އެމްއެންޔޫ އާއި ބޭރުގެ ދެ ޔުނިވަސިޓީއަކާ އެކު އެއްބަސްވުމެއް

ގައުމީ ޔުނިވާސިޓީ (އެމްއެންޔޫ) އިން ބޭރުގެ ދެ ޔުނިވާސިޓީއަކާ ގުޅިގެން ދިރާސާކުރުމާއި ޓޫރިޒަމް ދާއިރާ ކުރިއެރުވުމަށް ދެ އެއްބަސްވުމެއްގައި ސޮއިކޮށްފި އެވެ.

މިދިޔަ އަންގާރަ ދުވަހު ސޮއިކުރީ އޮސްޓްރޭލިއާގެ ޔުނިވާސިޓީ "ދަ ހޮޓެލް ސްކޫލް އޮސްޓްރޭލިޔާ-ސަދާން ކްރޮސް ޔުނިވާސިޓީ" އާއި މެލޭޝިއާގެ ޔުނިވާސިޓީ "ސެލަންގޯ އިސްލާމިކް ޔުނިވާސިޓީ"އާ އެކުގަ އެވެ.

ހަޔަ އެޑިޔުކޭޝަން މިނިސްޓްރީން ބުނީ އޮސްޓްރޭލިއާގެ ޔުނިވާސިޓީއާ އެކު އެއްބަސްވުން ހެދީ ޓޫރިޒަމް ދާއިރާ ކުރިއެރުވުމަށް މަސައްކަތްކުރުމަށް ކަމަށެވެ.

އަދި އިސްލާމިކް ޔުނިވާސިޓީއާ އެކު ސޮއިކުރި އެއްބަސްވުމަކީ އެމްއެންޔޫއާ ގުޅިގެން ދިރާސާކުރުމާއި ދެ ގައުމުގެ ދަރިވަރުންނަށް އެކްސްޗޭންޖް ޕްރޮގްރާމްތަކުގައި ބައިވެރިވުމުގެ ފުރުސަތު ފަހިކޮށްދިނުމަށް ހެދި އެއްބަސްވުމެއް ކަމަށް ވެސް މިނިސްޓްރީން ބުންޏެވެ.

އެ އެއްބަސްވުމުގައި އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލާ ޑރ.އައިޝަތު ޝެހެނާޒް އާދަމް އެވެ.

"ދަ ހޮޓެލް ސްކޫލް އޮސްޓްރޭލިޔާ-ސަދާން ކްރޮސް ޔުނިވާސިޓީ"ގެ ފަރާތުން އެ ޔުނިވާސިޓީގެ އެގްޒެކެޓިވް ޖެނެރަލް މެނޭޖަރު ނިކޮލަސް ހައިޑް ސޮއި ކުރެއްވިއިރު "ސެލަންގޯ ޔުނިވާސިޓީން" ސޮއިކުރައްވާފައިވަނީ ވައިސް ޗާންސެލާ ޑރ. މުހައްމަދު ފަރީދު ރަވީ ބިން އަބްދުﷲ އެވެ.