ހަފުތާއެއް ނުވަނީސް ހުރާގެ މޮނިއުމަންޓަށް ގެއްލުންދީ، ހަލާކުކޮށްލައިފި

ކ. ހުރާގެ ބަނދަރުމަތީގައި އެ ރަށު ކައުންސިލްގެ ފަރާތުން މޮނިއުމަންޓް ބެހެއްޓިތާ ހަފުތާއެއް ނުވަނީސް އެ ތަން ހަލާކުކޮށްލައިފި އެވެ.

ޓޫރިސްޓުންގެ މެދުގައި "ކްރެބް އައިލެންޑް" ގެ ގޮތުގައި މަޝްހޫރުވެފައިވާ ހުރާގެ ބަނދަރުމަތީގައި ބެހެއްޓި މޮނިއުމަންޓުގައި އެ ރަށުގެ ނަމާ އެކު، ހަރުކޮށްފައި ހުރީ ރަތް ކަކުންޏަކާއި މާކަނަ އެކެވެ.

ހުރާ ކައުންސިލުން އިއްޔެ ކުރި އިއުލާނެއްގައި ބުނީ، ފައިބަރުން ހަދާފައިވާ މޮނިއުމަންޓުގެ ބައެއް ތަންތަނަށް ގެއްލުންދީ، އިއްޔެ ރޭ ދަންވަރު ހަލާކު ކޮށްލާފައިވާ އެވެ.

މޮނިއުމަންޓަށް ގެއްލުން ދިން މީހުން ހޯދަން ކައުންސިލުން މިހާރު ވަނީ ފުލުހުންނަށް ވެސް ހުށަހަޅައިފަ އެވެ.

ފުލުހުންނަށް މައްސަލަ ހުށަހެޅީ އެއީ ރަށު ރައްޔިތުން ވަރަށް ބޮޑު ހަރަދެއް ކޮށްގެން ތައްޔާރުކުރި މޮނިއުމަންޓަކަށް ވާތީ އާއި އެފަދަ އަމަލުތަކަކީ ރަށުގެ ކުރިއެރުމާއި ތަރައްގީ އަށް އެޅޭނެ ހުރަހަކަށް ވާތީ ކަމަށް ކައުންސިލުން ބުންޏެވެ.

"މިފަދަ ނާތަހުޒީބު އަމަލުތައް ހިންގާ ފަރާތްތަކާ މެދު އަޅަން ޖެހޭ ފިޔަވަޅުތައް ނޭޅި ހައްގު އަދަބު ނުދެވޭ ނަމަ މިފަދަ އަމަލުތައް މުޖުތަމައުގައި ތަކުރާރުވެ، ރައްޔިތުންގެ އަމަންއަމާން ކަމަށް އަސަރުކޮށް، ރަށުގައި ފިތުނަ ފަސާދަ އިތުރުވެގެން ހިނގައިދާނެ ކަމަށް ކައުންސިލުން ދެކެމެވެ،" ބަޔާނުގައި ވެ އެވެ.

ފޮޓޯތަކުން ފެންނަ ގޮތުގައި މޮނިއުމަންޓުގައި ހަރުކޮށްފައިވާ މާކަނަ އަށް ގެއްލުން ދީފައި ވަނީ ދަގަނޑެއް ފަދަ އެއްޗަކުންނެވެ.