ފައިނަލުގައި ޔުނައިޓެޑާ ދެކޮޅަށް ނުކުތުމުގެ ކުރިން ޓޮޓެންހަމަށް އަނިޔާގެ މައްސަލަ

ލަންޑަން (މެއި 15) - މެންޗެސްޓާ ޔުނައިޓެޑާ ދެކޮޅަށް ޔޫރޮޕާ ލީގުގެ ފައިނަލްގައި ޓޮޓެންހަމް ހޮޓްސްޕާގެ މުހިއްމު ތިން ކުޅުންތެރިންނަށް ނުކުޅެވޭނެ ކަން ޔަގީން ވެއްޖެ އެވެ.

ލީގުގައި އެންމެ ފަހުން ކްރިސްޓަލް ޕެލަސް އަތުން ބަލިވި މެޗުގައި އަނިޔާވި ޓޮޓެންހަމްގެ ޑިޔާން ކުލުސެވްސްކީ ވަނީ އިއްޔެ ސާޖަރީއެއް ކޮށްފަ އެވެ. އުމުރުން 25 އަހަރުގެ ކުޅުންތެރިޔާ ވަނީ މި ސީޒަންގައި ޓޮޓެންހަމަށް 10 ގޯލު ޖަހައިދީ، 11 އެސިސްޓް ކޮށްފަ އެވެ.

މީގެ އިތުރުން އެޓީމުގެ ޖޭމްސް މެޑިސަން އާއި ލޫކަސް ބާގްވާލް އަށް ވެސް އަނިޔާގެ ސަބަބުން، އަންނަ ހަފުތާގެ ބުދަ ދުވަހުގެ ރޭ ކުޅޭ ޔޫއެފާ ޔޫރޮޕާ ލީގުގެ ފައިނަލްގައި ނުކުޅެވޭނެ އެވެ.

ޓޮޓެންހަމްގެ ކޯޗު އަންޖީ ޕޮސްޓެކޮގްލޫ މި ސީޒަންގައި އެ ޓީމު ކުޅުވީ އަނިޔާގެ ގިނަ މައްސަލަތަކަކާ އެކު އެވެ. އެގޮތުން މިކީ ވެން ޑެ ވެން، ކްރިސްޓިއަން ރޮމޭރޯ، ގުގްލިއެލްމޯ ވިސާރިއޯ އަދި ސޮން ހެއުން މިން ވެސް ވަނީ ގިނަ ދުވަސްތަކެއް އަނިޔާގައި ހޭދަ ކޮށްފަ އެވެ.

އިނގިރޭސި ޕްރިމިއާ ލީގުގައި ޓޮޓެންހަމް އޮތީ 17 ވަނައިގަ އެވެ. މިހާތަނަށް ކުޅުނު 36 މެޗުން އެ ޓީމު ވަނީ 20 މެޗުން ބަލިވެފަ އެވެ. އަދި 17 މެޗުން ބަލި ވެފައިވާ މެންޗެސްޓާ ޔުނައިޓެޑް އޮތީ 16 ވަނައިގަ އެވެ.

ލީގުގައި ދަށް ނަތީޖާތަކެއް ލިބުނު ނަމަވެސް ދެ ޓީމަށް ވެސް، ޔޫރޮޕާ ލީގުން މޮޅުވެގެން އަންނަ ސީޒަންގެ ޗެމްޕިއަންސް ލީގު ކުޅުމުގެ ފުރުސަތު ކޮންމެވެސް އެއް ޓީމަކަށް ލިބޭނެ އެވެ.