ފައިސާ ދިނުމުގައި މިނިސްޓްރީން ކްލަބްތަކުގެ މެދުގައި ތަފާތުކުރާތީ ނުރުހުން ފާޅުކޮށްފި

ކުރީ ސަރުކާރާއި، މި ސަރުކާރުގައި ވެސް މާލީ އެހީތެރިކަން ފޯރުކޮށްދިނުމުގައި ސްޕޯޓްސް މިނިސްޓްރީން، ކްލަބްތަކުގެ މެދުގައި ތަފާތުކުރާ ކަމަށް ބުނެ ބައެއް ކްލަބްތަކުން އެކަމުގެ ޝަކުވާކޮށްފި އެވެ.

ކްލަބްތަކުން މި މައްސަލަ ނެގީ އެފްއޭއެމްގެ ނޯމަލައިޒޭޝަން ކޮމިޓީގެ މެންބަރުންނާ އެކު ސްޕޯޓްސް މިނިސްޓަރު އަބްދުﷲ ރާފިއު، އެންމެ ފަހުން ބޭއްވެވި ބައްދަލުވުމުގަ އެވެ.

އެ ބައްދަލުވުމުގައި ބައިވެރިވި ކްލަބެއްގެ އޮފިޝަލަކު ބުނީ ސަރުކާރުން ފައިސާ ފޯރުކޮށްދިނުމުގައި މާޒިޔާއާ އެހެން ކްލަބްތަކާ ތަފާތު ކުރާކަމަށް ބުނެ އެ މައްސަލަ ކްލަބްތަކުގެ ވެރިން ފާހަގަ ކުރި ކަމަށެވެ.

އެގޮތުން ވަނީ މިދިޔަ އަހަރު ޑޮމެސްޓިކް ފުޓްބޯޅައިގެ ސީނިއާ އެއްވެސް މުބާރާތެއް ނެތް އިރު ވެސް ސަރުކާރުން މާޒިޔާ އަށް އެކަނި 1.8 މިލިއަން ރުފިޔާދިންކަން ފާހަގަކޮށްފަ އެވެ.

މާޒިޔާއިން މިދިޔަ އަހަރު ކުޅުނީ އޭއެފްސީ ޗެލެންޖް ލީގުގެ ގުރޫޕް ސްޓޭޖްގައި އެކަންޏެވެ. ސެންޓްރަލައިޒް އުސޫލުން، ކުވައިތުގައި ކުޅުނު، މާޒިޔާ ހިމެނުނު ގުރޫޕް ބީގެ މެޗުތަކުން އެ ޓީމު ނިންމާލީ ޕޮއިންޓެއް ނުލިބި އެވެ.

ކުރީގެ ސްޕޯޓްސް މިނިސްޓަރު އަހްމަދު މަހުލޫފްގެ ދައުރުގައި ވެސް މާޒިޔާއާ އެހެން ކްލަބްތަކާ ތަފާތު ކުރާ މައްސަލަ ކްލަބްތަކުން ފެންމަތި ކުރި އެވެ. އެގޮތުން މަހްލޫފްގެ ވަޒީރުކަމުގައި 2023 ގައި އެކަނި ވެސް މާޒިޔާ އަށް ފަސް މިލިއަން ރުފިޔާ ހޭދަ ކުރި ކަމަށް ކްލަބްތަކުން ބުނެ އެވެ.

"ކްލަބްތަކުގެ ވެރިން ވަނީ ރާއްޕެ [މިނިސްޓަރު ރާފިއު] ގާތުގައި މި ކޮންސާންތައް ފާހަގަކޮށްފައި. މާޒިޔާއާ އެހެން ކްލަބްތަކާ ތަފާތު ކުރާ މައްސަލައިގައި ކްލަބްތަކުގެ ވެރިން ފާހަގަ ކުރީ އެކަން އެހާ ފެއާ ނޫން ކަމަށް،" ބައްދަލުވުމުގައި ބައިވެރިވި ކްލަބެއްގެ އޮފިޝަލަކު ބުންޏެވެ.

"އޭއެފްސީ މުބާރާތުގައި ވާދަކުރާތީ ކޮންމެ ވެސް މިންވަރެއް ދިނުން ރަނގަޅު. އެކަމަކު އެހެން ކްލަބަކަށް މިދިޔަ އަހަރު އެއްވެސް އެއްޗެއް ނުލިބޭ. ކީއްވެ އެންމެ ކްލަބަކަށް ލިބެންވީ؟،"

ކުރީގެ ސަރުކާރުން، ފުރަތަމަ ޑިވިޝަނުގެ ކޮންމެ ކްލަބަކަށް ދޭން ވައުދުވި އެއް މިލިއަން ރުފިޔާ ދިނުމުގައި ވެސް އޭރު ތަފާތު ކުރި އެވެ. އަދިވެސް އެ ފައިސާ ބައެއް ކަލްބަތަކަށް ހަމަޔަކަށް ނުލިބެ އެވެ.

އެހެން ކްލަބެއްގެ ސީނިއާ އޮފިޝަލަކު ބުނީ މިނިސްޓަރު ރާފިއު އެ މަގާމާ ހަވާލުވި އިރު ދޭން ޖެހިފައި ހުރި ފައިސާ ބައެއް ކްލަބްތަކަށް ނުދީ، ވަކި ކްލަބަކަށް މިދިޔަ އަހަރު ބޮޑެތި އަދަދުތަކުން ފައިސާ ދިނުމަކީ މި ސަރުކާރުން ވެސް ކްލަބްތަކުގެ މެދުގައި ތަފާތުކުރުން ކަމަށެވެ.

"ދޭން ޖެހޭ ހުރިހާ ފައިސާއެއް ވަކި ކްލަބަކަށް ބަރާބަރަށް އެބަ ލިބޭ. އެކަމަކު އެހެން ކްލަބެއް ވެއްޖެއްޔާ މިއޮންނަނީ ޕެންޑިންގައި،" އޮފިޝަލް ބުންޏެވެ.

ކުރިން މި މަހު ފަށަން އެފްއޭއެމުން ތާވަލު ކުރި ފުޓްބޯޅަ ސީޒަނަށް ތައްޔާރުވުމަށް ވެސް ސަރުކާރުން ވަނީ ކޮންމެ ކްލަބަކަށް އެއް މިލިއަން ރުފިޔާގެ މަގުން ފައިސާ ދޫކޮށްފަ އެވެ. އެއީ ޖުމުލަ 10 މިލިއަން ރުފިޔާ އެވެ.

ހަމައެކަނި ފުޓްބޯޅަ ކްލަބްތަކަށް ފައިސާ ދޭތީ، އެހެން ކުޅިވަރުތަކުގެ ހަރަކާތްތެރި މީހުން ވެސް ވަނީ ކޮންބޮޑުވުން ފާޅުކޮށްފަ އެވެ.