އިންސާފަށް ގާނޫނީ ހުރަސްތަކެއް ވެސް އެބަހުރި، އެކަން ހައްލު ކުރެވޭނެ: އުއްތަމަ ފަނޑިޔާރު

ކޯޓުތަކަށް ދިމާވެފައިވާ މައްސަލަތަކުގެ ތެރޭގައި ގާނޫނީ ހުރަސްތަކެއް ވެސް އެބަހުރި ކަމަށާއި ނަމަވެސް އެ ހުރަސްތައް ގިރާ ކުރުމަކީ އުނދަގޫ ކަމެއް ނޫން ކަމަށް އުއްތަމަ ފަނޑިޔާރު އަބްދުލްޣަނީ މުހައްމަދު ވިދާޅުވެއްޖެ އެވެ.

ޝަރުއީ ދާއިރާގެ އިންޓެގްރޭޓެޑް ކޭސް މެނޭޖްމަންޓް ސިސްޓަމް އިފުތިތާހްކޮށް ދެއްވުމަށް އިއްޔެ ބޭއްވި ރަސްމިއްޔާތުގައި ވާހަކަފުޅު ދައްކަވަމުން އުއްތަމަ ފަނޑިޔާރު ޣަނީ ވިދާޅުވީ ކޯޓުތަކަށް ދިމާވެފައިވަނީ ހަމައެކަނި މާލީ ދަތިތަކާ ގުޅިފައިވާ މައްސަލަތަކެއް ނޫން ކަމަށެވެ. އަދި މާލީ ކަންކަމުގެ އިތުރުން ކޯޓުތަކަށް ދިމާވެފައިވާ ގާނޫނީ ހުރަސްތަކާ ގުޅޭ މައްސަލަތަކެއް ވެސް އެބަހުރި ކަމަށާއި އެއީ ހައްލު ކުރަން އުނދަގޫ މައްސަލަތަކެއް ކަމަށް ދެކެވަޑައިނުގަންނަވާ ކަމަށް އެ މަނިކުފާނު ވިދާޅުވި އެވެ.

"ކޯޓުތަކަށް ދިމާވެފައިވާ މައްސަލަތަކުގެ ތެރޭގައި ކުޑަ އެއްވެސް މައްސަލެއް ނެތް. މުޅިން ވެސް މިހާރު ހުރީ ބޮޑެތި މައްސަލަ. މި މައްސަލަތައް ފުރަތަމަ އުފެދުނުއިރު މި ހުރިހާ މައްސަލަތަކަކީ ބޮޑެތި މައްސަލަތަކެއް ނޫން،" މި މަހުގެ ކުރީކޮޅު މަގާމާ ހަވާލުވެ ވަޑައިގަތް އާ އުއްތަމަ ފަނޑިޔާރު ޣަނީ ވިދާޅުވި އެވެ.

"ނަމަވެސް އަޅާނުލެވި ދޫކޮށްލެވުމުގެ ސަބަބުން ޒަމާނާ އެކު މި މައްސަލަތައް ވެސް ވަނީ ބޮޑެތިވެ، ތަސައްރަފު ފުދިފައި."

މީގެ ކުރިން މަދަނީ ކޯޓުގެ ގާޒީ ކަމާއި ހައި ކޯޓުގެ އިސް ފަނޑިޔާރު ކަމާއި ފަނޑިޔާރުކަން އަދި ސުޕްރީމް ކޯޓުގެ ފަނޑިޔާރުކަން ވެސް ކުރައްވާފައިވާ އުއްތަމަ ފަނޑިޔާރު ޣަނީ ވިދާޅުވީ ކޯޓުތަކަށް ދިމާވެފައިވާ މައްސަލަތަކުގެ ލިސްޓެއް މިހާރު އެކުލަވާލާފައިވާ ކަމަށެވެ.

"މީގެ ތެރޭގައި ހަމައެކަނި ހުރީ މާލިއްޔަތާ ގުޅިފައިވާ މައްސަލަތަކެއް ވެސް ނޫން. ދިމާވެފައިވާ ބޮޑެތި ގާނޫނީ ހުރަސްތަކާ ގުޅޭ މައްސަލަތައް ވެސް އެބަހުރި. އަދި މިހާރު އަޅުގަނޑުމެންނަށް ފެންނަން އޮތް މަންޒަރަށް ބަލާއިރު، މި ގާނޫނީ ހުރަސްތަކާ ގުޅޭ މައްސަލަތައް ހައްލު ކުރުމަކީ އުދަނގޫ ކަމެއް ކަމުގައި ވާނެ ކަމަކަށް އަޅުގަނޑުމެން ނުދެކެން،" އުއްތަމަ ފަނޑިޔާރު ވިދާޅުވި އެވެ.

އުއްތަމަ ފަނޑިޔާރު އިއްޔެ އިފްތިތާހު ކޮށްދެއްވި، ޝަރުއީ ދާއިރާގެ އިންޓިގްރޭޓެޑް ކޭސް މެނޭޖްމަންޓް ސިސްޓަމް (އައިސީއެމްއެސް) ކްރިމިނަލް ކޯޓުގައި މިހާރު ވަނީ ރަސްމީކޮށް ބޭނުންކުރަން ފަށައިފަ އެވެ. އެ ކޯޓުގައި އައިސީއެމްއެސް ބޭނުންކުރަން ފެށީ ޕްރޮސިކިއުޓާ ޖެނެރަލްގެ އޮފީހުގެ ކޭސް މެނޭޖްމަންޓް ސިސްޓަމާ ފުރިހަމަ އަށް ގުޅާލައިގެންނެވެ.

އައިސީއެމްއެސްއަކީ ޖިނާއީ އަދުލުގެ ނިޒާމުގައި ހިމެނޭ ގިނަ އިދާރާތަކެއްގެ ސިސްޓަމްތަކާ ގުޅާލެވޭ ގޮތަށް ފަރުމާކޮށްފައިވާ ނިޒާމެކެވެ.

އެހެންވެ، ކުރިއަށް އޮތް ތަނުގައި ޖިނާއީ އަދުލުގެ ނިޒާމުގެ ތެރޭގައި ހިމެނޭ އިދާރާތަކާ ގުޅުން ހުރި އެހެނިހެން އިދާރާތަކުގެ ސޮފްޓްވެއާތަކާ އައިސީއެމްއެސް އިންޓެގްރޭޓް ކުރުމަށް ވަނީ ހަމަޖެހިފަ އެވެ. އޭގެ ސަބަބުން އިދާރާތަކުގެ މެދުގައި މައްސަލަތަކާ ގުޅޭ ލިޔެކިޔުންތައް ބަދަލު ކުރުމުގައި ފަސޭހަވެ، މައްސަލަ ރަޖިސްޓަރީ ކުރުމަށް ހޭދަވާ ވަގުތު އެތައް ގުނައަކަށް ކުޑަކުރެވޭނެ ކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުންޏެވެ.