އަންހެން ކައުންސިލަރުންގެ އަދަދު 40 ޕަސެންޓަށް އިތުރު ކުރަނީ

ކައުންސިލްތަކުގައި ތިބޭ އަންހެން ކައުންސިލަރުންގެ އަދަދު 40 ޕަސެންޓަށް އިތުރު ކުރަން ރައީސް ޑރ. މުހައްމަދު މުއިއްޒު ނިންމަވައިފި އެވެ.

ލާމަރުކަޒީ ގާނޫނު އިސްލާހުކޮށް އަންހެން ކައުންސިލަރުން ތިބެން ޖެހޭ އަދަދު 33 ޕަސެންޓަށް ހަދައި އަންހެނުންގެ ކޮމެޓީތައް (ޑަބްލިޔުޑީސީ) އުފެއްދީ ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި 2021 ވަނަ އަހަރު އެވެ.

އެއާއެކު، މިހާރު ކައުންސިލްތަކުގައި 370 އަންހެން ކައުންސިލަރުން ތިބޭނެ އެވެ. އަދި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގައި 930 މެމްބަރުން އުޅެ އެވެ.

"ރައްޔިތުންނާ އެކު" ޕޮޑްކާސްޓްގައި ރައީސް ވިދާޅުވީ ކަންކަން އިސްލާހު ކުރުމުގެ ކުރިން ރައްޔިތުން އެކަމަށް ހޭލުންތެރި ކުރުވާނެ ކަމަށެވެ.

އެގޮތުން ކައުންސިލްގައި އަންހެނުން ބާރުވެރި ކުރުމަށް މިހާރު އޮތް ފުރުސަތު އިތުރު ކުރުމަށް ނިންމަވާފައިވާ ކަމަށް ވެސް ރައީސް ވިދާޅުވި އެވެ.

"33 ޕަސެންޓު ކައުންސިލް [އަންހެން] މެމްބަރުންނަށް ވާން ޖެހޭ ގޮތަށް މިހާރު މި އޮންނަނީ. އަޅުގަނޑުމެން އެ އަދަދު 40 ޕަސެންޓަށް އިތުރު ކުރުމަށް ނިންމާފައި މިއޮތީ،" އެމަނިކުފާނު ވިދާޅުވި އެވެ.

އެ ބަދަލުގެ ސަބަބުން އާބާދީ ބޮޑެތި ރަށްރަށް ފައިސާ ލިބޭނެ ކަމަށް ރައީސް ވިދާޅުވި އެވެ.

ލާމަރުކާޒީ ގާނޫނުގައި މިހާރު އޮންނަ ގޮތުން ކޮންމެ ރަށު ކައުންސިލެއްގައި މަދުވެގެން ފަސް މެމްބަރުން ތިބެން ޖެހެ އެވެ. އަދި 3،000 އަށް ވުރެ މަތީގެ އާބާދީ ރަށްތަކުގައި ހަތް ކައުންސިލަރުން ތިބޭނެ އެވެ.

ފަސް ކައުންސިލަރުން އިންތިހާބު ކުރާ ރަށު ކައުންސިލެއްގައި ދެ އަންހެން ކައުންސިލަރުންނާއި ހަތް ކައުންސިރަލުން ހިމެނޭ ރަށްތަކުގައި ތިން އަންހެން ކައުންސިލަރުން ތިބޭނެ އެވެ.