އެޗްއާރްސީއެމްގެ މެމްބަރު ކަމަށް ކުރިމަތިލާން ހުޅުވާލައިފި

ހިއުމަން ރައިޓްސް ކޮމިޝަން (އެޗްއާރްސީއެމް)ގެ ދެ މެމްބަރެއްގެ ދައުރު ހަމަވާތީ މެމްބަރުކަމަށް ކުރިމަތިލާން ރައީސް އޮފީހުން ހުޅުވާލައިފި އެވެ.

ރައީސް އޮފީހުން ބުނީ އެ ފުރުސަތު މިއަދުން ފެށިގެން އަންނަ މަހުގެ 9 ގެ ނިޔަލަށް ހުޅުވާލާފައިވާ ކަމަށެވެ.

އެޗްއާރްސީއެމްގެ ގާނޫނުގައި އޮންނަ ގޮތުން އެ ކޮމިޝަންގެ މެންބަރު ކަމަށް ކުރިމަތިލާ މީހަކީ އުމުރުން 25 އަހަރުވެފައިވާ ދިވެއްސަކަށް ވާންޖެހެ އެވެ. މީގެ އިތުރުން؛

- އިސްލާމްދީނުގައި ހައްދެއް ކަނޑައެޅިފައިވާ ކުށެއްކުރިކަން މިދިޔަ ފަސް އަހަރު ޝަރީއަތަށް ސާބިތުވެފައިވާ މީހަކު ކަމުގައި ނުވުން

- ރިޝްވަތުގެ ކުށެއް ސާބިތުވެފައިވާ މީހަކު ކަމުގައި ނުވުން

- ސަރުކާރުގެ ނުވަތަ އެހެން ފަރާތެއްގެ ވަޒީފާއެއް އަދާކުރާ މީހަކު ކަމުގައި ނުވުން

- ސިޔާސީ މަގާމެއް ފުރަމުންދާ މީހަކު ކަމުގައި ނުވުން

- ސިޔާސީ ޕާޓީއެއްގެ މެމްބަރަކު ކަމުގައި ނުވަތަ ސިޔާސީ ޕާޓީއެއްގައި ހަރަކާތްތެރިވާ މީހަކު ކަމުގައި ނުވުން ހިމެނެ އެވެ.

މެމްބަރުކަމަށް ކުރިމަތިލުމުގެ ފޯމު ރައީސް އޮފީހުންގެ ވެބްސައިޓުން ޑައުންލޯޑުކުރެވޭނެ އެވެ. އެ ފޯމު ރަސްމީ ބަންދު ދުވަސްތައް ފިޔަވައި، ހެނދުނު 8:30 އިން މެންދުރު 12:00 އަށް ހުށަހެޅޭނެ ކަމަށް ވެސް އެ އޮފީހުން ބުންޏެވެ.

އެޗްއާރްސީއެމްގައި މިހާރު ތިއްބަވާ ފަސް މެމްބަރުންނަކީ މަރިޔަމް މުނާ، މޫމިނާ ވަހީދު، އައިމިނަތު ޝިފާއަތު، ސަމާއު އަހުމަދު ނަޖީބު އަދި އިސްމާއިލް ހަބީބެވެ.