އިންތިހާބުވި ފަހުން ގާނޫނު އިސްލާހުކުރުމުން ހައްގުތަކެއް ގެއްލޭ: ކުޅުދުއްފުށީ މޭޔަރު

ކައުންސިލްތައް އިންތިހާބުވެ ފަހު އަހަރުތެރޭ ލާމަރުކަޒީ ގާނޫނު އިސްލާހުކުރުމުން ހައްގުތަކެއް ގެއްލި ކައުންސިލްތަކަށް ގެއްލުންވާ ކަމަށާއި އެހެންވެ އެކަން އެ ކަންކަން ބަދަލުކޮށްދިނުމަށް އެދޭ ކަމަށް ކުޅުދުއްފުށީ ސިޓީ ކައުންސިލްގެ މޭޔަރު މުހައްމަދު އާތިފް ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒު ކުޅުދުއްފުށީ ރައްޔިތުންނާ ބައްދަލުކުރަން ރޭ ބޭއްވި ޖަލްސާގައި މޭޔަރު ވިދާޅުވީ ލާމަރުކަޒީ ނިޒާމަކީ ރާއްޖެ ހިނގަން އެންމެ ރަނގަޅު ނިޒާމް ކަމަށާއި މާލޭގައި ހުންނަ ވުޒާރާއަކުން ރަށްރަށުގައި ހިދުމަތް ދިނުމަކީ ރައްޔިތުން ބޭނުންވާ ގޮތެއް ނޫން ކަމަށެވެ.

ރައްޔިތުންނަށް އެންމެ އަވަސް، ރަނގަޅު ހިދުމަތެއް ދެވޭނީ މޭޔަރު ވިދާޅުވި ގޮތުގައި ކައުންސިލްތައް މެދުވެރިކޮށެވެ. ނަމަވެސް، މިފަހުން ލާމަރުކަޒީ ގާނޫނަށް ގެނައި އިސްލާހުތަކާ އެކު ކައުންސިލްތަކުގެ ބާރު ވަރަށް ހަނިވެފައިވާ ކަމަށް މޭޔަރު ވިދާޅުވި އެވެ.

"ލާމަރުކަޒީ ނިޒާމަށް މި ގެނެވުނު އިސްލާހަކީ ކައުންސިލްތަކަށް ވަރަށް ބޮޑަށް ގެއްލުންވާ އިސްލާހެއް، އޭގެ ސަބަބުން ރައްޔިތުންނަށް ދޭ ހިދުމަތްތަކަށް ވެސް ބުރޫ އެރުން އެކަށީގެންވާ ގޮތަކަަށް އޮތް އިސްލާހުތަކެއް ކަން އަޅުގަނޑު ފާހަގަކުރަން،" މޭޔަރު ވިދާޅުވި އެވެ.

އާތިފް ވިދާޅުވީ އަދިވެސް އުއްމީދުކުރަނީ ގާނޫނަށް ގެނައި ގޯސް ބަދަލު އިސްލާހު ކުރާނެ ކަމަށް ކަމަށެވެ. އަދި އެކަމަށް ކުޅުދުއްފުށީ ރައްޔިތުންގެ ފަރާތުން އެދޭ ކަމަށް ވެސް އޭނާ ވިދާޅުވި އެވެ.

މޭޔަރު ވިދާޅުވީ ގާނޫނަށް ގެނައި އިސްލާހުގެ ސަބަބުން ކައުންސިލްތަކުގެ ދައުރުގެ ފަހު އަހަރު ރަށުގައި އިގްތިސާދީ މަސައްކަތްތަކަށް ބިން ދޫކުރުމާއި ކައުންސިލްތަކަށް ވަޒީފާއަށް މުވައްޒަފުން ނެގުމަށް ވަނީ ހުރަސް އެޅިފަ އެވެ. އެއީ ކައުންސިލްގެ މަސައްކަތަށް ވަރަށް ބޮޑަށް ބުރޫއަރާނެ ކަމެއް ކަމަށް އޭނާ ވިދާޅުވި އެވެ.

"އަޅުގަނޑުމެންނަށް ވޯޓު ދިނީ ފަސް އަހަރުގެ ދައުރުގައި މަސައްކަތްކުރަން އަދި އެ ރައްޔިތުންނަށް އެކީގައި އިށީނދެ ތަރައްގީގެ ޕްލޭނެއް ލިޔެގެން ކަރުދާހަށް ތިރިކުރީ. އެހެންވީމާ އަޅުގަނޑުމެން އިންތިހާބުވެފައި ތިއްބާ އަޅުގަނޑުމެންގެ ދައުރުގެ ފަހު އަހަރު މަސައްކަތްތަކެއް ނުކުރެވޭ ގޮތް ހެދުމަކީ އަޅުގަނޑުމެން އިންތިހާބީ ހައްގެއް ވެސް ގެއްލޭ ކަމެއް އަދި ރައްޔިތުންގެ ހައްގުތަކެއް ވެސް ގެއްލިގެންދާ ކަމެއް،" މޭޔަރު ވިދާޅުވި އެވެ.

މޭޔަރު ވިދާޅުވީ ގާނޫނަށް ގެނައި އިސްލާހާ އެކު، އަސާސީ ހިދުމަތްދޭ ތަންތަނުން ކައުންސިލަށް ބިމު ކުލި ނުލިބޭ ގޮތަށް އޮތުމުގެ ސަބަބުން ހަތަރު މިލިއަން ރުފިޔާގެ ގެއްލުމެއްވާނެ ކައުންސިލަށް ވާނެ ކަމަށް ބެލެވޭ ކަމަށެވެ. އަދި މާލީ ކަންކަމުގައި ކައުންސިލްތަކުން މައި ސަރުކާރުގައި އާދޭސް ދެންނެވުމަށް މަޖުބޫރުވާ ގޮތަށް އިސްލާހު އޮތްކަން ވެސް މޭޔަރު ފާހަގަކުރެއްވި އެވެ.

"މާލީ ކަންކަން މޮނިޓާކުރެވޭނެ ފުރިހަމަ ނިޒާމް މިހާރު ވެސް ކައުންސިލްތަކުގައި އެބައޮތް. އެންމެ ރުފިޔާއެއް ވެސް މި ހަރަދުކުރަނީ ވިޔަ މޮޑިއުލްގެ ތެރެއިން. ދުވަހުން ދުވަހަށް އެލްޖީއޭއަށް ވެސް މޮނިޓާކުރެވޭނެ. ކައުންސިލްތަކުން އެއްވެސް ހަރަދެއް ކޮށްފި ނަމަ، ކޮންމެ މަހަކު އެކުރާ އެއްލާރި ވެސް ގެޒެޓް ކުރަމުން ދާނީ،" އާތިފް ވިދާޅުވި އެވެ.

އެހެންކަމުން، އާތިފް ވިދާޅުވީ މާލީ ކަންކަމުގައި ކައުންސިލްތައް ޒިންމާދާރުކުރުވައި ޖަވާބުދާރީކުރެވޭނެ ރަނގަޅު ނިޒާމެއް އޮއްވައި، ކައުންސިލްތަކަށް އިތުރު ހުރަސްތައް ކުރިމަތިކުރުވުމުން ރައްޔިތުންނަށް ދޭ ހިދުމަތްތަކަށް ބުރޫއަރާނެ ކަމަށެވެ.

"އަޅުގަނޑު އުއްމީދު ކުރަނީ ރައީސް އަދިވެސް މިކަމާ ރަނގަޅަށް ވިސްނައިވަޑައިގަތް އަޅުގަނޑުމެންނަށް މި ބަދަލުތައް ފަސޭހަވާނެ ގޮތަށް އިންތިޒާމް ކޮށްދިނުން،" މޭޔަރު ވިދާޅުވި އެވެ.