މުޒާހަރާތެރޭ ނޭޕާލުގެ ޖަލުތަކުން 13،500 އަށް ވުރެ ގިނަ މީހުން ވަނީ ފިލާފައި

ނޭޕާލުގެ ވެރިކަން ވައްޓާލި ހަމަނުޖެހުން ބޮޑު މުޒާހަރާކުގެ ތެރޭގައި އެ ގައުމުގެ އެކި ޖަލުތަކުން 13،500 އަށް ވުރެ ގިނަ މީހުން ފިލާފައިވާ ކަމަށް ފުލުހުން ބުނެފި އެވެ.

"ތިން ފުލުހަކު އިއްޔެ މަރުވެފައި ވާއިރު ގައުމުގެ އެކި ޖަލުތަކުން ވަނީ 13،500 އަށް ވުރެ ގިނަ މީހުން ފިލާފައި،" ނޭޕާލް ފުލުހުންގެ ތަރުޖަމާނު ބިނޯދް ގިމިރޭ ވިދާޅުވި އެވެ.

ނޭޕާލުގައި ސޯޝަލް މީޑިއާ މަނާކުރުމާ އެކު މުޒާހަރާތައް ފެށުނަސް ގައުމުގައި އާންމުވެފައިވާ ކޮރަޕްޝަނާ ދެކޮޅަށް މީހުން ނުކުމެ މުޒާހަރާތައް ހޫނުވެ ފުޅާވެގެން ދިއުމާ އެކު ވަނީ ބޮޑެތި ހަމަނުޖެހުން ހިނގައިފަ އެވެ. ގާނޫނު ހަދާ މަޖިލީހާއި ސިޔާސީ އެތައް ބައެއްގެ ގެތަކުގައި ހުޅުޖަހާފައި ވާއިރު ސިޔާސީ އެކި ބޭފުޅުންނަށް ބޮޑެތި އަނިޔާތައް ވެސް ދީފައިވެ އެވެ.

ނޭޕާލްގެ އަސްކަރިއްޔާގެ ވެރިޔާ ޖެނެރަލް އަޝޯކް ރާޖް ސިގްޑެލް ވަނީ "ޖެން ޒީ" މުޒާހަރާގެ ބައިވެރިންގެ އިސް މީހުންނާ އިއްޔެ ބައްދަލު ކުރައްވައި ހަމަޖެހުން ގާއިމުކުރުމާ ބެހޭ ގޮތުން މަޝްވަރާކުރައްވައިފަ އެވެ. އެކަމަކު އެ ބައްދަލުވުމުގެ ތަފްސީލެއް ހާމައެއް ނުކުރެ އެވެ.

މުޒާހަރާގެ އިސް މީހުން މިއަދު ބުނި ގޮތުގައި ވަގުތީ ސަރުކާރެއް އެކުލަވާލަން ނިންމައި އެ ސަރުކާރުގެ ވެރިޔަކަށް ކުރީގެ އުއްތަމަ ފަނޑިޔާރު ސުޝިލާ ކާކީ ގެނައުމަށް މިހާރު އަންނަނީ މަޝްވަރާކުރަމުންނެވެ.

"މިހާރު އިންތިގާލީ ސަރުކާރުގެ އިސް ވެރިއަކަށް ސުޝީލާ ކާކީގެ ނަން ވަނީ ހުށަހަޅާފައި. އަޅުގަނޑުމެން މިހާރު އިންތިޒާރު ކުރަމުން މި އަންނަނީ ރައީސްގެ ނިންމެވުމަށް،" ސިފައިންގެ ވެރިޔާއާ އެކު ބޭއްވި ބައްދަލުވުމުގައި ބައިވެރިވި ރަކްޝަޔާ ބާމް ބުންޏެވެ.

މުޅި ގައުމު ނާމާންކަމުގެ ތެރެއަށް ވެއްޓުނު މުޒާހަރާތަކުގައި 19 މީހަކު މަރުވެފައި ވާއިރު ސިފައިން މިހާރު ގެންދަނީ އަމަން ގާއިމުކޮށް ކަންކަން މަގަށް އަޅުވަން ފިޔަވަޅުތައް އަޅަމުންނެވެ. -- އޭއެފްޕީ