އާއިލާ މީހަކު ދާއިމީ ބައްޔަކަށް ފަރުވާ ހޯދާ ނަމަ 30 ދުވަހުގެ ހާއްސަ ޗުއްޓީއެއް

އާއިލާ މީހަކު ނުވަތަ ޝަރުއީ ގޮތުން ބަލަންޖެހޭ މީހަކު ދާއިމީ ބައްޔަކަށް ފަރުވާއެއް ހޯދާ ނަމަ، 30 ދުވަހުގެ ހާއްސަ ޗުއްޓީއެއް ލިބޭ ގޮތަށް ސިވިލް ސާވިސްގެ ގަވައިދު އިއްޔެ އިސްލާހުކޮށްފި އެވެ.

ސިވިލް ސާވިސް ކޮމިޝަނުން އިއްޔެ ވަނީ އެ ކޮމިޝަންގެ ގަވައިދަށް 13 ވަނަ އިސްލާހު ގެނެސްފަ އެވެ.

އެ އިސްލާހުގައި ވަނީ، ގަވައިދުގެ 188 ވަނަ މާއްދާގެ (ހ)ގެ 1 ވަނަ ނަމްބަރާއި 2 ވަނަ ނަމްބަރުގައި ބުނެފައިވާ ހާލަތްތަކުން ކުރެ ހާލަތެއް މުވައްޒަފުގެ މަންމަ، ބައްޕަ، އަނބިމީހާ، ފިރިމީހާ، ދަރިއަކަށް، އެއްބަނޑުއެއްބަފާ މީހަކަށް، އެއްބަނޑު މީހަކަށް، އެއްބަފާ މީހަކަށް ނުވަތަ ޝަރުއީ ގޮތުން ބަލަންޖެހިފައިވާ މީހަކަށް ދިމާވެއްޖެ ނަމަ އަސާސީ މުސާރަ ލިބޭ ގޮތަށް އަހަރަކު 30 ދުވަހުގެ ޗުއްޓީއެއް ލިބޭނެ ކަމަށެވެ.

އެއަށް ކިޔަނީ "ހާއްސަ ސިއްހީ ބޭނުންތަކަށް ދެވޭ ޗުއްޓީ" އެވެ.

އެ މާއްދާގެ (ހ) ގެ 1 ވަނަ ނަމްބަރުގައި ބުނާގޮތުން، ބަލިވުމުގެ ސަބަބުން މުވައްޒަފަށް ކަނޑައެޅިފައިވާ ރަސްމީ ގަޑިއަށް މަސައްކަތަށް ނުކުތުމަށް އުޒުރުވެރިވާ ނަމަ ސަލާމުގެ ޗުއްޓީ ދޭންޖެހޭނެ އެވެ. އަދި އެ މުވައްޒަފެއްގެ ރަސްމީ މަސައްކަތު ގަޑިއަށް ނުވަތަ ރަސްމީ ގަޑި ފެށޭތާ ލަސްވެގެން އެއް ގަޑިއިރުގެ ތެރޭގައި އެ މުވައްޒަފެއްގެ ސުޕަވައިޒަރަށް ނުވަތަ އެ އިދާރާއަކުން ކަނޑައަޅައިފައިވާ ގޮތެއްގެ މަތީން އެކަން އެންގުމުން ސަލާމުގެ ޗުއްޓީ ދޭންޖެހޭނެ ކަމަށް ދެ ވަނަ މާއްދާގައި ބުނެ އެވެ.

ސަލާމުގެ ޗުއްޓީ ދިނުމުގައި ބަލާނީ، އަހަރީ ޗުއްޓީ ދިނުމުގައި އަހަރު ބަލާ އުސޫލުންނެވެ. ނަމަވެސް ވަޒީފާ އަދާކުރާތާ އަހަރު ނުވިއަސް ސަލާމުގެ ޗުއްޓީ ދެވޭނެ އެވެ.

އެކަމަކު، ހާއްސަ ސިއްހީ ބޭނުންތަކަށް ދޭ ޗުއްޓީ ހޯދުމަށް، އެ ބަލި މީހަކީ ދާއިމީ ނުވަތަ ދިގު މުއްދަތަކަށް ބޭސްފަރުވާ ކުރަންޖެހޭ މީހެއް ކަމާއި ބަލީގެ ވައްތަރާއި ބަލީގެ ސަބަބުން ފަރުވާއަށް ހޭދަވާނެ މުއްދަތު ބަޔާންކޮށް، ހެލްތު މިނިސްޓްރީގައި ރަޖިސްޓްރީކޮށްފައިވާ ސިއްހީ މަސައްކަތްތެރިއެއްގެ މެޑިކަލް ސެޓްފިކެޓް ނުވަތަ ސެޓްފިކެޓު ދޫކުރި ގައުމެއްގެ ރަޖިސްޓްރީކޮށްފައިވާ ސިއްހީ މަރުކަޒަކުން ސިއްހީ މަސައްކަތްތެރިއަކު ދޫކޮށްފައިވާ މެޑިކަލް ސެޓްފިކެޓެއް ހުށަހަޅަންޖެހޭނެ އެވެ.

އެ ޗުއްޓީ އެއްވެސް މީހަކަށް ދޭނީ ސިވިލް ސާވިސް ކޮމިޝަނަށް ހުށަހަޅައި ކޮމިޝަނަށް ކަނޑައަޅާ ގޮތެއްގެ މަތިންނެވެ. މުވައްޒަފެއްގެ އާއިލާ މީހަކު ބަލިވުމުން ހާއްސަ ޗުއްޓީއެއް ދޭ ގޮތަށް އުސޫލު ބަދަލުކުރިއިރު، ސިވިލް ސާވެންޓަކު ދާއިމީ ބައްޔަކަށް ފަރުވާ ހޯދުމަށް މިހާރު ވެސް މުސާރަ ލިބޭ ގޮތަށް 60 ދުވަހުގެ ޗުއްޓީއެއް ލިބެ އެވެ.

އެ ކޮމިޝަނުން ވަނީ، މުވައްޒަފަކު ވަޒީފާއިން ދޫކޮށްލެވޭނެ ހާލަތްތަކާ ގުޅޭ މާއްދާއަށް ވެސް އިސްލާހު ހުށަހަޅައިފަ އެވެ.

އޭގައި ބުނެފައިވަނީ މުވައްޒަފަށް ދިމާވާ ސިއްހީ ހާލަތަކާ ގުޅިގެން އެ މުވައްޒަފަށް ދާއިމީ ގޮތެއްގައި ނުވަތަ ދިގު މުއްދަތަކަށް ވަޒީފާ އަދާކުރުމަށް ނުކުޅެދިއްޖެނަމަ އެ މީހަކު ވަޒީފާއިން ދޫކޮށްލެވޭނެ ކަމަށެވެ. އެ ހާލަތުގައި މުވައްޒަފަށް ވަޒީފާ އަދާކުރުމަށް ނުކުޅެދޭ ކަމުގައި ބަލާނީ އެކަން ބަޔާންކޮށް ހެލްތު މިނިސްޓްރީގައި ރަޖިސްޓްރީކޮށްފައިވާ ސިއްހީ މަސައްކަތްތެރިއަކު ސޮއިކޮށް ލިޔުން ދޫކުރާ ތަނުގެ ތައްގަނޑު ޖަހާފައިވާ ލިޔުމެއް ހުށަހެޅުމުންނެވެ. އަދި ރާއްޖެއިން ބޭރުގެ ސިއްހީ މަސައްކަތްތެރިއެއްގެ ލިޔުމެއްނަމަ އެ ފަރާތަކީ އެ ގައުމެއްގައި ރަޖިސްޓްރީކޮށްފައިވާ ސިއްހީ މަރުކަޒެއްގެ ސިއްހީ މަސައްކަތްތެރިއެއްކަމުގައި ވާންޖެހޭނެ ކަމަށް ބުންޏެވެ.