މަސްތުވެގެން ހުރެ ނުރައްކާތެރިކޮށް ޓެކްސީ ދުއްވި މީހަކު ހައްޔަރުކޮށްފި

މަސްތުވެގެން ހުރެ ނުރައްކާތެރިކޮށް ޓެކްސީ ކާރެއް ދުއްވި މީހަކު ހައްޔަރުކޮށްފި އެވެ.

އެ މައްސަލާގައި ފުލުހުން ހައްޔަރުކުރީ ކާރު ދުއްވި ހމ. ފްލެޓްނަންބަރު 07-1-4، މުހައްމަދު މާއިސް އެވެ.

ފުލުހުން ބުނީ މިދިޔަ ބުރާސްފަތި ދުވަހުގެ ރޭ ހުޅުމާލޭ ހައިވޭގައި ހެޑްލައިޓް ނުދިއްލާ، ހަތަރު ސިގްނަލް ޖައްސައިގެން ނުރައްކާތެރިކޮށް ބާރު ސްޕީޑްގައި ދުއްވާފައި ދިޔަ ކާރެއް ފުލުހުންގެ އެންގުމުން ވެސް މަޑުނުކޮށް ދިޔަ ކަމަށެވެ.

އެ ކާރު ހޯދުމުގެ މަސައްކަތް ފުލުހުން ކުރަމުން ގެންދަނިކޮށް، ހުޅުމާލޭ ހައިވަކަރު މަގުން ޓްރީޓޮޕް ހޮސްޕިޓަލާ ދިމާލަށް އެ ކާރު ދަތުރު ކުރަމުން ދަނިކޮށް ފުލުހުން މަޑުކުރަން އެންގުމުން ވެސް މަޑުނުކޮށް ދުއްވާފައި ދިޔަ ކަމަށް ފުލުހުން ބުންޏެވެ.

ފުލުހުން ބުނިގޮތުގައި ކާރު ދުއްވާފައި ދިޔައީ ބަމްޕަރުތަކަށާއި ގޯޅި އަޅާއިރު ވެސް ދުވެލި މަޑުނުކޮށެވެ.

އެގޮތަށް ދުއްވަމުން ގޮސް ރަބަރުގަސްމަގު 97 ނަމްބަރު ފްލެޓް ކައިރިން ކާރު މަޑުކުރި އެ ކާރު ކައިރިއަށް ފުލުހުން ދިއުމުން އަނެއްކާވެސް ކާރު ދުއްވާލަން އުޅުނު ކަމަށް ވެސް ފުލުހުން ބުންޏެވެ.

ފުލުހުން ބުނީ ކާރު ހުއްޓުވިއިރު، ކާރުގެ ކަނާތްފަރާތު ފަހަތު ފުރޮޅުގެ ޓަޔަރު ނެތް ކަމަށާއި އެ ޓަޔަރު ފެނިފައިވަނީ 103 ނަމްބަރު ފްލެޓް ކައިރިން ކަމަށެވެ. އަދި ކާރަށް ވެސް އެކި ވަރުގެ ގެއްލުންތައް ލިިބިފައި ހުރި ކަމަށް ފުލުހުން ބުންޏެވެ.

ކާރު ދުއްވި މާއިސް ހައްޔަރު ކުރުމުން، ކޯޓުން ވަނީ އޭނާގެ ބަންދަށް ތިން ދުވަސް ޖަހައިފަ އެވެ.

ފުލުހުން ވަނީ އެ ކާރު ވެސް ޓޯކޮށްފަ އެވެ. ފުލުހުން އާންމުކުރި ފޮޓޯއިން ފެންނަ ގޮތުގައި އޭނާ ދުއްވީ އަވަސް ރައިޑުގެ ޓެކްސީއެކެވެ.