ޣައްޒާގެ ހަމަލާ ހުއްޓުވޭނީ ޓްރަމްޕަށް ކަމަށް ވިދާޅުވެ މިސްރުގެ ރައީސް އާދޭސް ދަންނަވައިފި

އިޒްރޭލުން ފަލަސްތީނުގެ ޣައްޒާގައި ދެމުން ގެންދާ ހަމަލާތައް ހުއްޓުވޭނީ އެމެރިކާގެ ރައީސް ޑޮނަލްޑް ޓްރަމްޕަށް ކަމަށް ވިދާޅުވެ މިސްރުގެ ރައީސް އަބްދުލްފައްތާހް އައް ސީސީ ޓްރަމްޕަށް އާދޭސް ދަންނަވައިފި އެވެ.

ޓީވީ މެދުވެރިކޮށް ދެއްވި ހިތާބުގައި ސީސީ ވަނީ 21 މަހަށް ވުރެ ގިނަ ދުވަސް ފަހުން "ހަނގުރާމަ ހުއްޓުވައި، އެހީތެރިކަން ފޯރުކޮށްދީ، މި ހިތާމަތައް ނިމުމަކަށް ގެނައުމުގެ ގާބިލުކަން ހުރި ބޭފުޅަކީ ޓްރަމްޕް" ކަމަށް ވިދާޅުވެފަ އެވެ. އޭނާ ވިދާޅުވީ އެ ޣައްޒާގެ ރައްޔިތުންނަށް އިންސާނީ ބޮޑު ކާރިސާއެއް ކުރިމަތިވެފައިވާ ކަމަށެވެ.

"އެހެންވެ، އަޅުގަނޑު ހާއްސަ އިލްތިމާސެއްގެ ގޮތުން، އިއްޒަތްތެރި ރައީސް ޓްރަމްޕުގެ ކިބައިން މި އެދެނީ ހަމަލާތައް ހުއްޓުމަކަށް ގެނައުމަށްކުރެވެން އޮތް ކޮންމެ ކަމެއް ވެސް ކޮށްދެއްވުމަށް. އަދި އެހީގެ ސާމާނު ވެއްދުމަށް ފުރުސަތު ދިނުމަށް،" މިސްރުގެ ރައީސް ވިދާޅުވި އެވެ.

"ހަނގުރާމަ ހުއްޓާލަންޖެހޭ ވަގުތު މި ވަނީ އައިސްފައި،" ހަމަލާތައް ހުއްޓުމަކަށް ގެނައުމަށް ކުރާ މަޝްވަރާތަކުގައި މެދުވެރިއެއްގެ ދައުރު އަދާކުރާ އެއް ގައުމު ކަމަށްވާ މިސްރުގެ ރައީސް ވިދާޅުވި އެވެ.

ޣައްޒާގެ ދެ މިލިއަނަށްވުރެ ބޮޑު އާބާދީ މިހާރު ވަނީ ބަނޑަށްޖެހިފަ އެވެ. ހައިހޫނުކަމުގައި މަރުވާ މީހުންގެ އަދަދު ވެސް ދަނީ އިތުރުވަމުންނެވެ.

ޓްރަމްޕު އިއްޔެ ވަނީ ޣައްޒާގައި ހަމަލާތައް ހުއްޓުމަކަށް ގެނައުމަށް އެއްބަސްވެއް ގާއިމުކުރުމަށް އަދިވެސް ފުރުސަތު އެބަ އޮތް ކަމަށް ވިދާޅުވެފަ އެވެ. އޭނާ މިހެން ވިދާޅުވެފައި މި ވަނީ ޣައްޒާގައި ހައިހޫނުކަމުގެ މައްސަލަ ބޮޑުވެ ފާޑުކިޔުން ވަރަށް ބޮޑަށް އިތުރުވެފައި ވަނިކޮށެވެ.