ތެލެސީމިއާ ސެންޓަރު ބުރާސްފަތި ދުވަހު އޮރެންޖް ހިޔާއަށް، ހާއްސަ ބަސް ރޫޓެއް ގާއިމްކޮށްފި

ހުޅުމާލެ 1 ގެ ވިލާ ޕެޓްރޯލް ޝެޑް ކައިރީގައި ހުންނަ އޮރެންޖު ހިޔާގައި ތެލަސީމިއާ ސެންޓަރުގެ ހިދުމަތް ބުރާސްފަތި ދުވަހުން ފެށިގެން ދޭން ނިންމާފައިވާތީ، އެތަނަށް ދެވޭނެ ހާއްސަ ބަސް ރޫޓެއް އެމްޓީސީސީއިން ހަދައިފި އެވެ.

އެމްޓީސީސީ އިން ބުނީ، މިހާރު ހުޅުމާލޭގެ އެތެރޭގެ ހުރިހާ ދަތުރެއްގައި ވެސް އޮރެންޖު ހިޔާއަށް މަޑުކުރާނެ ކަމަށާއި މާލެއިން އޮރެންޖު ހިޔާއަށް ދާނީ އާރް15 ރޫޓުން ކަމަށެވެ. މިއަދު މެންދުރު 1:30 އިން ފެށިގެން އެ ދަތުރުތައް ވަނީ ފަށައިފަ އެވެ.

އެމްޓީސީސީއިން ބުނީ، އޮރެންޖު ހިޔާއަށް ހާއްސަ ބަސް ރޫޓެއް ހެދީ، ތެލެސީމިއާ ކުދިންނަށް މިހާރަށް ވުރެ ފަސޭހައިން އެތަނަށް ދެވޭނެ ގޮތް ހެދުމަށް ކަމަށެވެ.

އޮރެންޖު ހިޔާއަށް ތެލެސީމިއާ ސެންޓަރުގެ ބަދަލު ކުރަން ނިންމައި، އެކަމުގެ މަސައްކަތްތައް ސަރުކާރުން ވަނީ ފަށައިފި އެވެ. ސިފައިންނާ ހަވާލުކޮށްގެން އެ މަސައްކަތް ފެށީ މާޗް 28 ވަނަ ދުވަހު އެވެ. އެތަނުގެ މަސައްކަތްްތައް ސިފައިންނާ ހަވާލުކުރީ، މިހާރު ދަމަނަވެށީގައި ހިންގަމުންދާ އެތަނާ މެދު ތެލެސީމިއާ ކުދިންނާއި އާއިލާތަކުން ކަންބޮޑުވުން ފާޅުކޮށް، މުޒާހަރާ ކުރުމުންނެވެ.

އެހެންވެ، އޮރެންޖް ހިޔާއަށް ތެލެސީމިއާ ސެންޓަރު، ބަދަލުކޮށް ހިދުމަތް ދޭން ފަށަން ނިންމާފައިވަނީ އަންނަ ބުރާސްފަތި ދުވަހުން ފެށިގެންނެވެ.

އެމްޓީސީސީއިން މާލެ އާއި ހުޅުމާލޭގައި 15 ރޫޓަކުން ބަސް ދަތުރުތައް ކުރެ އެވެ.