ކިމްގެ ހަށިގަނޑު ހަވާލުކޮށްފި، މެލޭޝިއާ މީހުން އެނބުރި ގައުމަށް

މެލޭޝިއާގެ އެއާޕޯޓެއްގައި އަވަހާރަކޮށްލި ނޯތު ކޮރެއާގެ ލީޑަރުގެ ބޭބެ ކިމް ޖޮންގް-ނެމްގެ ހަށިގަނޑު އެ ގައުމާ ހަވާލުކޮށްފި އެވެ. އަދި ނޯތު ކޮރެއާގައި ނުފުރޭ ގޮތަށް ހިފަހައްޓާފައި ތިބި މެލޭޝިއާގެ ނުވަ މީހަކު އެނބުރި މެލޭޝިއާ އަށް މިއަދު އަތުވެއްޖެ އެވެ.

މިދިއަ މަހު މެލޭޝިއާގެ އެއާޕޯޓެއްގައި ކިމް އަވަހާރަކޮށްލީ ދެ އަންހެނަކު އޭނާގެ މޫނުގައި ވަރުގަދަ ކެމިކަލެއް އުނގުޅުމުންނެވެ. އެ ހާދިސާ އަށް ފަހު ނޯތު ކޮރެއާ އާއި މެލޭޝިއާއާ ދެމެދު ވަރަށް ބޮޑެތި މައްސަލަތަކެއް ނުކުތެވެ. ނޯތު ކޮރެއާ އިން އެދުނީ ކިމްގެ ހަށިގަނޑު ވަގުތުން ހަވާލުކުރާށެވެ. އެކަމަކު އެއީ މެލޭޝިއާގައި ހިންގި ގަތުލަކަށް ވާތީ ހުރިހާ ތަހުގީގެއް ނިމުމުގެ ކުރިން ހަށިގަނޑު ހަވާލުނުކުރާނެ ކަމަށް މެލޭޝިއާ އިން ބުނެ އެވެ.

ތުހުމަތުކުރެވޭ ގޮތުގައި ކިމް އަވަހާރަކޮށްލުމުގެ ފަހަތުގައި ވަނީ އޭނާގެ ކޮއްކޮ އަދި ނޯތު ކޮރެއާގެ ލީޑަރު ކިމް ޖޮންގް-އުންގެ ސަރުކާރެވެ.

މި މައްސަލަގަނޑުގެ ތެރޭގައި ނޯތު ކޮރެއާ އިން އެންގީ އެ ގައުމުގައި ތިބި މެލޭޝިއާގެ އެއްވެސް މީހަކަށް ނުފުރޭނެ ކަމަށެވެ. އަދި މެލޭޝިއާ އިން ވެސް ހަމަ އެގޮތަށް ފިޔަވަޅު އެޅި އެވެ.

ނޯތު ކޮރެއާގައި ތިބީ ހަމައެކަނި މެލޭޝިއާގެ އެމްބަސީގެ މުވައްޒަފުންނެވެ.

ދެ ގައުމުން އެއްބަސްވުމަކަށް އާދެވުމާ އެކު މެލޭޝިއާ އިން ވަނީ ކިމް ޖޮންގް-ނެމްގެ ހަށިގަނޑު ނޯތު ކޮރެއާއާ ހަވާލުކޮށްފަ އެވެ. އަދި އޭނާގެ މަރުގެ މައްސަލާގައި ސުވާލުކުރަން ބޭނުންވި އެ ގައުމުގެ ދެ މީހަކު އެނބުރި ނޯތު ކޮރެއާ އަށް ދިއުމުގެ ހުއްދަ ވެސް މެލޭޝިއާ އިން ވަނީ ދީފަ އެވެ.

ކިމް ޖޮންގް-ނެމް ދިރިއުޅުއްވީ ގައުމުން ބޭރުގަ އެވެ. އަދި އޭނާގެ ކޮއްކޮގެ ސަރުކާރަށް ފާޑު ވެސް ކިއުއްވަމުން ގެންދެވި އެވެ. އެކަމަކު ބައެއް އިންޓަވިއުތަކުގައި އޭނާ ވިދާޅުވެފައި ވަނީ ސިޔާސީ ކަންކަމާ ޝައުގުވެރިކަމެއް ނެތް ކަމަށެވެ.

ނޯތު ކޮރެއާ ރުޅިގަދަވީ ކިމް ޖޮންގް-ނެމްގެ އޮޓޮޕްސީ ހަދަން އެ ގައުމުން ދެކޮޅު ހަދަމުން ދަނިކޮށް މެލޭޝިއާ އިން އެކަން ކުރުމުންނެވެ. މެލޭޝިއާ އިން ބުނަމުން އައީ އެ ގަތުލު އެ ގައުމުގައި ހިންގާފައި ވާތީ ހުރިހާ ތަހުގީގެއް ފުރިހަމަކުރާނެ ކަމަށާއި އަދި ހަށިގަނޑު ހަވާލުކުރާނީ ހަމައެކަނި އާއިލާއާ ކަމަށެވެ.

ބައެއް ފަރާތްތަކުން ދެކޭ ގޮތުގައި މެލޭޝިއާގެ ނުވަ މީހުން އެނބުރި ގެންނަން އެ ގައުމުން ވަނީ ނޯތު ކޮރެއާ އިން އެދުނު ހުރިހާ ކަމެއް ކޮށްފަ އެވެ. މެލޭޝިއާ ސަރުކާރުން ބުނާ ގޮތުގައި އެއީ ޑިޕްލޮމެޓިކްގެ ގޮތުން އެ ގައުމަށް ލިބުނު ކާމިޔާބީއެކެވެ.