ލޯފަން ތިން ބެއިން މާސްޓާސްއަށް ފަހު ވެސް ދޫދިނުމެއް ނެތް، މިސްރާބު ޕީއެޗްޑީއާ ދިމާއަށް!

އެއީ ލޯފަން ތިންބެއިން ކަަމަށް ވިޔަސް އުނގެނުމުގައި އެހެން މީހުންނެކޭ މާ ބޮޑު ތަފާތެއް ނެތެވެ. ސެޓްފިކެޓް ލެވެލް އިން ފެށިގެން ޑިގްރީ އާއި މާސްޓާސް ވެސް އެއްކޮށް ހައްދަވައި އެތައް ބަޔަކަށް ނަމޫނާއަކަށް އެ ތިން ބެއިން ވެއްޖެ އެވެ. އެންމެ ފަހުން އިސްލާމިކް ޔުނިވާސިޓީން މާސްޓާސް ފުރިހަމަ ކުރައްވައި ރޭ އެ ހާސިލް ކުރެއްވީ އެ ސެޓްފިކެޓެވެ.

އެކަމަކު، ކުރީގެ ރައީސް އިބްރާހިމް މުހައްމަދު ސޯލިހުގެ އެއްބަނޑުއެއްބަފާ ލޯފަން ތިން ކޮއްކޮއިންނަށް ރޭ އިހުސާސްވީ ފަޅުކަމެވެ. އެއީ މިހާތަނަށް މޫސާ މުހައްމަދު ސޯލިހު (މޫސަބެ) އާއި އަބްދުﷲ ޝާޒްލީ (ޝާޒް) އާއި ހުސައިން ޝަޔާޒް (ހުސައިން) ގެ މިފަދަ ކޮންމެ އުފަލެއްގައި އެންމެ ކުރީގައި ހުންނަވާ ލޯބިވާ މަންމަ ނެތުމުގެ ފަޅުކަމެވެ.

"ރޭގައި ހަމަ ހީވީ ގައިން އެއްބައި މަދުހެން. މި އުފަލުގެ އެއްބައި ނެތްކަމުގެ އިހުސާސް ނޫން ކަމެއް ރޭގައި އަޅުގަނޑަށް ނުކުރެވުނު. މިހާރު ވެސް ހަމަ އެ ހިތާމަ މި ކުރަނީ،" ޅ. ހިންނަވަރު ބޮޑު މިސްކިތުގެ އިސް އިމާމުގެ މަގާމު މިހާރު ފުރުއްވާ މޫސަބެ ވިދާޅުވި އެވެ.

މޫސަބެމެންގެ މަންމަ ވަނީ މިދިޔަ އަހަރުގެ ޖުލައި 18 ގައި އަވަހަރާވެފަ އެވެ. އެހެންވެ، މިއީ އެ މަންމަ ނެތް ދުނިޔޭގައި މޫސަބެ 55 އާއި ޝާޒް 52 އަދި އުމުރުން 46 އަހަރުގެ ހުސައިން އަށް ލިބުނު އެންމެ ބޮޑު ކާމިޔާބީ އެވެ.

"އަޅުގަނޑުމެން ތިން ބެއިން މިހާ ހިސާބަށް އައުމުގެ ހަގީގީ މޭސްތިރިއަކީ މަންމަ އާއި ދޮންބެ (ކުރީގެ ރައީސް އިބޫ). މާލޭގައި ތިބުމުގެ ހުރިހާ އިންތިޒާމެއް ހަމަޖައްސަވަނީ ދޮންބެ. މަންމަ އާއި ދޮންބެ އެއީ އަޅުގަނޑުމެންގެ ހުރިހާ ވެސް ކާމިޔާބީއަކީ،" މޫސަބެ ވިދާޅުވި އެވެ.

އިސްލާމިކް ޔުނިވާސިޓީން ރޭ ބޭއްވި ދަސްވެނިވުމުގެ ރަސްމިއްޔާތުގައި، ކުއްލިއްޔާ އޮފް އިސްލާމިކް ރިވީލްޑް ނޮލެޖު އެންޑް ހިއުމަން ސައިންސްގެ ދާއިރާ އިން މޫސަބެ އާއި ޝާޒް އަދި ހުސައިން މާސްޓާސް ހާސިލް ކުރެއްވުމަކީ ހަގީގަތުގައި ވެސް އެ އާއިލާ އަށް ވަރަށް ބޮޑު އުފަލެކެވެ. އެ ތިން ބޭފުޅުންނަކީ އެންމެ ކުޑައިރުއްސުރެ ފެށިގެން އުނެގެނުމަށް ލޯބި ކުރެއްވި ބޭފުޅުންނެވެ. އުފަންވިތާ ވަކި ހިސާބުން ނުކުޅެދުންތެރިކަމަށް ބަދަލުވިޔަސް އުނގެނެން ވެއްޖެ ނަމަ ދުވަހަކު ފަހަތަށް ޖެހިވަޑައިގެންފައެއް ނުވެ އެވެ.

"ލޯފަން ވީމާ ޗެލެންޖުތަކެއް ހުރޭ. އެހެން ނަމަވެސް ކިޔެވުން ވީމާ އަޅުގަނޑުމެން ބޭނުމެއް ނުވޭ، ނުވެއޭ ކިޔާފައި ދޫކޮށްލާކަށް. އެސައިންމަންޓުތައް ރެކޯޑް ކޮށްފައި ލެކްޗަރާ އަށް ފޮނުވަނީ. ދެން އަޅުގަނޑުމެން ކިޔައިދޭ ގޮތަށް އެސައިންމަންޓު ލިޔާ ކުއްޖަކު ގެންގުޅެން،" މާސްޓާސް ފުރިހަމަ ކުރެއްވި ގޮތް ހިއްސާ ކުރައްވަމުން މޫސަބެ ވިދާޅުވި އެވެ.

އާއިލާގެ މި އުފަލުގައި ކުރީގެ ފަސްޓްލޭޑީ ފަޒްނާ އަހުމަދު ފޭސްބުކްގައި ކުރެއްވި ޕޯސްޓެއްގައި ވިދާޅުވީ، އެ ކޯހުން ޑިގްރީ ހާސިލުކުރެއްވިތާ ދެ އަހަރު ފަހުން މޫސަބެ އާއި ޝާޒް އަދި ހުސައިން މާސްޓާސް ހޯއްދެވުމަކީ ލިބުނު ވަރަށް ބޮޑު ކާމިޔާބީއެއް ކަމަށެވެ.

އެހެންވެ، ހޫނު މަރުހަބާއެއް ދަންނަވައި ފަޒްނާ ވިދާޅުވީ ކުރިއަށް އޮތްތަނުގައި އެ ބޭފުޅުން ޕީއެޗްޑީ ހާސިލު ކުރައްވައި އެކަން ފާހަގަ ކުރާނެ ކަމާ މެދު ޝައްކެއް ނެތް ކަމަށެވެ.

ފަޒްނާ ވިދާޅުވި ގޮތުގައި މި ކާމިޔާބީއަކީ އެ ބޭފުޅުންގެ މަންމަ ފަހުރުވެރިވާނެ ކާމިޔާބީއެކެވެ. އެ ތިން ބޭފުޅުންގެ ވެސް ކިޔެވުމުގެ ބިންގަލަކީ މަންމަ ކަމަށާއި އެ ކާމިޔާބީގެ ފަހަތުގައިވާ ހިތްވަރަކީ ވެސް އެއީ ކަމަށް ވިދާޅުވި އެވެ.

މި ތިން ބޭފުޅުން ވެސް ޑިގްރީ ހާސިލުކުރެއްވީ 2023 ގަ އެވެ. އެބޭފުޅުންނަށް ޑިގްރީ ސެޓްފިކެޓް ވެސް އޭރު ހަވާލުކޮށްދެއްވީ ރައީސްކަމުގައި އޭރު ހުންނެވި ދޮންބޭބެ ނުވަތަ އިބޫ އެެވެ.

މޫސަބެ "މިހާރު" އަށް މިއަދު ވިދާޅުވި ގޮތުން ނަމަ ދެން އޮތީ ޕީއެޗްޑީ އެވެ. އެ ހިސާބަށް ދެވޭނެ ކަމާ މެދު ޝައްކެތް ނެތް ކަަމަށް ވަރަށް ޔަގީންކަމާ އެކު އޭނާ ވިދާޅުވި އެވެ.

"އަޅުގަނޑުމެން ތިން މީހުންނަށް ވެސް ފުރުސަތު ލިބިއްޖިއްޔާ ޕީއެޗްޑީއާ ހަމައަށް ދެވޭނެ އިރާދަކުރެއްވިއްޔާ. ފުރުސަތު ލިބިއްޖިއްޔާ ދުލެއް ނުކުރާނަން،" މޫސަބެ ވިދާޅުވި އެވެ.

މީގެ ކުރިން މޫސަބެ، "މިހާރު" އަށް ވިދާޅުވި ގޮތުގައި އެ ތިން ބޭފުޅުން ވެސް އުފަންވިއިރު ލޮލުގެ ފެނުން ރަނގަޅެވެ. ކިޔަވައި ވިދާޅުވީ، އުފަން ރަށް ހިންނަވަރުގައި ހުންނަ ސްކޫލުންނެވެ. ނަމަވެސް، ވަކި ހިސާބަކަށް ދިޔަތަނުން އެ ބޭފުޅުންގެ ފެނުމަށް މައްސަލަތައް ދިމާވީ އެވެ.

މޫސަބެ އާއި ޝާޒް އަދި ހުސެއިން ގުރުއާން ހިތުދަސްކުރެއްވީ ވެސް މައުހަދުގެ ގުރުއާން ކްލާސްތަކުންނެވެ. ޓޭޕް ރެކޯޑަރު ޖައްސައިގެން ދަސްކޮށް، ކޮންމެ ދުވަހަކު ސޮފްހާއެއް މުދައްރިސަށް ކިޔައިދެއްވަމުން ގޮސް ގުރުއާން ހިތުދަސްކުރައްވާފައި ވަނީ ތިން އަހަރުންނެވެ.

އޭގެ ފަހުން، ހާފިޒު ކަމުގެ ކޯސް ނިމުމާ އެކު، ދެން ފުރިހަމަކުރެއްވީ ގާރީ ކޯހާއި އިމާމު ކަމުގެ ކޯހެވެ. އެ ކޯސްތަކުގެ އެކި ލެވެލްތައް ފުރިހަމަކުރައްވަމުން، ކިޔަވައި ވިދާޅުވީ ވެސް އެކުގަ އެވެ.

މޫސަބެ ހިންނަވަރު މިސްކިތުގެ އިސް އިމާމުކަން ލިބިވަޑައިގަތުމާ އެކު، މިހާރު ކުރައްވާ ކަމަކީ އިމާމުން ތަމްރީނު ކުރެއްވުމެވެ. މިހާރު ވެސް އޭނާގެ ދަރިވަރުން އެ ޒިންމާ އެބަ ނަގަ އެވެ.

މަންމަ އާއި ދޮންބެގެ އިތުރުން މޫސަބެ އެންމެ ބޮޑަށް ފާހަގަ ކުރައްވަނީ އެއްބަނޑުއެއްބަފާ ބޭފުޅުންނާއި އޭނާގެ ދަރިފުޅާއި އެސައިންޓުމަންޓުތައް ލިޔުމުގައި އެހީތެރިކަން ދިން ފަރާތެވެ.

"ހާއްސަކޮށް އަބުޖީގެ ނަން ހަމަ ފާހަގަކުރަންޖެހޭ. އެއީ އަޅުގަނޑު މި ގޮތުގައި ކުރިއަށް ދާން ފެށުމުގެ ބިންގާ. އަބުޖީ ދެއްވާ ހިތްވަރު އެއީ ހަނދާން ނުނެތޭނެ ކަމެއް،" ކުރީގެ މަޝްހޫރު ކޯޗު އަބްދުލްޖަލީލް، އަބުޖީގެ ނަން ފާހަގަކުރައްވަމުން މޫސަބެ ވިދާޅުވި އެވެ.