30 އަހަރަށް ފަހު ގާނާ ކީޕަރުން ތަމްރީނުކުރުމުގެ މަސައްކަތާ ދުރަށް

ވިކްޓްރީ ސްޕޯޓްސް ކްލަބުގެ ހިދުމަތްތެރިޔާ އަހުމަދު ރިޔާޒް (ގާނާ) ސިއްހީ ހާލަތު ތަންނުދޭތީ، 30 އަހަރަށް ފަހު ގޯލްކީޕާ ޓްރެއިނިންގެ މަސައްކަތުން ދުރަށް ޖެހިލައިފި އެވެ.

މާނައަކީ، ފަސް އަހަރުގެ މެދުކެނޑުމަކަށް ފަހު ވިކްޓްރީ މި ސީޒަނުގައި ފުރަތަމަ ޑިވިޝަނަށް އަންނައިރު ގާނާ އެ ޓީމުގެ ބެންޗުން ނުފެނުމެވެ.

މިދިޔަ ތިރީހަކަށް އަހަރުގެ ތެރޭގައި ކީޕަރު ޓްރެއިނަރުގެ ގޮތުގައި، ނުވަތަ ބައެއް ފަހަރަށް އެސިސްޓަންޓް ކޯޗުގެ ގޮތުގައި ވިކްޓްރީގެ ބެންޗުން ގާނާ ނުފެނިނުދެ އެވެ.

އުމުރުން 60 އަހަރުގެ ގާނާ ބުނީ އޭނާގެ ފައި ވަރަށް ބަލި ކަމަށާއި، ބާރު ބޯޅަތައް މިހާރު ނުޖެހޭ ކަމަށެވެ. އެހެންވެ ދަނޑުމަތީގައި ކުރަން ޖެހޭ އެއްވެސް މަސައްކަތެއްގައި ނޫޅެވޭނެ ކަމަށް، ވިކްޓްރީގެ ބޯޑުގައި ވެސް ހިމެނޭ ގާނާ ބުންޏެވެ.

ގާނާ އޭނާގެ ޒުވާން ދުވަސްވަރު ފުޓްބޯޅަ އާއި ކްރިކެޓް ކުޅުނެވެ. އެކަމަކު ކަކުލަށް އަނިޔާވުމުން، ފުޓްބޯޅަ ކުޅުން ހުއްޓާލައި، އޭނާ ނުކުތީ ވިކްޓްރީގެ އޭރުގެ ކީޕަރު ހަސަން ރަޝީދު (ޓަޑަން) އަށް އެހީވެދޭނެ ޓްރެއިނަރެއްގެ ގޮތުގަ އެވެ. އެ ފެށި ގޮތަށް އެ މަސައްކަތުގައި އޭނާ ހަރުވީ އެވެ.

ގާނާ ވަނީ ވިކްޓްރީގައި އިސްމާއިލް ޒަރިޔަންދު އާއި، ރާއްޖޭގައި އުފެދުނު އެންމެ މޮޅު ކީޕަރު އިމްރާން މުހައްމަދަށް ވެސް ޓްރެއިނިން ދީފަ އެވެ.

އޭރު ވިކްޓްރީގެ ޕްރެކްޓިސް ހަވީރު ހަތަރެއް ޖަހާއިރު ފަށާނަމަ، ތިނެއް ޖަހާއިރު އިމްރާން ނެރެ ގާނާ ތަމްރީނުތައް ފަށަ އެވެ. ޒަރިޔަންދު ވަނީ ގާނާގެ މަސައްކަތަށް ވަރަށް ބޮޑަށް ތައުރީފުކޮށްފަ އެވެ.

"މެޗެއްގެ ކުރިން އޮންނަ ޕްރެކްޓިހުގައި ބުނާނެ އިދިކޮޅަށް ނުކުންނަ ޓީމެއްގެ މިވެނި މީހަކު ބޯޅަ ޖަހާނީ މިހެންނޭ. ހަމަ އެ ކުޅުންތެރިޔާ ޖަހާ ގޮތަށް ބޯޅަ ޖަހައި އެ ބޯޅަތައް ދިފާއު ކުރަން އަހަރެމެންނަށް ފަރިތަ ކޮށްދޭނެ ގާނާ،" ޒަރިޔަންދު 2017 ވަނަ އަހަރު ބުނެފައިވެ އެވެ.

ވެސްޓް އިންޑީޒްގެ ކުރީގެ ކްރިކެޓް ކުޅުންތެރިޔާ ޖޮއެލް ގާނާގެ ނަމަށް ނިސްބަތްކޮށް، ކްރިކެޓް ދަނޑުން ނަން ހަރުވި ގާނާގެ މުޅި އާއިލާ އަކީ ވެސް ވިކްޓްރީގެ ލޭ ހިނގާ މީހުންނެވެ. އެގޮތުން އޭނާގެ އެއްބަނޑު އެއްބަފާ ތިން ކޮއްކޮއިން ކަމަށްވާ އަލީ ސުޒޭނާއި، މުހައްމަދު ނަޒީހާއި، އިބްރާހިމް ސިނާޒް (ސިނާ) ވަނީ ވިކްޓްރީ އަށް ކުޅެ ގިނަ ކާމިޔާބީތަކެއް ހޯދައިފަ އެވެ. އޭގެ ތެރެއިން ސުޒޭނަކީ ވިކްޓްރީގެ އެންމެ ކާމިޔާބު އެއް ކޯޗު ވެސް މެ އެވެ. އެ ހަތަރު ބެއިން ތިބެގެން ވެސް ވިކްޓްރީ އަށް ވަރަށް ގިނަ ކާމިޔާބީ ވަނީ ހޯދައިދީފަ އެވެ.

ގާނާ ބުނީ ފީލްޑްގައި މަސައްކަތް ނުކުރިޔަސް ވިކްޓަރީއާ އޭނާ ވަތްކެއް ނުވާނެ ކަމަށެވެ.

"ބޯޑް މެންބަރެއްގެ ގޮތުގައި ދެމި ހުންނާނަން،" ގާނާ ބުންޏެވެ.

ފުރަތަމަ ޑިވިޝަނުގައި ވިކްޓްރީގެ ކީޕަރު ޓްރެއިނަރަކަށް މަސައްކަތްކުރާނީ، ލަންކާގެ ގައުމީ ޓިމުގެ ކުރީގެ ކީޕަރު ޓްރޭނަރު ސަމްޕަތު ބުޑިކާ ބަންޑާރަ (ބަންޑާ) އެވެ. އޭނާ ވަނީ އެ ކްލަބް ދެ ވަނަ ޑިވިޝަނުގައި އޮތް އިރު ވެސް މަސައްކަތްކޮށްފަ އެވެ. މި ސީޒަނުގައި ވިކްޓަރީގެ ގޯލް ބަލަހައްޓާނީ އެ ގައުމުގެ ކީޕަރެއް ކަމަށްވާ ކަވީޝް ލަކްޕްރިޔާ އެވެ.