ގިނަ އަދަދެއްގެ ޑޮކްޓަރުންނާއި ނަރުހުން ހޯދަން ހެލްތުން އިއުލާނުކޮށްފި

ގިނަ އަދަދެއްގެ ބިދޭސީ ޑޮކްޓަރުންނާއި ބިދޭސީ ނަރުހުން ހޯދަން ހެލްތު މިނިސްޓްރީން މިއަދު އިއުލާނުކޮށްފި އެވެ.

އެ މިނިސްޓްރީން ބުނީ 40 ސްޕެޝަލިސްޓު ޑޮކްޓަރުންނާއި 70 ނަރުހުން ހޯދަނީ ރަށްރަށުގެ ސިއްހީ މަރުކަޒުތަކަށް ކަމަށެވެ.

އެ މަގާމުތަކަށް ހޯދަން ފުރަތަމަ އިއުލާންކުރީ ދިވެހިންނެވެ. އެކަމަކު، އެކަށީގެންވާ ވަރަށް ދިވެހިން ނުލިބިގެން ބިދޭސީން ހޯދަން އިއުލާންކުރީ އެވެ.

ސްޕެޝަލިސްޓުން ހޯދަނީ މައިގަނޑު ހަތް ދާއިރާއަކުންނެވެ. އެއިން ކޮންމެ ސްޕެޝަލިޓީއަކުން ފަސް ޑޮކްޓަރުން ބޭނުންވާ ކަމަށް މިނިސްޓްރީން ބުންޏެވެ. އެއީ؛

- އަންހެނުންގެ ބަލިތަކަށް ހާއްސަ ޑޮކްޓަރުން.

- ލޮލުގެ ބަލިތަކަށް ހާއްސަ ޑޮކްޓަރުން.

- ހޭނައްތުމަށް ހާއްސަ ޑޮކްޓަރުން.

- ކަށީގެ އޮޕަރޭޝަން ޑޮކްޓަރުން.

- އާއްމު ސާޖަރީތަކަށް ހާއްސަ ޑޮކްޓަރުން.

- ރޭޑިއޮލޮޖިސްޓުން.

ޑޮކްޓަރުންނަށް މުސާރައިގެ ގޮތުގައި 30،990ރ، މަސައްކަތަށް ނުކުންނަ ކޮންމެ ދުވަހަކަށް 425ރ، އެކޮމޮޑޭޝަން އެލަވަންސްގެ ގޮތުގައި 7،000ރ، އަދި ފުޑް އެލަވަންސްގެ ގޮތުގައި 2،400ރ. އާއެކު މަދުވެގެން 51،440ރ. ލިބެ އެވެ.

އެ ޝަރުތުތަކުގެ ތެރޭގައި ސްޕެޝަލައިޒޭޝަނަށް ފަހު މަދުވެގެން އެއް އަހަރު މަސައްކަތް ކުރުން ހިމެނެ އެވެ. އަދި އުމުރުން 50 އަހަރުން ދަށް ނަމަ އިސްކަންދިނުމަކީ ޝަރުތެކެވެ.

ނަރުހުންގެ މުސާރަ އަށް 9،060ރ. މަސައްކަތަށް ނުކުންނަ ކޮންމެ ދުވަހަކަށް 120ރ. އެކޮމޮޑޭޝަން އެލަވަންސަށް 3،000ރ. އަދި ފުޑް އެލަވަންސް އަށް 1،800ރ. އާ އެކު މަދުވެގެން 16،980ރ. ލިބޭނެ އެވެ.

އެ ވަޒީފާއަށް ކުރިމަތިލުމުގެ ޝަރުތުތަކުގެ ތެރޭގައި 150 ނުވަތަ އެ އަށް ވުރެ ގިނަ އެނދު ހުންނަ ހޮސްޕިޓަލެއްގައި މިޑްވައިފް ނުވަތަ ސައިކޭޓްރީގެ ދާއިރާއިން މަދުވެގެން ދެ އަހަރުގެ މަސައްކަތުގެ ތަޖުރިބާ ލިބުން ހިމެނެ އެވެ. އަދި އުމުރުން 35 އަހަރުން ދަށް ނަމަ އިސްކަންދޭނެ ކަމަށް ވެސް ބުންޏެވެ.

އެ މަގާމުތަކަށް ކުރިމަތިލުމުގެ އެންމެ ފަހު ތާރީހަކި އަންނަ ބުރާސްފަތި ދުވަހެވެ.

ހެލްތު މިނިސްޓްރީން ބުނީ އެއްފަހަރާ ގިނަ އަދަދެއްގެ މުވައްޒަފުން ނެގުމަށް ފަހު ރިޒާވްގައި ބައެއް ޑޮކްޓަރުން ބައިތިއްބާނެ ކަމަށެވެ. އޭރުން، އެހެން ތަނަކަށް ބޭނުންވުމުން ވަގުތުން ޑޮކްޓަރުންނާއި ނަރުހުން ފޮނުވާލެވޭނެ ކަމަށް ބުންޏެވެ.