ހިޔާ ފްލެޓް ސަރަހައްދަށް އިތުރު ބަސް ސްޓޮޕެއް

އެމްޓީސީސީން މާލެ ސަރަހައްދުގައި ދޭ އާރްޓީއެލް ބަހުގެ ހިދުމަތް އިތުރަށް ފުޅާކުރުމަށްޓަކައި ހުޅުމާލޭގެ ހިޔާ ފްލެޓް ސަރަހައްދަށް އިތުރު ބަސް ސްޓޮޕެއް ކަނޑައަޅައިފި އެވެ.

އެ ކުންފުނިން ބުނީ އާރު 6 އާއި އާރު 7 އާއި އާރު 8 އަދި އާރު 9 ގެ ބަސްތައް އެޗް 16 ވަނަ ހިޔާ ފްލެޓް ކައިރި އަށް މިއަދުން ފެށިގެން މަޑުކުރާނެ ކަމަށެވެ.

ހުޅުމާލެ 2 ގެ ފަސް ސްޓޮޕަަކަށް އާރުޓީއެލްގެ ބަސްތައް ކުރިން ހުއްޓި އެވެ. ވެލާނާ އިންޓަނޭޝަނަލް އެއާޕޯޓަށް ދަތުރުކުރި ބަސްތައް ހަ ސްޓޮޕަކަށް އޭރު ހުއްޓި އެވެ. ހިޔާ ފްލެޓް ސަރަހައްދަށް އިތުރުކުރި އާ ބަސް ސްޓޮޕާ އެކު، މާލެ އަށް ދަތުރުކުރާ ބަސްތައް ހުޅުމާލެ 2 ގެ ހަ ސްޓޮޕަކަށް ދެން މަޑުކުރާނެ އެވެ.

ހިޔާ ފްލެޓް ސަރަހައްދުން ހުޅުމާލެ 1 އަދި މާލެ އަށް ދަތުރުކުރާ މީހުންނަށް ހާއްސަކޮށް، ކޮންމެ 15 މިނިޓަކުން ބަހުގެ ހިދުމަތް އެމްޓީސީސީން އަންނަނީ ދެމުންނެވެ. އެންމެ ބާރު ބޮޑުވާ ވަގުތުތަކާ ދިމާކޮށް، ދޭތެރެދޭތެރެއިން އެކި ވަގުތުތަކުގައި ވެސް ދަތުރުތައް އިތުރު ކުރަމުންދެ އެވެ. ހާއްސަކޮށް ސްކޫލަށް ކުދިން ދާ ގަޑިތަކުގައި މިހާރު ވެސް ބަސްތައް އިތުރު ކުރެ އެވެ.

މާލެ ސަރަހައްދުގައި 12 ވަރަކަށް ރޫޓުން ބަސް ދަތުރުތައް އަންނަނީ ކުރަމުންނެވެ.

މާލެ އާއި ހުޅުމާލެއާ ދެމެދު އަޅާފައިވާ ސިނަމާލެ ބްރިޖްގައި ދުއްވަން އެންމެ ފުރަތަމަ ޑަބަލް ޑެކް ބަސް ގެނައީ 2018 ގަ އެވެ. އެ ފަހަރު 22 ޑަބަލް ޑެކް ބަސް ގެނެސްފައި ވެ އެވެ. އޭގެ ފަހުން މިދިޔަ އަހަރު ވަނީ އިތުރު 15 ޑަބަލް ޑެކް ބަސްތައް ގެނެސް ހިދުމަތް ފުޅާކޮށްފަ އެވެ.