓުން ދެއްކީ އޭނާ މަރުވީ އަމިއްލައަށް ކަމަށެވެ. އެކަމަކު ރައުދާގެ އާއިލާ އިން ބުނެފައިވަނީ އެ ރިޕޯޓް ގަބޫލު ނުކުރާ ކަމަށާއި ރައުދާގެ މަރުގައި ޝައްކު އުފެދޭ ކަންތައްތަކެއް އެބަހުރި ކަމަށެވެ.

ދިވެހި ފުލުހުންގެ ޓީމެއް ބަންގްލަދޭޝް އަށް ފުރީ ރައުދާގެ މައްސަލަ އެ ގައުމު ޑިޓެކްޓިވް ބްރާންޗުން ވެސް ތަހުގީގު ކުރަން ފަށާފައި ވަނިކޮށެވެ.