އިޒްރޭލްގެ މައްސަލާގައި އައިސީޖޭގެ އަޑުއެހުމެއްގައި އުޝާމް ބަޔާނެއް ދެއްވަނީ

ފަލަސްތީނަށް ދޭ އިންސާނީ އެހީތައް އިޒްރޭލުން ހުއްޓުވާ މައްސަލާގައި އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން މިހާރު ބަލަމުންދާ މައްސަލާގައި މާދަމާ ބާއްވާ އަޑުއެހުމެއްގައި ރާއްޖޭގެ ބަންޑާރަ ނައިބު އަހްމަދު އުޝާމް ބަޔާނެއް ދެއްވާ ގޮތަށް ހަމަޖެހިއްޖެ އެވެ.

ދިވެހި ސަރުކާރުން ބުނީ އިޒުރޭލުގެ ބާރުގެ ދަށަށް ގެނެސްފައިވާ ފަލަސްތީނުގެ ބިންތަކުގައި އދ. އާއި ބައިނަލްއަގުވާމީ ޖަމިއްޔާތަކާއި އެހެން ގައުމުތަކުން ހިންގާ ހަރަކާތްތަކާ ގުޅިގެން އިޒުރޭލުގެ އިލްތިޒާމްތަކާ ގުޅޭގޮތުން އައިސީޖޭގެ އިސްތިޝާރީ ލަފަޔަކަށް އެދި ހުށަހަޅާފައިވާ މައްސަލާގައި މިހާރު ކުރިއަށް ގެންދާ އަޑުއެހުންތަކުގައި ރާއްޖޭގެ ފަރާތުން ބަންޑާރަ ނައިބު އުޝާމް މާދަމާ އެ ކޯޓަށް ހާޒިރުވެ، ބަޔާނެއް ދިނުމަށް ހަމަޖެހިފައިވާ ކަމަށެވެ.

އެއީ އދ. އާއި އެހެނިހެން ބައިނަލްއަގުވާމީ ޖަމިއްޔާތަކާއި އެހެން ގައުމުތަކުން ފަލަސްތީނުގެ އާންމު ރައްޔިތުންނަށް ދެމުންދާ އަންނަ އިންސާނީ އެހީތެރިކަމަށް އިޒްރޭލުން ހުރަސްއަޅައ،ި އިންސާނީ އެހީތެރިކަން ފޯރުކޮށްދޭ އދ. ގެ ޖަމިއްޔާ ކަމަށްވާ ޔުނައިޓެޑް ނޭޝަންސް ރިލީފް އެންޑް ވޯކްސް އޭޖެންސީ ފޯ ޕަލަސްޓައިން ރެފިއުޖީސް އިން ދަ ނިއާ އީސްޓް (ޔޫއެންއާރުޑަބްލިއުއޭ)ގެ މަސައްކަތްތައް ހުއްޓުވާލުމަށް އިޒްރޭލުން ކުރާ ކަންކަމާ ގުޅޭގޮތުން ބަލާ މައްސަލައެެކެވެ.

އެ މައްސަލަ އެ ކޯޓަށް ހުށަހަޅާފައިވަނީ ޣައްޒާގައި އިންސާނީ އެހީތެރިކަން ފޯރުކޮށްދިނުމަށް ހަރަކާތްތެރިވަމުން އަންނަ ފަރާތްތަކަށް އަމާޒުކޮށް އިޒްރޭލުން ހަމަލާތައް ދެމުން ގެންދާތީ، އައިސީޖޭގެ އިސްތިޝާރީ ލަފަޔަކަށް އެދި ހުށަހެޅުމަށް އދ. ގެ އާންމު މަޖިލީހުގެ ގަރާރަކުން މިިދިޔަ އަހަރުގެ ޑިސެމްބަރު މަހުގެ 19 ވަނަ ދުވަހު ފާސްކުރުމުންނެވެ.

ރާއްޖޭގެ ފަރާތުން އެ މައްސަލާގައި ބައިވެރިވެ، މިދިޔަ ފެބްރުއަރީ މަހުގެ 28 ވަނަ ދުވަހު ވަނީ ލިޔުމުން ވެސް ބަޔާން ހުށަހަޅައިފަ އެވެ.