ޕީޖީން ނިންމީ ވާނުވާގައި ތިބި 20 މީހަކު ދޫނުކުރަން

ޝަރީއަތް ނިމެންދެން ބަންދުކޮށްފައިވާ މީހުންގެ ތެރެއިން މޮނިޓަރިން ޓެގް އެޅުވުމަށް ފަހު ބަންދުން ދޫކުރަން އެދުނު 20 މީހަކު ދޫނުކުރަން ނިންމާފައިވާ ކަމަށް ޕްރޮސިކިއުޓާ ޖެނެރަލް (ޕީޖީ) އޮފީހުން ބުނެފި އެވެ.

ޝަރީއަތް ނިމެންދެން ބަންދުކުރުން ނުވަތަ ވާނުވާ ބަންދުގައި ގިނަ ބަޔަކު ތިބެން ޖެހުމުގެ ޝަކުވާއަށް ހައްލު ހޯދުމުގެ ގޮތުން އިލެކްޓްރޯނިކް މޮނިޓަރިން ނިޒާމުގެ ތެރެއިން ޓެގް އެޅުވުމަށްފަހު ބަންދަށް ލުއި ދޭން ފެށީ މިދިޔަ މަހުގެ 28 ގަ އެވެ.

ޕީޖީގެ ތަރުޖަމާނު އަހުމަދު ޝަފީއު އިއްޔެ އެކްސްގައި ކުރެއްވި ޕޯސްޓެއްގައި ވަނީ އިލެކްޓްރޯނިކް މޮނިޓަރިން ނިޒާމުގެ ތެރެއިން ޓެގު އަޅުވައި، ދޫކޮށްލަން އެދިފައިވާ މީހުންގެ ތަފާސްހިސާބު ހިއްސާކޮށްފަ އެވެ.

- ޓެގް އެޅުވުމަށްފަހު ބަންދުން ދޫކޮށްދިނުމަށް އެދި ހުށަހަޅާފައިވަނީ 121 މީހަކު

- ބަންދުން ދޫނުކުރަން ނިންމާފައިވަނީ 20 މީހަކު

- މިހާތަނަށް ދޫކޮށްލަން ނިންމީ ނުވަ މީހުން

- ފުލުހުންގެ އެސެސްމެންޓް ނުނިމޭތީ 92 މީހަކާ މެދު ގޮތެއް ނުނިމޭ

ޕީޖީ އޮފީހުން ކުރިން ބުނެފައިވަނީ ބަންދަށް ލުއި ދޭނީ އިލެކްޓްރޯނިކް މޮނިޓަރިން ޓެގް އެޅުވުމުން، އެ މީހުންގެ ފަރާތުން މުޖުތަމައުގެ ސަލާމަތަށް އޮތް ނުރައްކާ ކުޑަކުރެވިދާނެ ކަމަށް ފެންނަ ބާވަތްތަކުގެ ކުށްތަކުގެ ތުހުމަތު ކުރެވޭ މީހުންނަށް ކަމަށެވެ. އެ ނޫން މީހުންގެ ބަންދަށް ލުޔެއް ނުދޭނެ ކަމަށް ޕީޖީން ވަނީ ބުނެފަ އެވެ.

ޕީޖީ އޮފީހުން ބުނެފައިވާ ގޮތުގައި ކުޑަކުދިންނަށް ޖިންސީ ގޯނާކުރުމުގެ މައްސަލަތަކާއި މަރުގެ މައްސަލަތަކާއި ޓެރަރިޒަމްގެ ބޮޑެތި މައްސަލަތަކާއި މަސްތުވާތަކެތި ޓްރެފިކް ކުރުމުގެ ބޮޑެތި މައްސަލަތަކުގައި ޝަރީއަތް ނިމެންދެން ބަންދުގައި ތިބި މީހުންގެ ބަންދަށް ލުއި ދޭ ގޮތަކަށް އަދި ހަމަޖެހިފައެއް ނުވެ އެވެ. ޝަރީއަތް ނިމެންދެން ބަންދުގައި ތިބޭ މީހުންގެ ބަންދަށް ލުއިދޭން ފެށީ އެކަމާ ގުޅިގެން ރައީސް ޑރ. މުހައްމަދު މުއިއްޒާއި އެޓާނީ ޖެނެރަލް އަހުމަދު އުޝާމާއި އަދި ޕީޖީ އައްބާސް ޝަރީފް މަޝްވަރާ ކުރެއްވުމަށްފަހު އެވެ.