ފެންނަނީ ރައީސްގެ ކެމްޕޭނުގެ ވައުދުތައް ވެރިކަމުގެ ދައުރުގައި ހަގީގަތަކަށްވާތަން: ވައިކަރަދޫ ރައީސް

ރައީސް ޑރ. މުހައްމަދު މުއިއްޒުގެ ވެރިކަމުގައި މިހާތަނަށް ފެނިވަޑައިގަންނަވަނީ ރިޔާސީ އިންތިހާބުގެ ކެމްޕޭނުގައި ރަށްރަށަށް ކޮށްދެއްވާނެ ކަމަށް ވައުދުވެވަޑައިގެންނެވި ކަންކަން ފުރިހަމަ ކުރައްވާ ތަން ކަމަށް ވައިކަރަދޫ ކައުންސިލްގެ ރައީސް އަބްދުﷲ ޒާމިރު މިއަދު ވިދާޅުވެއްޖެ އެވެ.

ރައީސް ހދ. އަތޮޅަށް ކުރައްވަމުން ގެންދަވާ ދަތުރުފުޅުގައި ވައިކަރަދު އަށް ވަޑައިގެން ރައްޔިތުންނާ އެކު ބޭއްވި ބައްދަލުވުމުގައި ކައުންސިލްގެ ރައީސް ޒާމިރު ވިދާޅުވީ ކެމްޕޭނު ދުވަސްވަރު ލާމަރުކަޒީ ނިޒާމުގެ ވާހަކަ ދެއްކެވި އެއް ބޭފުޅަކީ އެއީ ކަމަށް ވާނެ ކަމަށެވެ.

އެންމެ ބޮޑަށް ވަކާލާތު ކުރެއްވީ ރަށު ފަސްގަނޑުގައި ތިބެގެން ކުރަންޖެހޭ ކަންކަން ރަށުގައި ތިބެގެން ކުރެވޭނެ ގޮތެއް ހެދުމާއި ކަންކަމަށް ގޮތް ނިންމުމުގެ ބާރު އެ ރަށަކަށް ހޯދުމަށް ކަމަށް ޒާމިރު ވިދާޅުވި އެވެ.

ރައީސް މުއިއްޒު ވައުދުވެވަޑައިގެންނެވި ކަންކަން ފުއްދަވައިދެއްވާކަން ފާހަގަ ކުރައްވަމުން ޒާމިރު ވިދާޅުވީ އާސަންދައިން އައިނު ހައްދަން ކުރިން ދެމުން އައި އަދަދު ރައީސްގެ ވައުދާ އެއްގޮތަށް ބޮޑުކޮށްދެއްވާފައިވާ ކަމަށެވެ.

"މިއަދު މި ތަނުން އަޅުގަނޑުމެންނަށް މި ފެންނަ މަންޒަރަކީ، އޭރު ކެމްޕޭނުގައި ގޮވި ވާހަކަ ހަގީގަތަކަށް ވެގެން ދިޔަ މަންޒަރު ނޫންތޯ މި ފެންނަނީ. ރާއްޖޭގެ ރައީސް އަޅުގަނޑުމެންނާ ހަމައަށް ވަޑައިގެން ވަކިވަކިން ބައްދަލުކުރައްވައި، ކައުންސިލްގައި ހުރި މައްސަލައެއް އޮތަސް އަންހެނުން ކޮމެޓީގެ މައްސަލައެއް އޮތަސް، ފެނަކައިގެ މައްސަލައެއް އޮތަސް ސްކޫލުގައި މައްސަލައެއް އޮތަސް އޮޅުންފިލުއްވާ...." ޒާމިރު ވިދާޅުވި އެވެ.

ވަކިވަކި ރައްޔިތުންގެ ބައްދަލުވުންތަކުގައި ވެސް ރައީސް ބައިވެރިވެވަޑައިގެންނެވިކަން ފާހަގަ ކުރައްވަމުން އޭނާ ވިދާޅުވީ އެއީ ރައްޔިތުން ބޭނުންވާ މިނިވަންކަން ކަމަށެވެ.

ޒާމިރު ވިދާޅުވިގޮތުގައި، ރައީސް މުއިއްޒު ވެވަޑައިގެންފައިވާ ވައުދުތައް ހަގީގަތަކަށް ހައްދަވައި ދެއްވުމަށް ކަމާ ގުޅުން ހުރި އިދާރާތަކުގެ ވެރިިންނާ އެކު ރަށްރަށަށް ވަޑައިގަންނަވަނީ ރައްޔިތުން ބޭނުންވާ ގޮތަށް ކަންކަން ކޮށްދެއްވުމަށެވެ.

ސަރުކާރާ އިދިކޮޅު ފަރާތްތަކުން ދައްކަމުންދާ ވާހަކަތަކަށް ރައްދު ދެއްވަމުން އޭނާ ވިދާޅުވީ ރައީސް ކޮށްދެއްވާ ކަންކަމަށް ޝުކުރު އަދާކުރެއްވުން ހައްގު ކަމަށެވެ.

ރައީސް މުއިއްޒު ވަނީ ވައިކަރަދޫ ރައްޔިތުންނަށް އެ މަނިކުފާނު ކޮށްދެއްވަން ވައުދުވެ ވަޑައިގެން ކަންކަމާއި ދައުލަތުގެ އަންނަ އަހަރުގެ ބަޖެޓުގައި ހިމަނާނެ ކަންކަން ހާމަކުރައްވައިފަ އެވެ.

ވައިކަރަދޫ ބަނދަރު މަސައްކަތާއި މޫދަށް އެރޭ ސަރަހައްދަކާއި ފަތާ ޓްރެކެއް އަޅަން ފެށުމާއި ފުޓުބޯޅަ ދަނޑުގެ މަސައްކަތާއި ހޭންޑްބޯލް ކޯޓެއްގެ އިތުރުން އައުޓްޑޯ ޖިމެއް އަދި ސްކޭޓް ޕާކެއް ހަދައިދިނުމަށް ނިންމަވާފައިވާކަން ރައީސް އިއުލާނުކުރެއްވި އެވެ.

އެ މަނިކުފާނު ވިދާޅުވީ މަސައްކަތްތައް ފެށުމަށް އެމްޓީސީސީއާ ހަވާލުކޮށް، ޑިޒައިން ފައިނަލް ވެފައިވާ ކަމަށާއި އަންނަ މަހު އަމަލީ މަސައްކަތް ފައްޓަވާނެ ކަމަށެވެ.

އަޅަން ފަށައި ނުނިމި އެތައް އަހަރެއް ވެފައިވާ 12 ކްލާސްރޫމުގެ މަސައްކަތާއި މަލްޓިޕާޕަސް ހޯލުގެ މަސައްކަތް ފެށުމަށާއި އަންނަ ދިރާސީ އަހަރާ އެކު ސްކޫލުގެ އާ ކްލާސްރޫމު ބޭނުން ކުރަން ފެށުމަށް މަސައްކަތް ކުރައްވާނެ ކަމަށް ރައީސް ވިދާޅުވި އެވެ.