ޣައްޒާއިން 400 އަށް ވުރެ ގިނަ މީހުން ޝަހީދުކޮށްލުމަށް ފަހު ނަތަންޔާހޫ ބުނަނީ މިއީ ފެށުމެއް ކަމަށް

ފަލަސްތީނުގެ ޣައްޒާގައި އިއްޔެ ރޭ ދޭން ފެށި ހަމަލާތަކަކީ އަދި ފެށުމެއް ކަމަށާއި ދެން ހަމާސްއާ އެކު މަޝްވަރާއެއް ކުރިޔަސް އެކަން ވެސް ކުރިއަށް ދާނީ ހަމަލާތަކާ އެކުގައި ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފި އެވެ.

ޣައްޒާގައި ހަމަލާ ބަދަލުކުރުން މެދުކަނޑާލަން މިދިޔަ ޖެނުއަރީ މަހު ވީ އެއްބަސްވުމަށް ފަހު ދިން އެންމެ ވަރުގަދަ ހަމަލާތަކުގައި ޣައްޒާއިން އެއް ދުވަސް ތެރޭގައި ވަނީ 400 އަށް ވުރެ ގިނަ މީހުން ޝަހީދުކޮށްލައިފަ އެވެ.

މި ހަމަލާތަކަށް ފަހު ނަތަންޔާހޫ އާންމުކުރި ވީޑިއޯ ބަޔާނެއްގައި ބުނީ "އަހަރެމެންގެ ހަތިޔާރުގައި ހުރި ބާރު މިދިޔަ 24 ގަޑިއިރު ތެރޭ ހަމާސް އަށް އިހުސާސް ކުރެވޭނެ" ކަމަށެވެ.

"އަދި - ތިޔަ އެންމެންނާއި އެ މީހުންނަށް - ހުވާކޮށްފައި ބުނަން، މިއީ އަދި ފެށުމެއް،" ނަތަންޔާހޫ ބުންޏެވެ.

އިޒްރޭލުން ހަމަލާ ދިނީ ހަމަލާތައް މެދުކަނޑާލުމުގެ އެއްބަސްވުމުގެ ފުރަތަމަ މަރުހަލާ ނިމި ދެ ވަނަ މަރުހަލާ ކުރިއަށް ގެންދާނެ ގޮތަކާ މެދު އެއްބަސްވުމަކަށް ނާދެވި މަޝްވަރާތައް ހުއްޓުމަކަށް އައިސްފައި ވަނިކޮށެވެ. އެއްބަސްވުމުގެ ދެ ވަނަ މަރުހަލާގައި އޮތީ ހަމާސް އިން މިހާރު މިނިވަން ނުކޮށް ތިބި ރަހީނުން މިނިވަންކުރުމާއި ހަމަލާތައް ދާއިމީ ގޮތެއްގައި ހުއްޓުމަކަށް ގެނައުމާ ބެހޭ މަޝްވަރާ އެވެ.

ނަތަންޔާހޫގެ ބަޔާނުގައި ބުނީ ދެން މަޝްވަރާ ވެސް ކުރާނީ ހަމަލާތައް ދެމުން ކަމަށެވެ. އަދި ރަހީނުން މިނިވަންކުރުމަށް އަސްކަރީ ބާރުގެ ބޭނުންކުރުން މުހިންމު ކަމަށް ވެސް ބުންޏެވެ.

ހަމަލާތައް ފެށުމަށް އިޒްރޭލުން ބުނީ ރަހީނުކޮށްފައިވާ އެންމެން މިނިވަން ކުރެވެންދެން ހަމަލާތައް ކުރިއަށް ގެންދާނެ ކަމަށެވެ. އަދި ހަމަލާތައް އިތުރަށް ފުޅާކޮށް އެއްގަމު މަގުން އަރައި ހަމަލާ ދިނުމަށް ވެސް ތިބީ ތައްޔާރަށް ކަމަށް ބުންޏެވެ. އެކަމަކު އަންގާރަ ދުވަހު ވަނީ ހަމަލާތައް މަޑު ޖެހިފަ އެވެ. ނަމަވެސް ވަކިވަކިން ބައެއް ތަންތަނަށް ހަމަލާތަކެއް ދިނެވެ.

އިޒްރޭލުގެ އެކުވެރި އެމެރިކާއިން ބުނީ އިޒްރޭލުން އަލުން ހަމަލާތައް ފެށީ އެކަން ކުރިން އެމެރިކާއަށް އެންގުމަށް ފަހު ކަމަށެވެ. އަދި މި ހަމަލާތައް ކުރިއަށްދަނީ އެމެރިކާގެ ވެސް ބެލުމުގެ ދަށުން ކަމަށް ބުންޏެވެ.

ހަމާސް އިން އޮކްޓޫބަރު 7، 2023 ގައި އިޒްރޭލަށް ދިން ހަމަލާގައި 1،218 މީހުން މަރުވުމާ އެކު ހަމާސް ނައްތާލަން ކަމަށް ބުނެ ދޭން ފެށި ހަމަލާތަކުގައި މިހާތަނަށް ޣައްޒާއިން 48،577 މީހުން ވަނީ ޝަހީދުވެފަ އެވެ. އޭގެ ތެރޭގައި ގިނައީ އާންމުން ކަމަށް ދެ ފަރާތުގެ ތަފާސް ހިސާބުތަކުން ދައްކަ އެވެ.

އިޒްރޭލަށް ދިން ހަމަލާގައި ހަމާސް އިން ރަހީނުކުރި 251 މީހުންގެ ތެރެއިން 58 މީހުން އަދިވެސް ތިބީ ޣައްޒާގައި ކަމަށާއި އޭގެ ތެރެއިން 34 މީހުން މަރުވެފައިވާ ކަމަށް އިޒްރޭލުގެ އަސްކަރިއްޔާއިން ބުނެ އެވެ.